އެމްޑަބްލިއުއެސްސީ ދިވެހި ޕްރިމިއަރ ލީގުގައި މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ނުކުންނަނީ ކޮންމެ ވަގުތެއްގައިވެސް ނަތީޖާ އެނބުރިދާނެކަން ދަނެގެން ކަމަށް ބުރު ސްޕޯޓްސް ކުލަބުގެ ކޯޗު މުޙައްމަދު ނިޒާމް (ނިޒާމްބެ) ބުނެފިއެވެ.
ޕްރެޒިޑެންޓްސް ކަޕުގެ ޗެމްޕިއަން ހޯދި މާޒިޔާ މި ސީޒަނުގައި މިހާތަނަށް ބަލިވެފައިވަނީ ބުރު ސްޕޯޓްސް އަތުން އެކަންޏެވެ.
މިއަދު ހަވީރު ކުޅެން އޮތް މެޗުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ނިޒާމްބެ ބުނީ، ބުރު ސްޕޯޓްސްގެ ކުޅުންތެރިން މި މެޗަށް ހުރިހާ ގޮތުންވެސް ތައްޔާރަށްތިބި ކަމަށެވެ. އަދި ޕްރެޒިޑެންޓްސް ކަޕާއި ހިލާފަށް މިހާރު ބުރުގެ ސްކޮޑުގައި ބަދަލު ކުޅުންތެރިންގެ ގޮތުގައި އަރާ ކުޅުންތެރިންވެސް ތަފާތު މޮޅަށް ކުޅޭކަމަށް ނިޒާމްބެ ބުންޏެވެ.
ނިޒާމްބެ ދެކޭގޮތުގައި މާޒިޔާގެ މިހާރު އޮތް ސްކޮޑާއެކު އެ ޓީމަށް މާ ބޮޑު ޕްރެޝަރެއްނެތި ކުޅެވޭނެއެވެ. މީގެ އިތުރުން ނިޒާމްބެ ބުނީ މާޒިޔާ އަކީ ފަސޭހަ ގޮތަކަށް ނަގަން ޖެހޭ ޓީމަކަށްވުރެ، ވަރަށް ސީރިއަސް ޓީމެއް ކަމަށެވެ. އެ މެޗަށް ކުރިމަތިލާއިރު މާޒިޔާ އަށް ވެސް ބަދަލުތަކެއް އައިސްފައިވާ ކަމަށް ނިޒާމްބެ ވަނީ ފާހަގަކޮށްފައެވެ. ޚާއްސަކޮށް އެ ޓީމުގެ ކޯޗު ބަދަލުވުމަކީ، މާޒިޔާ ކުޅުމުގެ މުޅި ވައްޓަފާޅި އަށް ބަދަލު އަންނާނެ ކަމެއްގެ ގޮތުގައި ނިޒާމްބެ ފާހަގަކުރިއެވެ.
ނޫސްވެރިންގެ މި ބައްދަލުވުމުގައި ވާހަކަ ދައްކަމުން މާޒިޔާގެ ކޯޗު ލޮމީރް ސެސްލިޖާ (މިލޯ) ބުނީ ފުޓުބޯޅައިގައި ހަގީގަތުގައި ފިލާވަޅު ލިބޭނީ ބަލިވުމުން ކަމަށެވެ.
މިލޯ ބުނީ ޕްރެޒިޑެންޓްސް ކަޕުގައި ބުރު އަތުން މާޒިޔާ ބަލިވިގޮތް އޭނާއަށް ވަރަށް ރަނގަޅަށް އެނގޭ ކަމަށެވެ. އަދި އެ މެޗުން މާޒިޔާ ކުޅުންތެރިން މިހާރުވާނީ ފިލާވަޅު ނަގާފައި ކަމަށް މިލޯ ބުންޏެވެ. މިލޯ ބުނީ ބުރު ޓީމަކީ ހަލުވި ކުޅުންތެރިން ތިބި ޓީމެއް ކަމަށާއި، އެ ޓީމުގެ ނަތީޖާތަކަށް ބަލާއިރު، އިދިކޮޅު ޓީމަށް ލަނޑުޖަހަން އުނދަގޫކަން ފާހަގަވި ކަމަށެވެ.
ދިވެހި ޕްރިމިއަރ ލީގުގައި މާޒިޔާ އާއި ބުރު ސްޕޯޓްސް ކުލަބު ބައްދަލުކުރާ މެޗު ފަށާނީ މިއަދު ހަވީރު 16:00 ގައެވެ.