ދާދި ފަހުން ނިމުނު ސާފް ޗެމްޕިއަންޝިޕް ފުޓްބޯޅަ މުބާރާތުގައި ނެރުނު ނަތީޖާ ބަލައި ނުގަންނަ ކަމަށް ޤައުމީ ފުޓްބޯޅަ ޓީމުގެ އެސިސްޓަންޓް ކޯޗުގެ މަޤާމު އަދާކުރި ތަޖުރިބާކާރު ކޯޗު އަލީ ސުޒެއިން ބުނެފިއެވެ.
ޤައުމީ ފުޓްބޯޅަ ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯގެ އެއްބަސްވުން އަންނަ މަހު ހަމަވުމުން، ޓީމުގެ ކޯޗުކަން ސުޒެއިނާ ހަވާލުކުރަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީ ނިންމާފައެވެ.
ޓީވީއެމުން ގެނެސްދޭ "ކުޅިވަރު ވިންދު" ޕްރޮގްރާމުގައި ވާހަކަދައްކަމުން ސުޒެއިން ބުނީ ޤައުމީ ޓީމުން އެންމެ ފަހުން ނެރުނު ނަތީޖާ އާއި ކުޅުނު ކުޅުމަށް ބަލާއިރު އެއީ ބަލައިގަނެވެން ނެތް ކަމެއް ކަމަށެވެ. އަދި މުޅި ޓީމާއި، ޓީމު މެނޭޖުކުރަން ތިބި އޮފިޝަލުންވެސް ރާއްޖޭ ރައްޔިތުންނާ ހަމައަށް އެއަށްވުރެ ރަނގަޅު ނަތީޖާއެއް ގެނެސްދޭން ޖެހޭ ކަމަށް ޤަބޫލުކުރާ ކަމަށްވެސް ބުންޏެވެ.
ޕްރޮގްރާމުގައި އިތުރަށް ވާހަކަދައްކަމުން ސުޒެއިން ބުނީ ރާއްޖޭގެ ފުޓްބޯޅައި ވޭތުވެދިޔަ ދެތިން އަހަރުގެ ތެރޭގައި އޮތީ އެންމެ ރަނގަޅު ހާލަތުގައި ނޫން ކަމަށެވެ. އަދި ފުޓްބޯޅައިގެ ކަންކަން ގޯސްކޮށް ދާނަމަ ހަމަނިދިވެސް ރަނގަޅަށް ނުނިދޭ ކަމަށާއި، ފުޓްބޯޅައަށް އަންނަ ކޮންމެ އުފަލަކީ އެނާއަށްވެސް ލިބޭ އުފަލެއް ކަމަށާއި، އަދި ކޮންމެ ނިކަމެތިކަމަކީ އޭނާއަށްވެސް ލިބިގެންދާ ދެރައެއް ކަމަށްވެސް ވަނީ ބުނެފައެވެ.
ސުޒެއިން ބުނީ މިދިޔަ އަހަރުތަކަށް ބަލާއިރު ފުޓްބޯޅައިގައި ހިނގައިދިޔަ ކަންތައްތަކުން މާޔޫސްނުވާ ކަމަށެވެ. އަދި ރާއްޖޭގެ ފުޓްބޯޅަ އުނދަގޫ ހާލަތެއްގައި އޮތްއިރު، އަމިއްލައަށް އެ ހާލަތު ތަޖުރިބާކުރި މީހެއްގެ ހައިސިއްޔަތުން ކުރުވެނު ކަންތައްތަކަށް ބަލާއިރު ލިބުނު ކުރިއެރުން ރަނގަޅު ކަމަށްވެސް ވަނީ ބުނެފައެވެ.
ޤައުމީ ޓީމުގެ ކޯޗުކަމާ ސުޒެއިން ހަވާލުވާއިރު، އޭނާ ވަނީ ޤައުމީ ޓީމުގައި އެންމެ ފަހުން މަސައްކަތްކުރި ދެ ކޯޗުން ކަމަށްވާ މާޓިން ކޫޕްމަން އާއި މޮރިއޭރޯގެ އެސިސްޓަންޓަކަށް މަސައްކަތްކޮށްފައެވެ. އަދި މީގެ ކުރިން ސުޒެއިން ވަނީ 2021 ވަނަ އަހަރު ރާއްޖޭގައި ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތުގައި ޤައުމީ ޓީމަށް އިރުޝާދުދީފައެވެ.
ސީނިއާ ޤައުމީ ފުޓްބޯޅަ ޓީމަށް މި އަހަރު އޮތީ އަންނަ އޮކްޓޯބަރު މަހު ކުޅޭ ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ކޮލިފިކޭޝަނެވެ. އޭގެ ކުރިން ސެޕްޓެމްބަރު މަހުގެ ކުރީކޮޅު ޗައިނާގައި 23 އަހަރުން ދަށުގެ އޭޝިއަން ކަޕް ކޮލިފައިންގައި ޒުވާން ޓީމު ކުޅޭނެއެވެ. ސީނިއާ ޓީމާއި 23 އަހަރުން ދަށުގެ ޓީމުގެ ކަންކަން ދެން ކުރިއަށްގެންދާނީ ކޯޗު ސުޒެއިނެވެ.