އަންނަ އޯގަސްޓް މަހު ޓްރިނިޑާޑް އެންޑް ޓޮބޭގޯގައި ބާއްވަން ހަމަޖެހިފައިވާ ކޮމަންވެލްތު ޔޫތު ގޭމްސްގައި ރާއްޖެއިން ބައިވެރިނުވާން ނިންމީ، އެ ގޭމްސްގައި މާ ރަނގަޅު ނަތީޖާއެއް ހޯދޭނެ ކަމަށް ޤަބޫލުފުޅު ނުކުރެއްވޭތީ ކަމަށް ކުޅިވަރާ ބެހޭ ވަޒީރު އަޙްމަދު މަޚްލޫފް ވިދާޅުވެއްޖެއެވެ.
އަންނަ މަހުގެ ހަތަރުން އެގާރައަށް ބޭއްވުމަށް ހަމަޖެހިފައިވާ މި ގޭމްސްގައި ވާދަނުކުރަން ރާއްޖެއިން ނިންމާފައިވަނީ މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ކުޅިވަރާ ބެހޭ ވުޒާރާއާއެކު މަޝްވަރާ ކުރުމަށްފަހުއެވެ. އެމްއޯސީން ނެރުނު ބަޔާނެއްގައި ބުނެފައިވަނީ މާލީ ގޮތުން މި ވަގުތު ދިމާވެފައިވާ ގޮންޖެހުންތަކާއި، ކުރިއަށް ހުރި އެހެން މުހިންމު ކަންތައްތަކަށް އިސްކަންދީގެން އެއަށް ފޯކަސް ކުރުމުގެ ގޮތުން، ކޮމަންވެލްތު ޔޫތު ގޭމްސްގައި ވާދަނުކުރަން ނިންމާފައިވާ ކަމަށެވެ.
މިކަމާ ގުޅިގެން މީޑިއާއަކުން ގެނެސްދީފައިވާ ޚަބަރެއް ޙިއްސާކުރައްވައި ކުރެއްވި ޓުވީޓެއްގައި މަޙްލޫފް ވިދާޅުވީ ކޮމަންވެލްތު ޔޫތު ގޭމްސްއަށް ކުރަން ހުރި ޚަރުދުތައް، އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ވާދަކުރާ އެތުލީޓުންނަށް ކޮށްފިކަމަށްވާނަމަ، މާ ބޮޑަށްވެސް ފައިދާ ވާނެ ކަމަށް އެ ވުޒާރާ އާއި، އޮލިމްޕިކް ކޮމިޓީ އަދި އެސޯސިއޭޝަންތަކަށް ޤަބޫލުކުރެވޭތީ ބައިވެރިނުވާން ނިންމީ ކަމަށެވެ.
މަޚްލޫފް ވިދާޅުވީ ގޭމްސްގައި ވާދަކުރުމަށް ކެރީބިއަން ސަރަޙައްދަށް ނިސްބަތްވާ ޓްރިނިޑާޑް އެންޑް ޓޮބޭގޯ ދިޔުމުގެ ޚަރަދު ބޮޑު ކަމަށެވެ. އެކަމަކު ގޭމްސްގައި ބައިވެރިނުވާން ނިންމީ ފައިސާގެ ދަތިކަމާ ހުރެ ކަމަށް ބުނުމުން، އެކަން ވަޒީރު ވަނީ ދޮގުކުރައްވާފައެވެ.
މި އަހަރުގެ ކޮމަންވެލްތު ޔޫތު ގޭމްސްގައި ރާއްޖެ ވާދަނުކުރާއިރު، އަންނަ މަހު ރާއްޖޭން ވާދަކުރަން އޮތް އެނޮކް ވޯލްޑް ބީޗް ގޭމްސްވެސް ވަނީ ކެންސަލްކޮށްފައެވެ. ކޮމަންވެލްތު ޔޫތު ގޭމްސް އާއި އެނޮކް ބީޗް ގޭމްސްގައި އެކި ސަބަބުތަކާ ހުރެ ވާދަނުކުރެވިދިޔައިރު، ދެން ރާއްޖޭން ވާދަކުރާނީ އަންނަ މަހުގެ 23 އިން ސެޕްޓެމްބަރު މަހުގެ ހަތަރަކަށް މަޑަގަސްކަރާގައި ބާއްވާ އައިއޯއައިޖީގައެވެ.