ބަންގްލަދޭޝްގައި ކުރެވުނު މަސައްކަތްތަކަށްވުރެ ރާއްޖޭގައި މާ ރަނގަޅު މަސައްކަތްތަކެއް ކުރެވޭނެ ކަމަށާއި، ވަސީލަތާއި ހުނަރުވެރި ކުޅުންތެރިން ރާއްޖޭގައި ގިނަ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އައު ޓެކްނިކަލް ޑިރެކްޓަރު ޕޯލް ތޯމަސް ސްމޯލީ ބުނެފިއެވެ.
ބަންގްލަދޭޝްގެ ޓެކްނިކަލް ޑައިރެކްޓަރުކަމުން މިދިޔަ ހަފުތާގައި އިސްތިއުފާ ދިނުމަށްފަހު ރާއްޖޭގެ މަޤާމާ ހަވާލުވެ، މީޑީއާއާ ފުރަތަމަ ފަހަރަށް ވާހަކަ ދައްކަމުން ސްމޯލީ ބުނީ ރާއްޖޭގެ ރަށް ރަށުގައި އަޅައިފައިވާ ދަނޑުތަކާއެކު ފުޓްބޯޅައިގައި ރަނގަޅު ވަސީލަތްތަކެއް ރާއްޖޭގައި އޮތުމަކީ، ރާއްޖޭގައި ރަނގަޅު މަސައްކަތްތަކެއް ކުރެވޭނެކަމުގެ އުއްމީދެއް ކަމަށެވެ. އަދި ވަސީލަތުގެ ގޮތުން ބެލިޔަސް އަދި ކުޅުންތެރިންގެ ހުނަރުވެރިކަމަށް ބެލިޔަސް ބަންގްލަދޭޝްގައި އޮތީ ވަރަށް ހަނި ފުރުސަތުތަކެއް ކަމަށާއި، ނަމަވެސް ރާއްޖޭގައިވެސް މަސައްކަތް ކުރިއަށްގެންދަން ގޮންޖެހުންތަކެއް ހުންނާނެކަން އެނގޭ ކަމަށްވެސް ވަނީ ބުނެފައެވެ.
ސްމޯލީ ބުނީ ރާއްޖޭގައި އޭނާ މަސައްކަތް ކުރާ ވާހަކަ އޭއެފްސީ އާއި ފީފާގެ ޓެކްނިކަލް ޑިޕާޓްމެންޓާ ހިއްސާކުރުމުން، އެ ދެ ޖަމިއްޔާއިންވެސް އެކަމަށް ހިތްހަމަޖެހުން ފާޅުކުރި ކަމަށެވެ.
ސްމޯލީގެ މުސާރައަކީ ގަތަރު ފުޓްބޯޅަ ފެޑަރޭޝަނުގެ ސްޕޮންސަޝިޕެއްގެ ދަށުން، އެ ފެޑަރޭޝަނުން ދެއްކުމަށް ހަމަޖެހިފައިވާ މުސާރައެކެވެ. އެހެންކަމުން އެފްއޭއެމާއި ގަތަރު ފުޓްބޯޅަ ފެޑަރޭޝަނުން އޭނާގެ މުސާރައިގެ އަދަދު ހާމަކުރަން ބޭނުންނުވާ ކަމަށް އެފްއޭއެމުގެ ރައީސް ބައްސާމް އަދީލް ޖަލީލް ވަނީ ވިދާޅުވެފައެވެ.
ބަންގްލަދޭޝް ފުޓްބޯޅަ އިދާރާގެ ޓެކްނިކަލް ޑިރެކްޓަރުގެ މަޤާމުގައި ސްމޯލީ ހުރިއިރު، އޭނާގެ މުސާރައަކީ ފަނަރަ ހާސް ޑޮލަރެވެ. އެއްބަސްވުމުގައި ބާކީ އެއް އަހަރު އޮށްވައި އެ މަޤާމު އޭނާ ދޫކޮށްލީ، މުސާރަ ބޮޑުކުރަން ބެންގްލަދޭޝްގެ އެފްއޭއިން ބޭނުންނުވުމުން ކަމަށް އެ ޤައުމުގެ މީޑިއާތަކުން ވަނީ ބުނެފައެވެ.
ސްމޯލީއަކީ އެފްއޭއެމްގެ ރައީސް ބައްސާމުގެ ދައުރުގައި ރާއްޖޭގައި މަސައްކަތްކުރާ ބޭރުގެ ތިންވަނަ ޓެކްނިކަލް ޑިރެކްޓަރެވެ. ބައްސާމުގެ ފުރަތަމަ ދައުރުގައި ތުރުކީގެ ޖޭން ވަންލީ ޓެކްނިކަލް ޑައިރެކްޓަރަކަށް ހަމަޖެއްސިއިރު، އެ ދައުރުގެ ފަހުކޮޅުގައި ޖުދާން އަލީ ވަނީ ހަމަޖައްސާފައެވެ.