އަންނަ އޯގަސްޓް މަހު ރާއްޖޭގައި ބާއްވާ އައިބީސީ ވޯލްޑް ޓުއާގެ "ވިޒިޓް މޯލްޑިވްސް ޕްރޯ 2023" ގައި ވާދަކުރާ ރާއްޖޭގެ ޤައުމީ ބޮޑީބޯޑީން ޓީމުގައި ހިމެނޭ އެތުލީޓުން އިޢުލާންކޮށްފިއެވެ.
"ޕީއެސްއެމް ސްޕޯޓްސް" އަށް މައުލޫމާތުދެމުން މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ބުނީ މި މުބާރާތުގައި ރާއްޖެއިން މި އަހަރު ޖުމްލަ 14 އެތުލީޓަކު ވާދަކުރާނެ ކަމަށެވެ.
އޭގެތެރޭގައި ރާއްޖޭގައި މުބާރާތް ބާއްވާތީ ލިބޭ ފްރީ ޕާސް ލިބޭ އެތުލީޓުންނާއި, ވައިލްޑް ކާޑް އެންޓްރީގެ ގޮތުގައި ޖާގަ ލިބޭ އެތުލީޓުން ހިމެނެއެވެ. ރާއްޖެއިން ވައިލްޑް ކާޑް ލިބުނު ދެ އެތުލީޓުންނަކީ ފިރިހެން ބައިން އަލީ ޚުޝްރުވާން އަޙްމަދު (ކުޑަ އައްޔަ) އާއި ޖޫނިއާ ބައިން އާމިން އުމަރު މޫސާއެވެ. އެ ދެ އެތުލީޓުންވެސް ވާދަކުރާނީ ސީޑްކޮށްފައިވާ ބޮޑީބޯޑަރުންނާއެކު ގަދަ 32 އާ ހިސާބުންނެވެ.
މީގެ އިތުރުން ކޮންމެ ކެޓަގަރީއަކުން ހަތަރު އެތުލީޓަކަށް އެމްބީބީއޭއިން ވަނީ ފްރީ ޕާސް ދީފައެވެ. ފިރިހެން ބައިން ފްރީ ޕާސް ލިބުނީ ކުޑަ އައްޔަ އާއި، އާމިން އާއި، އަޝްރަފް ހަސަން އަދި އަލީ ޖާވިދު އަށެވެ. އަދި ޖޫނިއާ ބައިން ފްރީ ޕާސް ލިބުނީ އާމިން އާއި، އިޔާން އަޙްމަދާއި، މުޙައްމަދު ޖަރީޝް ޖިހާދު އަދި މުޙައްމަދު ކައިފް އަށެވެ.
އެމްބީބީއޭގެ ޖެނެރަލް ސެކްރެޓަރީ ހަަސަން ރަޝީދު (ރަޝް) ވިދާޅުވީ މި އެތުލީޓުންނަށް ފްރީ ޕާސް ދިނުމުގައި އެމްބީބީއޭއިން ބަލާފައިވަނީ އެންމެ ފަހުން ނިމުނު ބުރުނު ޝިކާރު ޗެލެންޖުގެ ނަތީޖާތަކާއި ޤައުމީ ޓީމުގެ ރޭންކިންއަށް ކަމަށެވެ.
މި އެތުލީޓުންގެ އިތުރުންވެސް ރާއްޖޭގެ އިތުރު ބޮޑީބޯޑަރުން ވަނީ މިހާތަނަށް މުބާރާތުގައި ރަޖިސްޓްރީވެފައެވެ. ދުރާލާ ގިނަ އެތުލީޓުންތަކެއް މި މުބާރާތަށް ތައްޔާރުވާއިރު، ދުނިޔޭގެ ފެންވަރުގެ އެތުލީޓުންތަކެއް މިއަހަގެ މުބާރާތުގައިވެސް ވާދަކުރާނެއެވެ.