އެމްޑަބްލިއުއެސްސީ ދިވެހި ޕްރިމިއަރ ލީގުގައި ޓީސީ ސްޕޯޓްސް ކުލަބާ ދެކޮޅަށް ނުކުންނައިރު އޮތް އެންމެ ބޮޑު ގޮންޖެހުމަކީ އަމިއްލަ ސަބަބަކާ ހުރެ މުހިންމު ދެ ކުޅުންތެރިއަކަށް ނުކުޅެވުން ކަމަށް ކުލަބު ގްރީން ސްޓްރީޓްސްގެ ކޯޗު އަލީ ނިސްތާރު މުޙައްމަދު ބުނެފިއެވެ.
މިރޭ ޓީސީއާ ދެކޮޅަށް ކުޅެން އޮތް މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ނިސްތާރު ބުނީ ގްރީންގެ ސްޓައިކަރަކާއި، ޑިފެންޑަރު އިބްރާހީމް ހަސީބަށް އޮފީސް މަސައްކަތެއްގައި އުޅޭތީ ނުކުޅެވޭނެ ކަމަށެވެ. އެކަމަކު ގްރީންއަށް އޮތް އެންމެ ބޮޑު ހިތްހަމަ ޖެހުމަކީ އެ ކުޅުންތެރިންގެ ބަދަލުގައި އަރާ ކުޅުންތެރިންނަކީވެސް ދަނޑުމަތީގައި 100 އިންސައްތަ ދޭ ކުޅުންތެރިން ކަމުގައިވުން ކަމަށެވެ.
ނިސްތާރު ބުނީ ލީގުގައި ގްރީންއިން އެންމެ ފަހުން ކުޅުން މެޗަށްފަހު މި މެޗަށް އެންމެ އެކަށީގެންވާ ވަރަށް ތައްޔާރުނުވެވޭކަން ފާހަގަކޮށްފައެވެ. އެއީ މިހާރު ގިނަ ކުޅުންތެރިން އަންނަނީ ކުލަބް މޯލްޑިވްސް ފުޓްސަލް މުބާރާތުގެ އިތުރުން އަތޮޅު ތެރޭގައި ކުރިއަށްދާ މުބާރާތްތައް ކުޅެމުންނެވެ. އަދި ކުޅުންތެރިން މެޗަށް ޓީމާ ގުޅެނޭ އެންމެ ފަހު ވަގުތުގައި ކަމަށް ނިސްތާރު ފާހަގަކުރިއެވެ.
ޓީސީ މެޗަށް ނުކުންނައިރު، ގްރީންއިން އޮތީ ކުޅުނު ހަތަރު މެޗުން ލިބުނު ތިން ޕޮއިންޓާއެކު ލީގު ތާވަލުގެ ހަތް ވަނައިގައެވެ. އަދި ޓީސީ އޮތީ ކުޅުނު ހަތަރު މެޗުން ލިބުން ހަތަރު ޕޮއިންޓާއެކު ފަސް ވަނައިގައެވެ.
ދިވެހި ޕްރިމިއަރ ލީގުގައި ގްރީން އާއި ޓީސީ ބައްދަލުކުރާ މެޗު ފަށާނީ މިރޭ 21:00 ގައެވެ.