ނިއު ޒީލެންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ފަހު ވަގުތުގައި ޖެހި ލަނޑާއެކު އިޓަލީން އާޖެންޓީނާގެ މައްޗަށް ކުރި ހޯދައިފިއެވެ.
ގުރޫޕް ޖީގައި އިއްޔެ ކުޅުނު މެޗު އިޓަލީން ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ.
ނިއު ޒީލެންޑުގެ އޯކްލޭންޑުގައި ކުޅުނު މެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފަވަނީ އިޓަލީންނެވެ. އާޖެންޓީނާގެ ފަރާތުން ދަށް ކުޅުމެއް ފެނިގެންދިޔަ މި މެޗުގެ ކުރީކޮޅު އިޓަލީގެ އަރިއާނާ ކަރުސޯ އާއި ވެލެންޓީނާ ޖިއަސީނީ ވަނީ އޮފްސައިޑް ދެ ލަނޑެއް ޖަހާފައެވެ.
މި މެޗުގައި އިޓަލީން ކާމިޔާބުކުރި ހަމައެކަނި ލަނޑު ކާމިޔާބުކޮށްފަވަނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ކްރިސްޓިއާނާ ގްރިއްލާއެވެ. ގްރިއްލާ ކުޅެން ނުކުތީ އިޓަލީގެ ޓީމުގައި ހިމެނޭ ޒުވާން މިޑްފީލްޑަރު, އުމުރުން 16 އަހަރުގެ ޖޫލިއާ ރަގޯނީގެ ބަދަލުގައެވެ. ޖޫލިއާ ވެފައިވާނީ މިއަދު ދެކުނު ކޮރެއާ އާއި ކޮލަމްބިޔާ ވާދަކުރި މެޗާ ހަމައަށް، މި މުބާރާތުގައި ކުޅުނު އެންމެ ޒުވާން ކުޅުންތެރިޔާއަށެވެ. މީގެ ކުރިން އުމުރުން 16 އަހަރުގައި ވޯލްޑް ކަޕުގައި ކުޅުންތެރިއަކު ފެނިފަވަނީ 1999 ވަނަ އަހަރު ނައިޖީރިއާ ޓީމުންނެވެ.
ހުސްވި އަހަރުގެ ޔޫރޯގައި އިޓަލީއަށް ކުރިމަތިވި ނާކާމިޔާބީއެކު މި ފަހަރު ވޯލްޑް ކަޕަށް އެ ޓީމުން ނުކުތީ ޒުވާން ކުޅުންތެރިންގެ ސްކޮޑަކާއެކުވެ. އެގޮތުން މި މުބާރާތުގައި ވަދާކުރާ އިޓަލީގެ ސްކޮޑުގައި 23 އަހަރުން ދަށުގެ 13 ކުޅުންތެރިއަކު ހިމެނެއެވެ.
އިޓަލީ އަތުން ބަލިވުމާއެކު، އާޖެންޓީނާ ވަނީ އެންމެ ފަހުން ކުޅުނު 10 މެޗުގެ ތެރެއިން އަށް މެޗުން ބަލިވެފައެވެ. މި މުބާރާތުގައި އަންނަ ހުކުރު ދުވަހު އާޖެންޓީނާ ނުކުންނާނީ ދެކުނު އެފްރިކާއާ ދެކޮޅަށެވެ. އަދި އަންނަ ހޮނިހިރު ދުވަހު އިޓަލީ ނުކުންނާނީ ސްވިޑެންއާ ދެކޮޅަށެވެ.