ނިމިދިޔަ ސާފް ޗެމްޕިއަންޝިޕް ފުޓްބޯޅަ މުބާރާތުގައި ފެނިގެންދިޔަ ދަށް ކުޅުމާއި، ނޫސްވެރިންގެ ބައްދަލުވުން ދޫކޮށް ދިޔަ މައްސަލައިގައި ޤައުމީ ފުޓްބޯޅަ ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯއާ މެދު ކުރިއަށް އޮތް ދެ ދުވަހެއްގެ ތެރޭގައި ގޮތެއް ނިންމާނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
މި ފަހަރުގެ ސާފް ޗެމްޕިއަންޝިޕުގެ ގްރޫޕް ސްޓޭޖުން ޤައުމީ ޓީމު ކެޓިއިރު، މިއީ ސާފް ޗެމްޕިއަންޝިޕުގެ ތާރީޚުގައި މުބާރާތުގެ ގްރޫޕް ސްޓޭޖުން ރާއްޖެ ކެޓި ފުރަތަމަ ފަހަރެވެ.
ޤައުމީ ފުޓްބޯޅަ ދަނޑުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ބައްސާމް ވިދާޅުވީ ޤައުމީ ޓީމުގެ ދަށް ނަތީޖާތައް ބަލައިނުގަނެވޭނެ ކަމަށެވެ. އަދި އެކަމާ ގުޅިގެން ޓެކްނިކަލް އެކިކަހަލަ ބަދަލުތައް ކުރިއަށް އޮތް ތަނުގައި ފެނިގެންދާނެ ކަމަށްވެސް ވިދާޅުވިއެވެ. ބައްސާމް ވިދާޅުވީ ބޫޓާން އަތުން ރާއްޖެ މޮޅުވި ނަމަވެސް، އެ މެޗުގައި ރާއްޖޭގެ ޓީމުގެ ފަރާތުން ފެނިގެންދިޔަ ކުޅުންވެސް ބަލައި ނުގަނެވޭ ކަމަށެވެ.
ނޫސްވެރިންއަކު ކުރި ސުވާލަށް ޖަވާބުދެއްވަމުން ބައްސާމް ވިދާޅުވީ، ބަންގްލަދޭޝް މެޗަށްފަހު އޮތް ނޫސްވެރިންގެ ބައްދަލުވުން ދޫކޮށް މޮރިއޭރޯ ދިޔުން އެއީ މައްސަލައެއް ކަމަށެވެ. އަދި ރާއްޖޭގެ ޤައުމީ ޓީމުގެ ފަރާތުން ފެނިގެންދިޔަ ދަށް ކުޅުމާއި, ނޫސްވެރިންގެ ބައްދަލުވުން ދޫކޮށް ދިޔަ މައްސަލައިގައި ކޯޗާއެކު ބައްދަލުކޮށް ކުރިއަށް އޮތް ދެ ދުވަހެއްގެ ތެރޭގައި މި ކަމުގައި އެފްއޭއެމުން ގޮތެއް ނިންމާނެ ކަމަށްވެސް ބައްސާމް ވިދާޅުވިއެވެ.
މި ފަހަރުގެ ސާފް ޗެމްޕިއަންޝިޕުގެ ގްރޫޕް ސްޓޭޖުގައި ރާއްޖެއިން ކުޅުނު ތިން މެޗުގެ ތެރެއިން މޮޅުވީ އެންމެ މެޗަކުންނެވެ. އެއީ ބޫޓާން އަތުން އެކަންޏެވެ. އޭގެ ފަހުން ބަންގްލަދޭޝް އަދި ލުބުނާން އަތުން ރާއްޖެ ވަނީ ބަލިވެފައެވެ.
ޤައުމީ ޓީމުގެ ކޯޗުކަމާ މޮރިއޭރޯ ހަވާލުވި ފަހުން ރާއްޖެއިން ވަނީ ޖުމްލަ 15 މެޗު ކުޅެފައެވެ. އޭގެ ތެރެއިން ހަތް މެޗުން ރާއްޖެ ބަލިވެފައިވާއިރު، ހަ މެޗުން ރާއްޖެ ވަނީ މޮޅުވެފައެވެ. އަދި ދެ މެޗު ނިމުނީ އެއްވަރުވެގެންނެވެ.