މި މަހުގެ ފަހުކޮޅު ސްރީ ލަންކާގައި އޮންނަ 101 ވަނަ ލަންކާ ނޭޝަނަލް އެތުލެޓިކްސް ޗެމްޕިއަންޝިޕުގައި ވާދަކުރާ ރާއްޖޭގެ ޤައުމީ އެތުލެޓިކްސް ޓީމު އިޢުލާންކޮށްފިއެވެ.
މި ފަހަރުގެ މުބާރާތުގައި އަންހެން އެތުލީޓުންގެ ޓީމަކާއި ފިރިހެން އެތުލީޓުންގެ ޓީމެއް ވާދަކުރާނެއެވެ. މި ޓީމުގައި ހިމެނެނީ ޖުމްލަ އަށް އެތުލީޓުންނެވެ. އެއީ އަންހެން ހަތަރު އެތުލީޓުންނާއި ފިރިހެން ހަތަރު އެތުލީޓުންނެވެ.
މި މުބާރާތުގައި ރާއްޖެއިން ވާދަކުރާ ފިރިހެން އެތުލީޓުންނަކީ ހުސެއިން ޒީކް ސުއާދާއި، އާދަމް ރިފްއަތާއި، ޒުއިޒް މުޙައްމަދު ސުއާދު އަދި އަބްދުލް ރަޝީދު އިސްމާޢީލެވެ. އަދި މުބާރާތުގައި ރާއްޖެއިން ވާދަކުރާ އަންހެން އެތުލީޓުންނަކީ އައިމިނަތު ލަޔާނާ މުޙައްމަދާއި، ޙައްވާ މުޒްނާ ފާއިޒާއި، އައިޝަތު ނާދު އަސްއަދު ވަޖީހުގެ އިތުރުން ޒިވާ މޫސާ ޝަފީއުއެވެ.
ޒަމާންވީ ލަންކާ ނޭޝަނަލް ޗެމްޕިއަންޝިޕް އޮންނާނީ މި މަހުގެ 28 ވަނަ ދުވަހުން ފެށިގެން ދެ ދުވަހުގެ މުއްދަތަކަށެވެ. މި މުބާރާތް އޮންނާނީ ސުގަތަދާސަ ސްޓޭޑިއަމުގައެވެ.
ލަންކާ ނޭޝަނަލް އެތުލެޓިކްސް ޗެމްޕިއަންޝިޕުގައި ޤައުމީ ޓީމު ވާދަކުރާއިރު، އަންނަ އޯގަސްޓް މަހުގެ 25 އިން ފެށިގެން ސެޕްޓެމްބަރު މަހުގެ ތިންވަނަ ދުވަހުގެ ނިޔަލަށް މަޑަގަސްކަރައިގައި އޮންނަ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަކީ ޤައުމީ އެތުލެޓިކްސް ޓީމުން އެންމެ ދުރާލާ ތައްޔާރުވާ އެއް މުބާރާތެވެ. އެގޮތުން މިދިޔަ ދެ ގޭމްސްގައިވެސް ރަނގަޅު ކާމިޔާބީތަކެއް ހޯދި އެތުލެޓިކްސް ޓޫމުގެ އަމާޒަކީ މިއަހަރު އިތުރު މެޑެލްތަކެއް ހޯދުމެވެ.