އަންނަ އަހަރުގެ އެއަރ ސަރވިސް ވޯލްޑް ކޮންގްރެސް ބޭއްވުމުގެ ފުރުސަތު ވީއައިއޭއަށް

އަންނަ އަހަރު ބޭއްވުމަށް ހަމަޖެހިފައިވާ އެއަރ ސަރވިސް ވޯލްޑް ކޮންގްރެސް 2024 ބޭއްވުމުގެ ފުރުސަތު ވެލާނާ އިންޓަރނޭޝަނަލް އެއަރޕޯޓަށް ލިބިއްޖެއެވެ. މިއީ އޭވިއޭޝަން ދާއިރާއިން، ބައިނަލްއަޤްވާމީ، މިފަދަ ޝަރަފްވެރި އަދި ބޮޑު ހަރަކާތެއް ރާއްޖޭގައި ބާއްވާ ފުރަތަމަ ފަހަރެވެ. މިކަން އިއުލާންކޮށްފައިވަނީ އެމެރިކާގެ ސެންފްރެންސިސްކޯގައި މިމަހު ކުރިއަށްދިޔަ މިއަހަރުގެ ކޮންގްރެސް އިވެންޓްގެ ތެރެއިންނެވެ.

މިއަހަރުގެ އެއަރ ސަރވިސް ވޯލްޑް ކޮންގްރެސް އިވެންޓުގައި މޯލްޑިވްސް އެއަރޕޯޓްސް ކޮންޕެނީ ލިމިޓެޑް އެމް.އޭ.ސީ.އެލްގެ ސީއީއޯ އަދި އެމްޑީ މަހްޖޫބު ޝުޖާއު ވަނީ ބައިވެރިވެވަޑައިގެންފައެވެ.

އަންނަ އަހަރުގެ ޖުލައި މަހު ބޭއްވުމަށް ހަމަޖެހިފައިވާ މިކޮންގްރެސްގެ ތެރެއިން ދުނިޔޭގެ އެކިކަންކޮޅުތަކުގެ އޭވިއޭޝަން ދާއިރާގެ މަންދޫބުންގެ މެދުގައި މަޝްވަރާތައް ކުރެވި، ދުނިޔޭގެ ވައިގެ ޚިދުމަތުގެ ކުރިއެރުމާ ބެހޭގޮތުން މަޝްވަރާ ކުރުމަށް ޕްލެޓްފޯމެއް ލިބިގެންދާނެ ކަމަށް އެމްއޭސީއެލްއިން ބުނެއެވެ. އިންޑިއާ ކަނޑު ދުނިޔޭގެ އެކި ހިސާބުތަކަށް ގުޅުވާލަދޭ، މައި ހަބެއްގެ ހައިސިއްޔަތުން، ދިވެހިރާއްޖެގައި އޭވިއޭޝަން އިންޑަސްޓްރީގެ ވާހަކަތައް ދެއްކުމަށް މަގުފަހިކޮށްދިނުމަކީ ވެލާނާ އިންޓަރނޭޝަނަލް އެއަރޕޯޓަށް ލިބުނު ޝަރަފެއްކަމަށް އެ ކުންފުނިން ދެކެއެވެ.

ރާއްޖޭގައި ބާއްވާ މިކޮންގްރެސްގެ ތެރެއިން، ކޮންގްރެސްގެ ބައިވެރިންނަށް ވައިގެ ޚިދުމަތްދިނުމުގެ ދާއިރާގެ މަސައްކަތުގެ ތަޖުރިބާ ހިއްސާކުރުމުގެ ފުރުސަތުފަހިވެގެން ދިއުމުގެ އިތުރުން، ދާއިރާގައި މަސައްކަތްކުރާ ފަރާތްތަކައި ގުޅުން ބަދަހިކުރުމަށްވެސް މަގުފަހިވެގެންދާނެއެވެ. އަދި މި މުޢާމަލާތްތަކުގެ ސަބަބުން، ރާއްޖޭގެ ބައިނަލްއަޤްވާމީ ވައިގެ ބަނދަރުތަކަށް ދަތުރުކުރާނެ އެއަރލައިންތައް އިތުރުކުރުމަށް އެހީތެރިކަން ލިބިގެންދާނެއެވެ. މިއާއިއެކު ރާއްޖޭގެ ފަތުރުވެރިކަމާއި އިޤްތިސާދަށް އަދި މުޅި ވައިގެ ޚިދުމަތް ކުރިއެރުމަށް އާ ވިސްނުންތަކާއި، އީޖާދީ ގޮތްތައް ހޯދުމުގެ މަގުތައް ފަހިވެގެންދާނެއެވެ.

މި ކޮންގްރެސް މެދުވެރިކޮށް ރާއްޖޭގެ ހިތްގައިމު ގުދުރަތީ ރީތިކަން ތަޖުރިބާކުރުމުގެ ފުރުޞަތު މަންދޫބުންނަށް ފަހިވެގެންދާއިރު، ދިވެހިރާއްޖޭގެ ރަށްތަކުގެ ރީތިކަން އަމިއްލައަށް ވަޒަންކުރުމުގެ ފުރުސަތުވެސް ލިބިގެންދާނެއެވެ. އެހެންކަމުން މިއީ ރާއްޖޭގެ ފަތުރުވެރިކަން އިޝްތިހާރުކުރުމަށްވެސް ލިބިގެންދާ ފަހި ފުރުސަތެއްކަމަށް އެމްއޭސީއެލްއިން ބުނެއެވެ.

މި ކޮންގްރެސް ބޭއްވުމުގެ ފުރުސަތު ވީ.އައި.އޭ އަށް ލިބުމާ ގުޅޭގޮތުން ވެލާނާ އިންޓަރނޭޝަނަލް އެއަރޕޯޓް ހިންގަމުން އަންނަ އެމް.އޭ.ސީ.އެލްގެ ސީ.އީއޯ އަދި މެނޭޖިން ޑިރެކްޓަރ މަހްޖޫބު ޝުޖާއު ވިދާޅުވީ، މި ހަރަކާތުގެ ތެރެއިން އޭވިއޭޝަން ދާއިރާގެ ކުރިއެރުމަށް އެ ކުންފުނިން ކުރާ މަސައްކަތަށް އަލިއަޅުވާލެވިގެންދާނެކަމަށެވެ. އެގޮތުން އައު ސީޕްލޭން ޓާމިނަލް ތަރައްގީ ކުރުން ފަދަ ޕްރޮޖެކްޓްތަކުން ފެށިގެން އައު ކޯޑް އެފް ރަންވޭއެއް އެޅުމާއި އެހެނިހެން ވަސީލަތްތަކާއެކު، ފަސިންޖަރުންނާއި އެއަރލައިންތަކުގެ ބޭނުންތައް ފުއްދުމަށްޓަކައި އެ ކުންފުނިން ކުރަމުންދާ މަސައްކަތްތައް އޭނާ ފާހަގަކުރެއްވިއެވެ.

"މި ކޮންގްރެސްގެ ސަބަބުން މިކުރިއެރުންތައް ދައްކުވައިދީ، ބައިނަލްއަޤްވާމީ އެއަރލައިންތަކާއެކު ގުޅުން ބަދަހިކުރުމަށް އަގުހުރި ފުރުޞަތުތައް ލިބިގެންދާނެ. އަޅުގަނޑު ގަބޫލުކުރާ ގޮތުގައި އެއަރ ސަރވިސް ވޯލްޑް ކޮންގްރެސް 2024 ގެ ސަބަބުން ވެލާނާ އިންޓަނޭޝަނަލް އެއަރޕޯޓުގެ ކުރިއެރުމުގެ ވާހަކައިގެ އައު ބާބެއް އުފެދި، މި ސަރަހައްދުގެ ލީޑިން އެއަރޕޯޓް އޮޕަރޭޓަރެއްގެ ހައިސިއްޔަތުން އަޅުގަނޑުމެންގެ މަގު އިތުރަށް ހަރުދަނާވެގެންދާނެ." މަހްޖޫބް ވިދާޅުވިއެވެ.

މި ކޮންގްރެސް އަކީ ކާމިޔާބު ކޮންގްރެސް އަކަށް ހެދުމަށް އެމްއޭސީއެލް އިން އަންނަނީ ތައްޔާރުވަމުންނެވެ. މި ކޮންގްރެސް އޮންނާނީ އަންނަ އަހަރު ޖުލައިމަހުގެ ތެރޭގައިއެވެ.