އެމްޑަބްލިއުއެސްސީ ދިވެހި ޕްރިމިއަރ ލީގުގައި ކުލަބު ވެލެންސިއާ ބަލިކޮށް ސުޕަ ޔުނައިޓެޑް ސްޕޯޓްސް (ސަސް) އިން މުހިންމު މޮޅެއް ހޯދައިފިއެވެ.
ޤައުމީ ފުޓްބޯޅަ ދަނޑުގައި މިރޭ ކުޅުނު މެޗު ސަސްއިން ކާމިޔާބުކޮށްފައިވަނީ ފަސޭހަކަމާއެކު 5-0 ގެ ނަތީޖާއަކުންނެވެ.
މި މެޗުގައި ސަސްގެ އަލީ ނަސޫހް ރަޝީދާއި އަޙްމަދު ހުސާމް ވަނީ ކޮންމެ ކުޅުންތެރިއަކު ދެ ލަނޑު ކާމިޔާބުކޮއްފައެވެ. މި މެޗުގައި ވެލެންސިއާގެ ގޯލް ސަސްއިން ހުޅުވާލީ މެޗު ފަށައިގެން ފަސްވަނަ މިނެޓުގައި ނަސޫހް ކާމިޔާބުކޮށްދިން ލަނޑުންނެވެ.
މި ލަނޑަށްފަހު ވެލެންސިއާއިން ކުރިއަށްޖެހިގެން ކުޅުނު ނަމަވެސް، ނުރައްކާތެރި ހަމަލާއެއް ސަސް ގޯލަށް ފޮނުވާލެވިފައެއް ނުވެއެވެ. އެއާއެކު ސަސްއިން ލީޑު ފުޅާކުރި ލަނޑު މެޗުގެ 30 ވަނަ މިނިޓުގައި ކާމިޔާބުކޮށްދިނީ ހުސާމެވެ. އަދި އެ ލަނޑު ޖެހިތާ ހަ މިނެޓު ފަހުން އޭނާ ވަނީ ސަސްގެ ތިންވަނަ ލަނޑުވެސް އެ ޓީމަށް ކާމިޔާބުކޮށްދީފައެވެ.
މި މެޗުގެ ފުރަތަމަ ހާފުގެ އެންމެ ފަހު މިނެޓުގައި ސަސްގެ ހަތަރުވަނަ ލަނޑު ކާމިޔާބުކޮށްދިނީ ފުރަތަމަ ލަނޑުވެސް ޖަހައިދިން ނަސޫހެވެ. އަދި މެޗުގެ ދެވަނަ ހާފުގައި ފެނިގެންދިޔަ ހަމައެކަނި ލަނޑު ސަސްއަށް ކާމިޔާބުކޮށްދިނީ އިބްރާހީމް އަތީގެވެ.
މި މޮޅާއެކު ސަސްއިން ވަނީ ކުޅުނު ފަސް މެޗުގެ ތެރެއިން ތިން މެޗު ކާމިޔާބުކޮށް ތާވަލުގެ ތިންވަނައިގައި އޮތް ބުރު ސްޕޯޓްސް ކުލަބާ އެއްވަރަށް ޕޮއިންޓް ހޯދާފައެވެ. އެގޮތުން ދެ ޓީމަށްވެސް ލިބެނީ ނުވަ ޕޮއިންޓެވެ. ލީގުގައި މިހާތަނަށް އެއްވެސް މެޗަކުން ވެލެންސިއާ މޮޅުވެފައި ނުވާއިރު، އެ ޓީމަށް އަދި މި ސީޒަނުގެ އެއްވެސް މުބާރާތެއްގައިވެސް މޮޅެއް ލިބިފައެއް ނުވެއެވެ،