އިންޑޮނީޝިޔާގައި ފަސިންޖަރުން އުފުލާ ފެރީއެއް ބަންޑުންޖަހައިލާ އޭގައި ދަތުރުކުރަމުންދިޔަ 15 މީހުން މަރުވެއްޖެއެވެ. މި ހާދިސާ ހިނގާފައި ވަނީ އިންޑޮނީޝިޔާގެ އިރުދެކުނުގައިވާ ސުލަވޭސީ ޕުރޮވިންސް އައްސޭރިފަށުގައެވެ. ފެރީ ފެތިފައި ވަނީ ސުލަވޭސީގެ ވެރިރަށް ކެންދަރީއާ ދުރުނޫން ހިސާބަކަށެވެ.
މި ހާދިސާ ހިނގި ވަގުތު ފެރީގައި ތިބި މީހުންގެ ތެރެއިން ގިނަ ބަޔަކު އަދިވެސް ނުފެންނަ ކަމުގައި އޮފިޝަލުން ވިދާޅުވެއެވެ. މި ހާދިސާ ހިނގާފައި ވަނީ 33 މީހުންނާ އެކު ފެރީ ދަތުރު ކުރަމުން ދަނިކޮށް ރޭގަނޑުގެ ވަގުތެއްގައެވެ. މި ހާދިސާގައި ކަނޑުވެގެން ގެއްލިފައިވާ ކަމަށް ބެލެވޭ މީހުންގެ ހަށިތައް ހޯދަން ސުލަވޭސީގެ އޮފިޝަލުން މިހާރު ދަނީ މަސައްކަތް ކުރަމުންނެވެ. މި މަސައްކަތުގައި ޑައިވަރުންގެ ޓީމުތަކުން ވެސް ހަރަކާތްތެރިވަމުންދާ ކަމުގައި އޮފިޝަލުން ވިދާޅުވެއެވެ.
މި ހާދިސާ ހިނގަން މެދުވެރިވި ސަބަބު ދެނެގަނެވިފައި ނުވާއިރު، ފެރީ ބަންޑުންޖަހައިލި ސަބަބު ދެނެގަތުމަށް އޮފިޝަލުން މިހާރު ދަނީ ތަހުޤީޤު ކުރަމުންނެވެ. މި ހާދިސާ ހިނގާފައި ވަނީ ކެންދަރީ ކައިރީގައި އޮންނަ މުނާ ކިޔާ ރަށަކުން ފުރައިގެން ފެރީ ދަތުރުކުރަން ފެށިތާ ގިނަ އިރުތަކެއް ނުވަނީހެވެ. އެއީ، 20 މިނެޓުގެ ދަތުރެއް ކަމުގައި އޮފިޝަލުން ވިދާޅުވިއެވެ.
އިންޑޮނީޝިޔާއަކީ 17,000 އަށްވުރެ ގިނަ ރަށުގެ މައްޗަށް އުފެދިފައިވާ ޤައުމެކެވެ. އެ ޤައުމުގެ ރަށްތަކުގެ މެދުގައި ދަތުރުފަތުރު ކުރުމަށް އެންމެ ގިނައިން ބޭނުންކުރަނީ ފެރީފަހަރާއި ކުދި ބޯޓުފަހަރެވެ. ނަމަވެސް، އެ ޤައުމުގައި ފެރީގެ ޚިދުމަތް ދޭން ބޭނުންކުރާ ގިނަ އުޅަނދުފަހަރަކީ ސަލާމަތާއި ރައްކާތެރި ކަމުގެ ފިޔަވަޅުތައް އެންމެ ފުރިހަމަކޮށްފައިވާ އުޅަނދުފަހަރު ނޫން ކަން ފާހަގަކުރެވެއެވެ. ހުއްދަ ދީފައިވާ ޢަދަދަށްވުރެ ގިނަ ފަސިންޖަރުން އަރުވައިގެން ދަތުރު ކުރުމަކީ ޢާންމު ކަމަކަށް ވެފައިވާއިރު، އެ ފަދަ ސަބަބުތަކާ ގުޅިގެން ހިނގާ މި ފަދަ ހިތާމަވެރި ހާދިސާތަކުގެ ޢަދަދު އިތުރު ކަން ފާހަގަކުރެވެއެވެ.