އެމްޑަބްލިއުއެސްސީ ދިވެހި ޕްރިމިއަރ ލީގުގައި މިއަދު ހަވީރު ކުޅެން އޮތް މެޗަށް ކުލަބު ވެލެންސިއާ ހާޒިރުވި ނަމަވެސް، އެ ޓީމުގެ ގިނަ ކުޅުންތެރިން ބަލިވޭ އުޅޭކަން އެންގުމުން މާޒިޔާ ސްޕޯޓްސް އެންޑް ރެކްރިއޭޝަނަށް މެޗު ލިބިއްޖެއެވެ.
އެފްއޭއެމުގެ ސެކްރެޓަރީ ޖެނެރަލް ހުސެއިން ޖަވާޒް (ޖަވާ)، އެ އިދާރާގެ މިޑީއާ ގުރޫޕުގައި ހާމަކުރި ސްޓޭންޓްމަންޓުގައި ވިދާޅުވީ މެޗު ކުޅެން އޮތްގަޑިއަށް ވެލެންސިއާ ދަނޑަށް ހާޒިރުވި ކަމަށެވެ. އެހެންނަމަވެސް މިހާރު މާލޭގައި ފެތެރުމުންދާ ރޯގާ ޖެހި، އެ ޓީމުގެ ގިނަ ކުޅުންތެރިން ބަލިވެފަވާކަން އެންގީ މެޗު ފެށެން ކުޑަތަން ވެފައިވަނިކޮށް ކަމަށެވެ. އެހެންކަމުން ވަގުތު ކުޑަތަން ވެފައިވަނިކޮށް އެކަން އެންގުމުގެ ސަބަބުން މެޗު ކެންސަލްކޮށް، މާޒިޔާއަށް މެޗު ލިބުނީ ކަމަށް މުބާރާތުގެ ކޮމިޓީން ނިންމާފަވާ ކަމަށްވެސް ޖަވާ ވިދާޅުވިއެވެ. މިގޮތަށް ނިންމީ މުބާރާތުގެ ގަވާއިދަށްވެސް ބެލުމަށްފަހު ކަމަށް ޖަވާ ވަނީ ފާހަގަކުރައްވާފައެވެ.
މި މެޗުގެ ތިން ޕޮއިންޓާއެކު މާޒިޔާ އެއްވަނައިގައި އޮތީ ހަ މެޗުން 18 ޕޮއިންޓާ އެކުއެވެ. ދެވަނައިގައި އޮތް އީގަލްސްއަށް ވަނީ ފަސް މެޗުން 13 ޕޮއިންޓް ލިބިފައެވެ. އަދި ލީގު ތާވަލު ފުލުގައި ވެލެންސިއާ އޮތީ ހަ މެޗުން ޕޮއިންޓެއް ނުލިބިއެވެ.