ފުރަތަމަ ޑިވިޝަނުގައި ވާދަކުރާ ކުލަބަތަކަށް އެއްވެސް މީހަކަށް ފާޑެއް ނުކިޔޭނެ ކަމަށް ޤައުމީ ފުޓްބޯޅަ ޓީމުގެ އެސިސްޓަންޓް ކޯޗު އަލީ ސުޒެއިން ބުނެފިއެވެ.
ޓީވީއެމުން ގެނެސްދޭ "ކުޅިވަރު ވިންދު" ޕްރޮގްރާމުގައި ވާހަކަދައްކަމުން ސުޒެއިން ވަނީ ފުރަތަމަ ޑިވިޝަނުގައި ކުޅޭ ކުޅުންތެރިންގެ ކެތްތިރެކަން ފާހަގަކޮށް، ވޭތުވެދިޔަ ތިން އަހަރު އެ ކުޅުންތެރިން ވީ ބޮޑު ގުރުބާނީ ފާހަގަކޮށްފައެވެ.
ސުޒެއިން ބުނީ ކޮވިޑް ތެރޭގައި ހިންގުނު ފުޓްބޯޅަ ހަރަކާތްތައް ގިނަ ކަމަށާއި، އާންމު ހާލަތުގައި ނުހިންގާ ވަރަށް ކޮވިޑުގެ ތެރޭގައި ފުޓްބޯޅައަގެ ހަރަކާތްތައް ހިންގުނު ކަމަށެވެ. އެގޮތުން އޭނާ ވަނީ ބެއެއް މިސާލުތައް ޕްރޮގްރާމުގައި ފާހަގަކޮށްފައެވެ.
ފުރަތަމަ ޑިވިޝަނުގެ އެންމެ ކާމިޔާބު ކޯޗުގެ ގޮތުގައި ފާހަގަކޮށްލެވޭ ސުޒެއިން ބުނީ އަބަދުވެސް އޭނާގެ ހިތުގައި ދިވެހި ކުޅުންތެރިންނަށް ޚާއްސަ ލޯތްބަކާއި އިޙުތިރާމެއް އޮންނާނެ ކަމަށެވެ. އަދި އެ އުނދަގޫ ހާލަތުގައި ފުޓްބޯޅަ ކުރިއަށް ގެންދެވުނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ މުވައްޒަފުންނާއި، ކުޅުންތެރިންނާއި، ކޯޗުންގެ އިތުރުން ސުކޫލްތަކުގެ ބެލެނެވެރިން ދިން އެއްބާރުލުމުގެ ސަބަބުންކަން ފާހަގަކުރިއެވެ.
ސުޒެއިން ބުނީ ރާއްޖޭގެ ފުޓްބޯޅަ ވަރަށް އުނދަގޫ ހާލަތެއްގައި ވަނިކޮށް ފުރަތަމަ ޑިވިޝަނުގެ އަށް ކުލަބުން ފުޓުބޯޅަ ހިމާޔަތްކޮށް، ކުރިއަށް ގެންދަން ކުރި މަސައްކަތް ރާއްޖޭގެ ކުޅިވަރަށް ލޯބިކުރާ އެއްވެސް ބޭފުޅަކަށް އޮޅިފައި ނޯންނާނެ ކަމަށެވެ.
"މާލީގޮތުން ބޮޑެތި ކުންފުނިތައް އުނދަގޫ ހާލަތަކަށް ވެއްޓުނުއިރު، ފައިސާގެ ގޮތުން ބައިވަރު ދަތިތެކެއް ހުރިއިރު، މި ކުލަބުތަކުން ރާއްޖޭގެ ފުޓްބޯޅައިގައި ކުރި ހިތްވަރަކީ ރާއްޖޭގެ ބޮޑެތި ކުލަބުތަކުން ފުޓްބޯޅައަށް ދިން ކޮމިޓްމެންޓާ އެއްވަރުގެ ކަމެއް.އަލީ ސުޒެއިން
ރާއްޖޭގެ ފުޓްބޯޅަ ދެމިއޮތުމުގެ އެންމެ ބޮޑު ސަބަބަކީ މިވަގުތު ފުރަތަމަ ޑިވިޝަނުގައި އޮތް އަށް ކުލަބުން ކުރި މަސައްކަތް ކަމަށް ސުޒެއިން ވަނީ ފާހަގަކޮށްފައެވެ.
ދިވެހި ފުޓްބޯޅައިގެ ފޯރި ކެނޑި ނަތިޖާތައް ގޯސްވުމުގެ ސަބަބުން، އަލުން އެ ފޯރި ގެނައުމައްޓަކައި ވަނީ "ސޭވް އެފްއޭމް" ނަމުގައި ހަރަކާތެއް ފަށާފައެވެ. ސުޒެއިން ވަނީ އެ ހާރާތުގެ މިސްރާބެއް ނެތް ކަމަށް ބުނެ ސުވާލު އުފައްދާފައެވެ.