ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުން ސާބިއާގެ ތަޖުރިބާކާރު ފޯވާޑެއް ކަމަށްވާ ވޮޖިސްލާވް ބަލަބަނޮވިޗް ގެނެސްފިއެވެ.
މާޒިޔާއިން ގެނައި ސާބިއާގެ ފޯވާޑަކީ އެ ޤައުމުގެ ގިނަ ކުލަބުތަކަށް ކުޅެފައިވާ ކުޅުންތެރިއެކެވެ. އެގޮތުން އުމުރުން 27 އަހަރުގެ ބަލަބަނޮވިޗް އެންމެ ފަހުން ކުޅެފައި ވަނީ ސާބިއާގެ އާރްއެފްކީ ނޯވީ ސޭޑް އަށެވެ. އެ ކުލަބުގައި އެންމެ ފަހުން ހޭދަ ކުރި ސީޒަނުގައި އޭނާ ވަނީ 27 މެޗު ކުޅެދީ ހަތް ލަނޑު ޖަހާފައެވެ.
މި ސީޒަނަށް މާޒިޔާއިން މީގެ ކުރިން ބިދޭސީ ހަތަރު ކުޅުންތެރިން ގެނައި ނަމަވެސް، އެ ޓީމުން މި ފަހުން ވަނީ ދެ ކުޅުންތެރިއަކު ދޫކޮށްލާފައެވެ. އެއީ ބޮސްނިއާގެ މިޑްފީލްޑަރު އެލްޑާ ހަސަނޮވިޗް އާއި ސާބިއާގެ ފޯވާޑް ސްޓެފަން މިހައިލޮވިޗެވެ. އެހެންކަމުން މިހާރު މާޒިޔާގައި ތިބި ބިދޭސީ ކުޅުންތެރިންނަކީ ބަލަބަނޮވިޗް އާއެކު މިސްރުގެ މިޑްފީލްޑަރު ޚަލީލް ޖަމާލް އަދި ލިތުއޭނިއާގެ ޑިފެންޑަރު އެޑްގަރަސް ޒާސްކިސްއެވެ.
ކުރިއަށް އޭއެފްސީ ކަޕަށް ތައްޔާރުވުމަށް މާޒިޔާއިން އެ ޓީމުގެ ސްކޮޑު ވަރުގަދަ ކުރަމުން އަންނައިރު، އެ ޓީމުން މި ފަހުން ވަނީ ކޯޗުގެ ޤާމަށް އޭޝިއާ ފުޓްބޯޅައިގެ ތަޖުރިބާ ބޮޑު ބޮސްނިއާއަށް އުފަން ކޯޗެއް ކަމަށްވާ މިލޮމީރް ސެސްލިޖާ (މިލޯ) ހަމަޖައްސާފައެވެ. އަދި މި ސީޒަނުގެ އެފްއޭ ޗެރިޓީ ޝީލްޑް މެޗާއި, ޕްރެޒިޑެންޓްސް ކަޕް މާޒިޔާއަށް ކާމިޔާބުކޮށްދިނުމަށްފަހު، އެ ޓީމާ މި ސީޒަނަށް ހަވާލުވި ބަލްގޭރިއާގެ ކޯޗު އިވާން ވެންކޯފް ކޮލޭފް ވަނީ މަޤާމުން ވަކިވެފައެވެ.
މި ވަގުތު ދިވެހި ޕްރިމިއަރ ލީގު ތާވަލުގެ އެއްވަނައިގައި އޮތީވެސް މާޒިޔާއެވެ.