ނިއު ޒީލަންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ޑެންމާކް ބަލިކޮށް ދެވަނަ ބުރަށް ކޮލިފައިވުމާ ގާތަށް އިންގްލަންޑް ޖެހިލައިފިއެވެ.
އޮސްޓްރޭލިއާގެ ސިޑްނީ ފުޓްބޯލް ސްޓޭޑިއަމުގައި އިއްޔެ ކުޅުނު މެޗު އިންގްލަންޑުން ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ.
މި މެޗުގައި ފެނިގެންދިޔަ ހަމައެކަނި ލަނޑު އިންގްލަންޑުން ކާމިޔާބުކުރީ މެޗު ފަށައިގެން ހަވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ލޯރެން ޖޭމްސްއެވެ. މުޅި މެޗުގައިވެސް ޖޭމްސް މޮޅު ކުޅުމެއް ދެއްކިއިރު، އޭނާ ވަނީ އިންގްލަނޑުގެ ފުރަތަމަ އެގާރައިގެ ޖާގައެއް އޭނާއަށް ހައްގުވާކަން މި މެޗުގައި ސާބިތުކޮށްދީފައެވެ.
މި މޮޅާއެކު ގްރޫޕް ޑީގެ އެއްވަނައިގައި އިންގްލަންޑް އޮތީ ކުޅުނު ދެ މެޗުންވެސް މޮޅުވެ ހަ ޕޮއިންޓާއެކުއެވެ. މި ގްރޫޕުގައި ކުޅުނު ފުރަތަމަ މެޗުން އިންގްލަންޑް ވަނީ ހައިޓީ އަތުން 1-0 ގެ ނަތީޖާއަކުން މޮޅުވެފައެވެ.
މި ގްރޫޕުގެ ދެވަނައިގައި އޮތް ޑެންމާކާއި ތިންވަނައިގައި އޮތް ޗައިނާއަށް ދެ މެޗުން ތިން ޕޮއިންޓް ލިބިފައިވާއިރު، ފުލުގައި އޮތް ހައިޓީއަށް ޕޮއިންޓެއް ލިބިފައެއް ނުވެއެވެ. މި ގްރޫޕުގައި އިއްޔެ ކުޅުނު މެޗުން ޗައިނާ ވަނީ ހައިޓީ އަތުން 1-0 ގެ ނަތީޖާއަކުން މޮޅުވެފައެވެ. އެއާއެކު ހައިޓީ ވަނީ މުބާރާތުން ކަޓާފައެވެ.
މި ގްރޫޕުގެ ފަހު މެޗުގައި އިންގްލަންޑް ނުކުންނާނީ ޗައިނާއާ ދެކޮޅަށެވެ. އަދި ޑެންމާކް ނުކުންނާނީ ހައިޓީއާ ދެކޮޅަށެވެ.