ނިއު ޒީލެންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕް 2023 ގައި ޕެނަމާ ބަލިކޮށް ބްރެޒިލުން ފެށުން ރަނގަޅުކޮށްފިއެވެ.
ގްރޫޕް އެފްގައި އިއްޔެ ކުޅުނު މެޗު ބްރެޒިލުން ކާމިޔާބުކޮށްފައިވަނީ ފަސޭހަކަމާއެކު 4-0 ގެ ނަތީޖާއަކުންނެވެ.
މި މެޗުގައި އުމުރުން 23 އަހަރުގެ އަރީ ބޯޖެސް ވަނީ ބްރެޒިލަށް ހެޓްރިކެއް ހަދައިދީ، އަނެއް ލަނޑު ޖަހަން ފުރުސަތު ތަނަވަަސްކޮށްދީފައެވެ. އެއާއެކު ބޯޖެސް ވެފައިވަނީ ވޯލްޑް ކަޕެއްގައި ކުޅުނު ފުރަތަމަ މެޗުގައި ބްރެޒިލަށް ހެޓްރިކެއް ހަދައިދިން ފުރަތަމަ ކުޅުންތެރިޔާއަށެވެ.
މި މެޗުގައި ބޯޖެސް ކާމިޔާބުކުރި ފުރަތަމަ ލަނޑު މެޗުގެ 19 ވަނަ މިނެޓުގައި ފެނިގެންދިޔައިރު، އޭނާ ދެވަނަ ލަނޑު ޖަހާފައިވަނީ މެޗުގެ 39 ވަނަ މިނެޓުގައެވެ. އޭގެ ފަހުން މެޗުގެ 48 ވަނަ މިނެޓުގައި ބޯޖެސް ދިން ބޯޅައަކުން ބްރެޒިލުގެ ތިންވަނަ ލަނޑު ޖަހައިދިނީ ބީއާ ޒަނަރެއްޓޯއެވެ. އަދި އެ ޓީމުގެ ފަހު ލަނޑު މެޗުގެ 70 ވަނަ މިނެޓުގައި ކާމިޔާބުކޮށް، ބޯޖެސް ވަނީ ހެޓްރިކް ފުރިހަމަކޮށްފައެވެ.
މި މޮޅާއެކު ބްރެޒިލުން ފެށުން ރަނގަޅުކުރިއިރު، މި މުބާރާތުގައި އެ ޓީމުން ކުޅޭ ދެވަނަ މެޗުގައި އަންނަ ހޮނިހިރު ދުވަހު ނުކުންނާނީ ފްރާންސާ ދެކޮޅަށެވެ.