މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގެ އެއް ހޯސްޓް ކަަމަށްވާ ނިއު ޒީލަންޑް ބަލިކޮށް، މުބާރާތުގައި ފުރަތަމަ ފަހަރަށް ބައިވެރިވާ ފިލިޕީންސްއިން ތާރީޚީ މޮޅެއް ހޯދައިފިއެވެ.
ނިއު ޒީލަންޑުގައި އިއްޔެ ކުޅުނު ކުޅުނު ގްރޫޕް އޭގެ މެޗު ފިލިޕީންސްއިން ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ.
މި މެޗުގައި ފެނިގެންދިޔަ ހަމައެކަނި ފިލިޕީންސްއިން ކާމިޔާބުކޮށްފައިވަނީ މެޗުގެ 24 ވަނަ މިނެޓުގައެވެ. މި ލަނޑު އެ ޓީމަށް ޖަހައިދިނީ ސަރީނާ ބޯލްޑަންއެވެ.
މި މެޗުގެ ދެވަނަ ހާފުގައި ނިޒު ޒީލަންޑުން ކުޅުން ރަނގަޅުކޮށް ގިނަ ހަމަލާތަކެއް އުފެއްދި ނަމަވެސް، ފިލިޕީންސްއިން ވަނީ އެ ޓީމުގެ ލީޑު ދިފާއުކޮށްފައެވެ. އަދި މެޗުގެ 68 ވަނަ މިނެޓުގައި ނިއު ޒީލަންޑުގެ ހަނާ ވިލްކިންސަން ލަނޑެއް ޖެހި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) އިން ވަނީ އެ ލަނޑު އޮފްސައިޑް ކަމަށް ނިންމާފައެވެ.
މި މޮޅާއެކު ވޯލްޑް ކަޕެއްގައި ފިލިޕީންސްއިން ފުރަތަމަ މޮޅު ހޯދިއިރު، ފީފާ ރޭންކިންގައި ފިލިޕީންސް އަށްވުރެ 20 ދަރަޖަ ކުރީގައި އޮތް ނިއު ޒީލަންޑަށް މިއީ ޤަބޫލުކުރަން ދަތި ނަތީޖާއެކެވެ. އެގޮތުން މެޗަށްފަހު ވާހަކަދައްކަމުން އެ ޓީމުގެ ކޯޗު ޖިޓްކާ ކްލިމްކޯވާ ވަނީ މި ނަތީޖާއާ މެދު ކުޅުންތެރިން ވަރަށް ހިތާމަކުރާ ކަމަށް ބުނެފައެވެ.
ގުރޫޕް އޭގައި ކޮންމެ ޓީމަކަށްވެސް ބާކީ އެއް މެޗު އޮތްއިރު، ތާވަލުގެ އެއްވަނައިގައި ހަތަރު ޕޮއިންޓާއެކު އޮތީ ސްވިޓްޒަލަންޑެވެ. ނިއު ޒީލަންޑާއި ފިލީޕީންސަށް ތިން ޕޮއިންޓް ލިބިފައިވާއިރު، ނޯވޭއަށް ލިބިފައިވަނީ އެންމެ ޕޮއިންޓެވެ.