ރާއްޖޭގެ އެންމެ ހުނަރުވެރި ކައިޓްސާފަރު ކަމަށްވާ ހަސަން މާހިރު (ހަންޓޭ)، ބައިނަލްއަޤުވާމީ ކައިޓްސާފިން ބްރޭންޑް "ޑުއޮޓޯން" ގެ ބްރޭންޑް އެމްބަސަޑަރަކަށް ހަމަޖައްސައިފިއެވެ.
އުމުރުން 20 އަހަރުގެ ހަންޓޭ ވަނީ އުމުރުން 12 އަހަރުގައި ލަންކާގައި ބޭއްވި ބައިނަލްއަޤުވާމީ ކައިޓްސާފިން މުބާރާތުގައި ވިދާލާފައެވެ. މީގެ ކުރިން ސްލިންގްސޮޓް ބްރޭންޑާއެކު މަސައްކަތްކުރި ހަންޓޭ އަކުއާކިއުބް ޕްރައިވެޓް ލިމިޓެޑްގެ "ޑުއޮޓޯން ލޯކަލް ރައިޑާ"އެއްގެ ގޮތުގައި ހަމަޖެއްސީ އިއްޔެ ހ. ބޯޅަގޭގައި މިކަމައްޓަކައި ބޭއްވި ހާއްސަ ރަސްމިއްޔާތެއްގައެވެ.
އަކުއާކިއުބްގެ މެނޭޖިންގް ޑިރެކްޓަރު އާދަމް ފައިސަލް ވިދާޅުވީ، އެ ކުންފުނިން މަސައްކަތް ކުރަނީ ރާއްޖޭގެ މޫދު ކުޅިވަރުތަކުގައި ކުރިއަށްދާ ކުދިންނަށް ބޮޑު ޕްލެޓްފޯމެއް ގާއިމުކޮށްދޭން ކަމަށެވެ. އަދި އޭނާ ގަބޫލުކުރާ ގޮތުގައި ހަންޓޭ އަކީ މިވަގުތު ރާއްޖޭގެ އަސްދަނޑިން ބޭރަށް ބައިނަލްއަގުވާމީ މުބާރާތްތަކުގައި ވާދަކުރަން ޖެހޭ އެތުލީޓެއް ކަމަށް ފައިސަލް ވިދާޅުވިއެވެ.
ހަންޓޭއާއެކު އަކުއާކިއުބުން ވި އެއްބަސްވުމުގެ ދަށުން ހަންޓޭއަށް އިކުއިޕްމަންޓް ފޯރުކޮށްދޭން އަހަރަކު ތިން ލައްކަ ރުފިޔާ ޚަރަދުކުރާނެއެވެ.
މި ފުރުސަތާއެކު ހަންޓޭ ބުނީ މިއީ އޭނާއަށް ލިބުނު ބޮޑު ކުރިއެރުމެއް ކަމަށެވެ. އަދި މި ފުރުސަތާއެކު އުންމީދަކީ ކުރިއަށް އޮތް އަހަރަކީ "ސަޅި" އަހަރަކަށްވުން ކަމަށް ހަންޓޭ ބުންޏެވެ.
ހަންޓޭ ބުނީ ސްލިންގްޝޮޓް ދޫކޮށް އަކުއާ ކިއުބްގެ ޑުއޮޓޯން އާ ގުޅުމަކީ ނެގުނު އުނދަގޫ ނިންމުމެއް ކަމަށާއި، މިދިޔަ ފަސް އަހަރު ސްލިންގްޝޮޓުން އޭނާއަށް ކޮށްދިން ކަންތައްތަކަށް ޝުކުރުއަދާކުރާ ކަމަށެވެ. އަދި ސްލިންގްޝޮޓް ދޫކޮށްލަން ނިންމީ ޑޫއޮޓޯންއިން އޭނާއަށް ކުރި އޮފާ ލެވަލް ހައިވީމަ ކަމަށް ހަންޓޭ ބުންޏެވެ.
ހަންޓޭ މިހާރު އަންނަނީ ބ. ގޮއިދޫގައި ޒުވާން ކައިޓްސާފަރުން ޑިވޮލޮޕްކުރަންވެސް މަސައްކަތް ކުރަމުންނެވެ. އެގޮތުން މި މަހު ލަންކާގައި ގޮއިދޫގެ ޒުވާން ކައިޓްސާފަރުންގެ އިތުރުން އެހެން ރަށްތަކުގެ ކުދިންނާއެކު ޓްރެއިނިންގް ކޭމްޕަކަށް ފުރަން ހަންޓޭ އަންނަނީ ތައްޔާރުވަމުންނެވެ.