ނިއު ޒީލެންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ގައި ކެނެޑާ އަތުން ބަލިވެ އަޔަލަންޑް މުބާރާތުން ކަޓައިފިއެވެ.
އޮސްޓްރޭލިއާގެ ޕާތް ރެކްޓޭންގިއުލާ ސްޓޭޑިއަމުގައި މިއަދު ކުޅުނު މެޗު ކެނެޑާއިން ކާމިޔާބުކުރީ 2-1 ގެ ނަތީޖާއަކުންނެވެ.
ގުރޫޕް ބީގައި ކުޅުނު ފުރަތަމަ މެޗުން އޮސްޓްރޭލިއާ އަތުން އަޔަލަންޑް ވަނީ ބަލިވެފައެވެ. އަދި ނައިޖީރިއާއާ ދެކޮޅަށް ކެނެޑާއިން ކުޅުނު ފުރަތަމަ މެޗު އެއްވަރުވުމާއެކު، މި މެޗަށް އެ ޓީމުން ނުކުތީ އިތުބާރާއެކުއެވެ.
މި މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފެއްދީ ކެނެޑާއިންނެވެ. އެހެން ނަމެވެސް މެޗުގެ ފެށުން ރަނގަޅުވެގެން ދިޔައީ މުބާރާތުގައި އަލަށް ވާދަކުރާ އަޔަލަންޑުގެއެވެ. މެޗުގެ ހަތަރުވަނަ މިނެޓުގައި ލިބުނު ކޯނަރަކުން މުބާރާތުގެ ތާރީޚުގައި އަޔަލަންޑުން ކާމިޔާބުކުރި ފުރަތަމަ ލަނޑު ޖަހައިދިނީ ކެޓީ މެކްކޭބެވެ.
މި ނަތީޖާގައި އޮވެ ފުރަތަމަ ހާފު ނިމެން ދަނިކޮށް ކެނެޑާއިން ނަތީޖާ ހަމަހަމަކުރީ މި ހާފުގެ އިތުރު ވަގުތުގައި އަޔަލަންޑުގެ މޭގަން ކޮނޯލީ އަތުން ބައިކޮޅަށް ވަން ލަނޑުންނެވެ. އަދި މެޗުގެ ދެވަނަ ހާފު ފަށައިގެން އަށްވަނަ މިނެޓުގެ ތެރޭގައި ކެނެޑާއިން ވަނީ ފަހަތުން އަރައި ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮއްދިނީ އެޑްރިއާނާ ލިއޯނެވެ. މި މެޗުގައި ދެވަނަ ހާފުގައި އަޔަލަންޑުން ކުރިއަށްޖެހިގެން ކުޅުނު ނަމެވެސް، އެ ޓީމަށް ވަނީ އިތުރު ލަނޑެއް ޖެހޭ ގޮތް ނުވެފައެވެ.
މި މޮޅާއެކު ކުޅުނު ދެ މެޗުން ހޯދި ހަތަރު ޕޮއިންޓާއެކު ކެނެޑާ އޮތީ ގުރޫޕުގެ އެއްވަނައިގައެވެ. މި ގުރޫޕްގައި މާދަމާ ހަވީރު އޮސްޓްރޭލިއާ ނުކުންނާނީ ނައިޖީރިއާއާ ދެކޮޅަށެވެ.