އިންޓަރނޭޝަނަލް ކްރިކެޓް ކައުންސިލް (އައިސީސީ) އިން ރާއްޖޭގެ ކުރީގެ ކްރިކެޓް ކުޅުންތެރިޔާ މުޙައްމަދު ނާސިރު (ނާބެ) އަށް، އެ އިދާރާއިން ދޭ ލޯންގް ސަރވިސް އެވޯޑް އަރުވައިފިއެވެ.
ދިވެހި ކްރިކެޓަށް ދިގު މުއްދަތެއް ވަންދެން ނާބެ ޚިދުމަތްކޮށްދީފައިވާއިރު، އައިސީސީގެ ލޯންގް ސަރވިސް އެވޯޑް ދީފައިވަނީ ވަނީ ނާބެ ކްރިކެޓަށް ޚިދުމަތްކޮށްދިނުމަށް ހޭދަކުރި މުއްދަތަށެެވެ. ލޯންގް ސަރވިސް އެވޯޑް ދެނީ ކްރިކެޓުގެ ޚިދުމަތުގައި ވިއްސަށްވުރެ ގިނަ އަހަރުވުމުންނެވެ.
ނާބެގެ އަގުވަޒަންކޮށްފައިވަނީ ދެކުނު އެފްރިކާގައި އޮތް އައިސީސީގެ އަހަރީ ކޮންގްރެސްގައެވެ. ނާބެގެ ފަރާތުން އެވޯޑާއި ހަވާލުވެވަޑައިގަތީ ރާއްޖޭގެ ކްރިކެޓް ބޯޑުގެ ރައީސް މުޙައްމަދު ފައިސަލެވެ.
ކުޅިވަރު ތާރީޚުގައި 1960 ގެ އަހަރުތަކުގެ ތެރެއިން ހޮކީ އާއި، ފުޓްބޯޅަ އާއި، ކްރިކެޓާއި އެނޫންވެސް ކުޅިވަރުތައް ކުޅުއްވި ނާބެއަކީ މިދިޔަ ފަންސާހަކަށް އަހަރު ދުވަހުގެ ތެރޭގައި ރާއްޖޭގެ ކުޅިވަރުގެ ބޮޑު ޝަޚުސިއްޔަތެކެވެ. މީގެއިތުރުން 1970 ގެ ތެރޭގައި ކުޅިވަރު ކުލަބެއް އުފެއްދުމުގައިވެސް ހަރަކާތްތެރިވެފައިވެއެވެ.
ކްރިކެޓް ބޯޑް އޮފް މޯލްޑިވްސްއިން ހާމަކޮށްފައިވާ ގޮތުގައި ނާބެގެ ޚިދުމަތުގެ އަގުވަޒަންކޮށް ދިން މި އެވޯޑް އެރުވުމަށް ޚާއްސަ އިވެންޓެއް ބޭއްވުމަށް ވަނީ ހަމަޖެހިފައެވެ.