ނިއު ޒީލެންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި މޮރޮކޯއާ ދެކޮޅަށް ކުޅުނު މެޗު ފަސޭހަކަމާއެކު ޖަރުމަނުން ކާމިޔާބުކޮށްފިއެވެ.
ގްރޫޕް އެޗްގައި އިއްޔެ ކުޅުނު މެޗު ޖަރުމަނުން ކާމިޔާބުކޮށްފައިވަނީ ފަސޭހަކަމާއެކު 6-0 ގެ ނަތީޖާއަކުންނެވެ.
މި މެޗު ފަށައިގެން 11 ވަނަ މިނެޓުގައި ޖަރުމަނުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އަލެކްޒެންޑްރާ ޕޮޕްއެވެ. އަދި މެޗިގެ 39 ވަނަ މިނެޓުގައި ޕޮޕް ވަނީ އިތުރު ލަނޑެއް ޖަހައި، ޖަރުމަނުގެ ލީޑު ފުޅާކޮށްދީފައެވެ.
މި މެޗުގެ ދެވަނަ ހާފުގައި ޖަރުމަނުން މޮޅު ކުޅުމެއް ދެއްކިއިރު، މި ހާފު ފަށައިގެން ފުރަތަމަ މިނެޓުގައި ކްލާރާ ބުއެލް ވަނީ އެ ޓީމުގެ ތިންވަނަ ލަނޑު ޖަހައިދީފައެވެ. އަދި ޖަރުމަނުގެ ހަތަރުވަނަ ލަނޑު މެޗުގެ 54 ވަނަ މިނެޓުގައި ފެނިގެންދިޔައިރު، މި ލަނޑަކީ މޮރޮކޯގެ ހަނާން އައިތު އަލް ހާޖް އަތުން ބައިކޮޅަށް ވަން ލަނޑެކެވެ.
އޭގެ ފަހުން މެޗުގެ 79 ވަނަ މިނެޓުގައި ޖަރުމަނުން ފަސްވަނަ ލަނޑެއް ޖެހިއިރު، މި ލަނޑަކީ މޮރޮކޯގެ ޒައިނަބް އަތުން ބައިކޮޅަށް ވަން ލަނޑެކެވެ. މި މެޗުގައި ޖަރުމަނުން ކާމިޔާބުކުރި ހަވަނަ ލަނޑު މެޗުގެ ފަހު މިނެޓުގައި ޖަހައިދިނީ ލެއާ ޝާލާއެވެ.
މި މޮޅާއެކު ޖަރުމަނުން ވޯލްޑް ކަޕުގެ ފެށުން ރަނގަޅުކުރިއިރު، މި މުބާރާތުގައި އެ ޓީމުން ކުޅޭ ދެވަނަ މެޗުގައި އަންނަ ހޮނިހިރު ދުވަހުގެރޭ ނުކުންނާނީ ކޮލަމްބިއާއާ ދެކޮޅަށެވެ.