ނިމިދިޔަ ސާފް ޗެމްޕިއަންޝިޕް ފުޓްބޯޅަ މުބާރާތުގައި ދެއްކި ކުޅުމަށް ބެލުމަށްފަހު ރާއްޖެއަކީ ފަސޭހައިން ބަލިކުރެވޭނެ ޓީމެއް ކަމަށް މި ވަގުތު ބުނެވިދާނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ފުޓްބޯޅައިގެ ހާލަތާ ގުޅޭ ގޮތުން ޤައުމީ ފުޓުބޯޅަ ދަނޑުގައި މިދިޔަ ހަފުތާގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ބައްސާމް ވިދާޅުވީ ފުޓްބޯޅައިގެ ކަންކަން ބަދަލުކުރުމަށް ގިނަ މަސައްކަތްތަކެއް ކުރައްވާނެ ކަމަށެވެ. އެކަމަކު އެކަމަށް އޮތް ގޮންޖެހުމަކީ މާލީ ގޮތުން އެފްއޭއެމް އަޑިއަޅާލާފައި އޮތް އޮތުން ކަމަށް ބައްސާމް ވިދާޅުވިއެވެ.
ސާފް ޗެމްޕިއަންޝިޕް ފުޓްބޯޅަ މުބާރާތުގެ ތެރޭގައި އޮތް ނޫސްވެރިންގެ ބައްދަލުވުމެއްގައި ވާހަކަ ދައްކަމުން އިންޑިއާގެ ކެޕްޓަން ސުނިލް ޗެތުރީ ވަނީ މީގެ ހަތަރެއް ނޫނީ ފަސްވަރަކަށް އަހަރު ކުރިން ރާއްޖެއަކީ ބަލިކުރަން އުނދަގޫ ޓީމެއް ކަމަށް ބުނެފައެވެ. އެކަމަކު މިހާރުގެ ހާލަތަށް ބަލާއިރު ސަރަޙައްދުގައި ނޭޕާލް އަދި ބަންގްލަދޭޝްގެ ފުޓްބޯޅަ ކުރިއަރާފައިވާ ކަަމަށްވެސް ޗެތުރީ ވަނީ ބުނެފައެވެ.
އެކަމާ ގުޅިގެން ބައްސާމް ވިދާޅުވީ މިހާރުގެ ހާލަތައް ބަލާ ކަމަށް ވަނީނަމަ ޗެތުރީއާ އެއްބަސްވެވޭ ކަމަށާއި، މި ނިމުނު މުބާރާތުގެ ކުޅުމަށް ބަލާނަމަ ރާއްޖެއަކީ ބަލިކުރަން ފަސޭހަ ޓީމެކޭ ބުނެވިދާނެ ކަމަށެވެ.
ބައްސާމް ވިދާޅުވީ ސަރަޙައްދުގެ ޓީމުތަކާ ކުޅޭއިރު، ރާއްޖެއަށް މެޗަކުން ބަލިވިޔަސް ބައެއް ޓީމުތަކަކީ އަބަދުވެސް ބަލިކުރެވޭނެކަން ޔަގީން ޓީމުތަކެއް ކަމަށެވެ. އެގޮތުން ބަންގްލަދޭޝް ބަލިކުރެވޭނެކަމުގެ ޔަގީންކަން އޮންނަ ކަމަށް ބައްސާމް ވިދާޅުވިއެވެ. މިސާލެއްގެ ގޮތުން ބައްސާމް ނެގީ، 2021 ވަނަ އަހަރު ސްރީ ލަންކާގައި ކުރިއަށްދިޔަ ފޯ ނޭޝަން ކަޕުގައި ރާއްޖެ ބަންގްލަދޭޝް އަތުން ބަލިވެފައި، އޭގެ ދުވަސްކޮޅެއް ފަހުން ރާއްޖޭގައި ބަންގްލަދޭޝް އާއި ރާއްޖެ ބައްދަލުކުރި އެކުވެރިކަމުގެ މެޗެވެ.
މި މަހު ނިމުނު ސާފް ޗެމްޕިއަންޝިޕް ފުޓްބޯޅަ މުބާރާތުގެ ގްރޫޕް ސްޓޭޖުން ރާއްޖެ ވަނީ ކަޓާފައެވެ. މިއީ ސާފް ޗެމްޕިއަންޝިޕް ފުޓުބޯޅަ މުބާރާތުގެ ތާރީޚުގައި ރާއްޖެއިން ގްރޫޕް ސްޓޭޖުން ކެޓި ފުރަތަމަ ފަހަރެވެ.