ކުޅިވަރު ވަޞީލަތްތައް ޤާއިމުކުރެއްވުމަށް ކުރިއަށްގެންދަވާ މަޝްރޫޢުތަކުގެ ތެރެއިން ކ. ހުރާ ފުޓްބޯޅަ ދަނޑުގެ ޓާފް ސަޕްލައިކޮށް، އިންސްޓޯލްކުރުމުގެ މަސައްކަތް ބަޔަކާ ޙަވާލުކުރައްވައިފިއެވެ.
ކުޅިވަރާ ބެހޭ ވުޒާރާގައި ކުރިއަށްގެންދިޔަ ރަސްމިއްޔާތެއްގައި ހުރާ ފުޓްބޯޅަ ދަނޑުގެ ޓާފް ސަޕްލައިކޮށް، އިންސްޓޯލްކުރުމުގެ މަސައްކަތް ޙަވާލުކުރައްވާފައިވަނީ ތްރީ ޓްރީ މޯލްޑިވިސްއާއެވެ.
މި މަސައްކަތުގެ އެއްބަސްވުމުގައި ކުޅިވަރާ ބެހޭ ވުޒާރާގެ ފަރާތުން ސޮއިކުރެއްވީ ޑެޕިއުޓީ މިނިސްޓަރު އަޙްމަދު މުޙައްމަދެވެ. އަދި ތްރީ ޓްރީ މޯލްޑިވްސްގެ ފަރާތުން ސޮއި ކުރެއްވީ އެ ކުންފުނީގެ ޕްރޮޖެކްޓް މެނޭޖަރު މުޙައްމަދު ނަޝްފާނެވެ.
ހުރާ ފުޓްބޯޅަ ދަނޑުގެ ޓާފް ސަޕްލައިކޮށް، އިންސްޓޯލްކުރުމުގެ މަސައްކަތް ޙަވާލުކުރައްވާފައިވަނީ މަސައްކަތް ފަށާތާ 70 ދުވަހުގެ ތެރޭގައި ނިންމާ ގޮތަށެވެ. މި މަޝްރޫއަކީ ކުޅިވަރާ ބެހޭ ވުޒާރާގެ ބަޖެޓުން ހަތަރު މިލިއަން ހަތްލައްކަ ނުވަދިހަ ދެހާސް ހަތަރު ސަތޭކަ ފަންސާސް ފަސް ރުފިޔާ ހަތްދިހަ ދެ ލާރި ޚަރަދުކޮށްގެން ކުރިިއަށްގެންދަން ނިންމާފައިވާ މަޝްރޫއެކެވެ.