އެމްޑަބްލިއުއެސްސީ ދިވެހި ޕްރިމިއަރ ލީގުގައި ކުލަބު ވެލެންސިއާ އަތުން މޮޅުވި މެޗުގައި ކުޅުންތެރިން ދެއްކި ކުޅުމާ ދޭތެރޭ ވަރަށް ހިތްހަމަޖެހޭ ކަމަށް ސުޕަ ޔުނައިޓެޑް ސްޕޯޓްސް (ސަސް) ގެ ކޯޗު އިސްމާޢީލް މަހަފޫޒް (އިންމަ) ބުނެފިއެވެ.
މެޗަށްފަހު ވާހަކަދައްކަމުން އިންމަ ބުނީ ވެލެންސިއާއާ ދެކޮޅަށް ނުކުތީ އެންމެ އަޒުމެއްގައި ކަމަށާއި، އެއީ ތިން ޕޮއިންޓު ހޯދުން ކަމަށެވެ. އަދި މެޗުގައި ޓީމުގެ ފަރާތުން ރަނގަޅު ކުޅެމެއް ފެނިގެން ދިޔައިރު، ތިން ޕޮއިންޓާއެކު ނިންމާލުމުން ލިބުނު ހިތްހަމަޖެހުން ބޮޑު ކަމަށްވެސް އިންމަ ބުނިއެވެ.
އިންމަ ބުނީ ސަސްގެ ކުޅުންތެރިން ދެއްކި ކުޅުމަށް ބަލާއިރު, އެ ޓީމުން ވަރަށް ކޮންފިޑެންސް އާއެކު ކުޅުނު ކަމަށެވެ. އަދި މެޗުގައި އޭނާއަށް ލިބިގެން ދިޔަ އެންމެ ބޮޑު ހިތްހަމަޖެހުމަކީ ދަނޑު މަތީގައި ކުޅުންތެރިން ދެއްކި ކުޅުމާ އެއްވަރަށް, އެ ޓީމުން މެޗުގައި ޑޮމިނޭޓް ކޮށްގެން ކުޅުނުކަން ކަމަށްވެސް ބުންޏެވެ.
ލީގުގައި ވެލެންސިއާއާ ވާދަކޮށް ސަސް ކުރިހޯދީ ފަސޭހަކަމާއެކު 5-0 ގެ ނަތީޖާއަކުންނެވެ. މިމި މެޗުގައި ސަސްގެ އަލީ ނަސޫހް ރަޝީދާއި އަޙްމަދު ހުސާމް ވަނީ ކޮންމެ ކުޅުންތެރިއަކު ދެ ލަނޑު ކާމިޔާބުކޮށްފައެވެ. އަދި މި މޮޅާއެކު ސަސްއިން ވަނީ ކުޅުނު ފަސް މެޗުގެ ތެރެއިން ތިން މެޗު ކާމިޔާބުކޮށް ތާވަލުގެ ތިންވަނައަށް ކުރިއަށް ޖެހިލާފައެވެ.