ދިވެހި ފުޓްބޯޅައަށް އިންޤިލާބީ ބަދަލެއް ގެނައުމުގެ ދުރު ރާސްތާ ޕްލޭނަކާއެކު، ޤައުމީ ފުޓްބޯޅަ ޓީމުގެ ކުރީގެ މެނޭޖަރު އަލީ ވަހީދު (ބަލަކް) ގެ "އެޓޯލްސް ފުޓްބޯޅަ ކުލަބު" ރަސްމީކޮށް ލޯންޗުކޮށްފިއެވެ.
އިނގިރޭސިވިލާތުގައި ހުންނަވައި ފުޓްބޯޅަ ކޯޗިންގެ ގިނަ މަސައްކަތްތަކެއް ކުރެއްވުމަށްފަހު ކުރީގެ ފަތުރުވެރިކަމާ ބެހޭ ވަޒީރު އަލީ ވަހީދު އެނބުރި މާލެ ވަޑައިގަތީ މި މަހުގެ 11 ވަނަ ދުވަހެވެ. އެ ދުވަހު މާލެ ވަޑައިގެން އަލީ ވަހީދު ވަނީ އޭނާގެ އެންމެ ބޮޑު ފޯކަސް އޮތީ ފުޓްބޯޅައަށް ކަމަށް ވިދާޅުވެފައެވެ.
ބުރާސްފަތި ދުވަހުގެރޭ ހިރިޔާ ސްކޫލުގައި ބޭއްވި ޚާއްސަ ހަފުލާއެއްގައި އެޓޯލްސް އެފްސީ ލޯންޗުކުރިއިރު، މި ހަފުލާގައި ރާއްޖޭގެ ކުރީގެ މަޝްހޫރު ފުޓުބޯޅަ ކުޅުންތެރިންނާއި، މިހާރުގެ ކުޅުންތެރިންގެ އިތުރުން ފުޓުބޯޅަ ޚިދުމަތްތެރިންވެސް ވަނީ ބައިވެރިވެފައެވެ.
އެޓޯލްސް އެފްސީ ލޯންޗުކުރުމަށް ބޭއްވި ހަފުލާގައި އަލީ ވަހީދު ވަނީ އެ ކުލަބުގެ އަމާޒުތައް ޙިއްސާކޮށްފައެވެ. އެގޮތުން އެ ކުލަބުގެ ފުރަތަމަ އެއް އަހަރު ދުވަހުގެ އަމާޒަކީ، ބައިނަލްއަޤުވާމީ ނެޓުވޯކެއްގައި ކުލަބު ހިމެނުމެވެ. އަދި ތިން އަހަރު ދުވަހުގެ ތެރޭގައި ރާއްޖޭގެ ކޮންމެ ރަށެއްގައި އެޓޯލްސް އެފްސީގެ ވިޔުގަ ޤާއިމުކުރުމަށްވެސް ވަނީ އަމާޒުހިފާފައެވެ.
މީގެ އިތުރުން ކުރިއަށް އޮތް ފަސް އަހަރުގެ ތެރޭގައި އެޓޯލްސް އެފްސީން ރާއްޖޭގެ ޗެމްޕިއަންކަން ހޯދުމަށް އަމާޒުހިފާފައިވާއިރު، 10 އަހަރުގެ ތެރޭގައި އޭއެފްސީ ކަޕުގެ ޗެމްޕިއަންކަން ހޯދުންވެސް ވަނީ އަމާޒެއްގެ ގޮތުގައި ކަނޑައަޅާފައެވެ.
އަދި ކުރިއަށް އޮތް 15 އަހަރުގެ ތެރޭގައި ޤައުމީ ޓީމަށް އައު ޖީލެއް ބިނާކުރުން ހިމަނާފައިވާއިރު، 20 އަހަރުގެ ތެރޭގައި ފީފާ ވޯލްޑް ކަޕަށް ދިވެހިރާއްޖެ ކޮލިފައިވުންވެސް ވަނީ މި އަމާޒުތަކުގެ ތެރޭގައި ހިމަނާފައެވެ.
އަލީ ވަހީދަކީ ރާއްޖޭގެ އެންމެ ކާމިޔާބު ކުލަބު ކަމަށްވާ ނިއު ރޭޑިއަންޓް ސްޕޯޓްސް ކުލަބުގެ މެނޭޖަރު ކަމާއި، ޤައުމީ ފުޓްބޯޅަ ޓީމުގެ މެނޭޖަރުކަމުގެ މަޤާމު އަދާކުރައްވާފައިވާ ބޭފުޅެކެވެ. އަދި އެއަށްފަހު ނިއު ރޭޑިއަންޓުގެ ޗެއާމަންކަމާ ހަވާލުވިއިރު، އޭނާގެ ދައުރުގައި އެ ކުލަބުން ވަނީ ގިނަ ކާމިޔާބީތަކެއް ހޯދާފައެވެ.