ޤައުމީ ފުޓްބޯޅަ ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯގެ އެއްބަސްވުން އަންނަ މަހު ހަމަވުމުން، ޓީމުގެ ކޯޗުކަން މިހާރުގެ އެސިސްޓަންޓް ކޯޗު އަލީ ސުޒެއިނާ ހަވާލުކުރަން ނިންމައިފިއެވެ.
އެކަން ހާމަކުރެއްވީ ޤައުމީ ފުޓްބޯޅަ ދަނޑުގައި މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލެވެ.
މީގެ ކުރިން ސުޒެއިން ވަނީ 2021 ވަނަ އަހަރު ރާއްޖޭގައި ބޭއްވި ސާފް ޗެމްޕިއަންޝިޕް ފުޓްބޯޅަ މުބާރާތުގައި ޤައުމީ ޓީމަށް އިރުޘާދުދީފައެވެ. އެ ފަހަރު ސުޒެއިން ކޯޗުކަން ކުރީ ، އޭރުގެ ޤައުމީ ކޯޗު މާޓިން ކޫޕްމަން މަޤާމުން ވަކިކުރުމާ ގުޅިގެންނެވެ.
ބައްސާމް ވިދާޅުވީ އުމުރުފުރާތަކުގެ ޤައުމީ ޓީމުތަކުގެ ކޯޗިން ޓީމު ދެމި އޮންނާނެ ކަމަށާއި، އެކަމަކު އަންނަ މަހުގެ ނިޔަލަށް ސީނިއާ ޓީމުގެ ކޯޗު މޮރިއޭރޯގެ އެއްބަސްވުން ހަމަވުމުން، އެ މަޤާމާ ދެން ހަވާލުވާނީ މިހާރުގެ އެސިސްޓަންޓް ކޯޗު ސުޒެއިން ކަމަށެވެ. އަދި ރާއްޖެއިން ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ކޮލިފިކޭޝަނަށް އޮކްޓޯބަރު މަހު ނުކުންނާނީ ސުޒެއިނުގެ އިރުޝާދުގެ ދަށުން ކަމަށްވެސް ބައްސާމް ވިދާޅުވިއެވެ.
ބައްސާމް ވިދާޅުވީ، މޮރިއޭރޯގެ އެއްބަސްވުން ހަމަވުމުން އެ މަޤަމަށް އައު ކޯޗެއް ހަމަ ނުޖައްސައި، ސުޒެއިނާއެކު ކޮލިފިކޭޝަން މެޗުތަކަށް ނުކުންނަން ނިންމީ، ޤައުމީ ޓީމު ދެނެގަތުމަށް އައު ކޯޗަކަށް ގިނަ ދުވަސް ނަގާނެތީ ކަމަށެވެ. އެކަމަކު ސުޒެއިނަކީ މިހާރުވެސް ޤައުމީ ޓީމާއެކު މަސައްކަތްކުރާ ކޯޗެއް ކަމުން، އޭނާއަށް އިތުބާރު އެބައޮތް ކަމަށްވެސް ބައްސާމް ވިދާޅުވިއެވެ.
މޮރިއޯރޭގެ އެއްބަސްވުން ހަމަވާއިރު، ޤައުމީ ޓީމާ އޭނާ ހަވާލުވީ 2021 ވަނަ އަހަރުގެ އޮކްޓޯބަރު މަހުގެ ފަހުކޮޅުގައެވެ. ޤައުމީ ޓީމުގެ ކޯޗުކަމާ މޮރިއޭރޯ ހަވާލުވި ފަހުން ރާއްޖެއިން ވަނީ ޖުމްލަ 15 މެޗު ކުޅެފައެވެ. އޭގެ ތެރެއިން ހަތް މެޗުން ރާއްޖެ ބަލިވެފައިވާއިރު، ހަ މެޗުން ރާއްޖެ ވަނީ މޮޅުވެފައެވެ. އަދި އަނެއް ދެ މެޗު ނިމުނީ އެއްވަރުވެގެންނެވެ.