ޔޫކްރެއިނަށް އަރައި އެ ޤައުމުގެ ބައެއް ސަރަޙައްދުތަކަށް އަތްގަދަކޮށްފައިވާ ރަޝިޔާގެ އަސްކަރިއްޔާއާ ދެކޮޅަށް އެ ޤައުމުން ފަށާފައިވާ ކައުންޓަރއޮފެންސިވް ނުވަތަ ރައްދު ހަމަލާގެ އަސްކަރީ ކެމްޕޭނުގެ ދަށުން ބޮޑެތި ކުރިއެރުންތަކެއް ހޯދާފައިވާ ކަމުގައި އެމެރިކާގެ ޚާރިޖީ ވަޒީރު އެންތަނީ ބްލިންކަން ވިދާޅުވެއްޖެއެވެ. އެމެރިކާއަކީ ޔޫކްރެއިންގެ އަސްކަރިއްޔާއަށް އެންމެ ބޮޑަށް އެހީތެރިކަން ފޯރުކޮށްދެމުންދާ ޤައުމެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ފެށި ހަނގުރާމައިގައި ރަޝިޔާއިން ވަނީ ޔޫކްރެއިންގެ އިރުމައްޗާއި ދެކުނުގެ ބައެއް ސަރަޙައްދުތަކަށް އަތްގަދަކޮށްފައެވެ. އޭގެ ތެރޭގައި އެ ޤައުމުގެ އިރުމަތީގައިވާ ދޮންބާސްގެ ލުހްނާސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާ ހިމެނެއެވެ. އެ ސަރަޙައްދުތައް މިނިވަން ކުރަން ޔޫކްރެއިނުން ކައުންޓަރއޮފެންސިވް ފަށާފައި ވަނީ މި އަހަރުއެވެ. ޔޫކްރެއިންގެ ފައުޖުތަކުން ދަނީ އިރުމައްޗާއި ދެކުނުގައި ވެސް ރަޝިޔާގެ އަމާޒުތަކަށް ހަމަލަދެމުންނެވެ.
ބްލިންކަން ވިދާޅުވީ ރަޝިޔާއިން އަތްގަދަކޮށްފައިވާ ޔޫކްރެއިންގެ ސަރަޙައްދުތަކުގެ ތެރެއިން 50 އިންސައްތަ މިހާރު މިނިވަންކޮށްފައިވާ ކަމުގައެވެ. އޭނާ މި ކަން ހާމަކުރައްވާފައި ވަނީ އެމެރިކާގެ ޚަބަރުފަތުރާ ޓީވީ ސްޓޭޝަން – ސީ.އެން.އެންއަށް ދެއްވި ބަސްދީގަތުމެއްގައެވެ. ނަމަވެސް، ޔޫކްރެއިނުން މީގެ ކުރިން ބުނަމުން ގޮސްފައި ވަނީ ކައުންޓަރއޮފެންސިވްގެ ދުވެލި މަޑު ކަމަށާއި، ރަޝިޔާއިން އަތްގަދަކޮށްފައިވާ ސަރަޙައްދުތަކަށް މިނިވަން ކުރުމަށް ކުރަމުންދާ ހަނގުރާމައަކީ ދަތި، އުނދަގޫ ހަނގުރާމައެއް ކަމުގައެވެ.
"މިއީ ކައުންޓަރއޮފެންސިވްގެ ކުރީކޮޅު ކަން ފާހަގަކުރަން ޖެހޭ. މިއީ ފަސޭހަ ކަމެއް ނޫން. ކުރިއަށް އޮތް ދޭން ނުވަތަ ތިން ހަފުތާގައި ކާމިޔާބު ކުރެވޭނެ ކަމެއް ނޫން. ކައުންޓަރއޮފެންސިވް އެތަކެއް މަހަކަށް ދެމިގެން ދިޔުމަކީ އެކަށީގެންވާ ކަމެއް،" ބްލިންކަން ވިދާޅުވިއެވެ.
ހުސްވި ޖޫން މަހު ވާހަކަފުޅު ދައްކަވަމުން ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވަނީ ކައުންޓަރއޮފެންސިވްގެ ދުވެލި ވަރަށް މަޑު ކަމަށް އެއްބަސްވެ ވަޑައިގަންނަވާފައެވެ. ނަމަވެސް، އިރުމަތީގައިވާ ބަޚްމުތާއި ދެކުނުގައިވާ ޒަޕޮރީޜިޔާ ކައިރީގައިވާ ބައެއް ރަށްތަކާއި އަވަށްތައް ޔޫކްރެއިންގެ ސިފައިން މިނިވަން ކޮށްފައިވާ ކަމުގައި އެ ޤައުމުން ބުނެއެވެ.
ސީ.އެން.އެންއަށް ދެއްވި ބަސްދީގަތުމުގައި ބްލިންކަން ވަނީ އެމެރިކާގައި އުފައްދާ "އެފް-16" މަރުކާގެ އަސްކަރީ މަތިންދާބޯޓުތައް ފޯރުކޮށްދިނުމާ ގުޅޭ ގޮތުން ވެސް ވާހަކަފުޅު ދައްކަވާފައެވެ. އޭނާ ވިދާޅުވީ ޔޫކްރެއިނަށް އަސްކަރީ މަތިންދާބޯޓުތައް ފޯރުކޮށްދިނުމަކީ ކުރިއަށް އޮތް ތަނުގައި ވާނެ ކަމެއް ކަމުގައެވެ. އަދި، އޭގެ ކުރިން ޔޫކްރެއިންގެ އަސްކަރީ ޕައިލެޓުންނާއި އެހެނިހެން މުވައްޒަފުންނަށް ފުރިހަމަ ތަމްރީނުތައް ދިނުން މުހިންމު ކަމުގައި ވެސް އޭނާ ވިދާޅުވިއެވެ.
އެމެރިކާއިން ދާދިފަހުން ވަނީ ޔޫކްރެއިނަށް 400 މިލިޔަން އެމެރިކާ ޑޮލަރުގެ އަގުހުރި އަސްކަރީ އެހީގެ އިތުރު ޕެކޭޖެއް ފޮނުވާނެ ކަން ވެސް އިޢުލާނުކޮށްފައެވެ. އެމެރިކާއަށް ފޮނުވަން ނިންމާފައިވާ އަސްކަރީ އެހީގެ ޕެކޭޖާ އެކު، އެ ޤައުމުން މިހާތަނަށް ޔޫކްރެއިނަށް ފޮނުވާފައިވާ އަސްކަރީ އެހީގެ ޕެކޭޖުތަކުގެ ޢަދަދު 43 އަށް އަރާނެއެވެ. އެމެރިކާއިން މިހާތަނަށް ޔޫކްރެއިނަށް ފޯރުކޮށްދީފައިވާ އަސްކަރީ އެހީގެ އަގު 41 ބިލިޔަން އެމެރިކާ ޑޮލަރަށް އަރައެވެ.