އެމެރިކާގެ މޭޖާ ލީގު ސޮކާ (އެމްއެލްއެސް) އަށްވުރެ ސައުދީ ޕްރޯ ލީގު މާ ރަނގަޅުވާނެ ކަމަށް އަލް-ނަސްރަށް ކުޅެމުން އަންނަ ޕޯޗުގަލުގެ ކެޕްޓަން ކްރިސްޓިއާނޯ ރޮލާންޑޯ ބުނެފިއެވެ.
ސައުދީ ލީގަށް ދުނިޔޭގެ އެންމެ މަތީ ފަންތީގައި ނަން ހިނގާ ގިނަ ކުޅުންތެރިން ބަދަލުވާން ފެށީ މިދިޔަ އަހަރުގެ ފަހު ކޮޅު ރޮނާލްޑޯ އަލް-ނަސްރަށް ބަދަލުވި ހިސާބުން ފެށިގެންނެވެ. އެގޮތުން މި ފަހުން ސައުދީ ލީގިގެ ކުލަބުތަކުން ވަނީ ޔޫރަޕުގައި ނަން މަޝްހޫރު ގިނަ ކުޅުންތެރިންތަކެއް އެ ލީގަށް ގެންގޮސްފައެވެ. އެކަމަކު ދުނިޔޭގެ އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ އާޖެންޓީނާގެ ތަރި ލިއޮނެލް މެސީ ވަނީ ދާދި ފަހުން އެމްއެލްއެސްގެ އިންޓަރ މައޭމީއާ ރަސްމީކޮށް ގުޅިފައެވެ.
ނޫސްވެރިންނާއި ވާހަކަ ދައްކަމުން ރޮނާލްޑޯ ބުނީ ޔޫރަޕުގައި ކުޅެން އޭނާ ދެން ބޭނުންނުވާ ކަމަށާއި، އަދި އެމްއެލްއެސް އަށްވުރެ ސައުދީ ލީގު ރަނގަޅުވާނެ ކަމުގައެވެ.
އަދި ދުނިޔޭގެ އެންމެ މަތީ ފަންތީގައި ނަން ހިނގާ ގިނަ ކުޅުންތެރިން ސައުދީ ލީގާ ގުޅެމުން އަންނައިރު، ކުރިއަށް އޮތް ފަސް ވަރަކަށް އަހަރު ތެރޭގައި ދުނިޔޭގެ އެންމެ ވަރުގަދަ ފަސް ލީގުގެ ތެރޭގައި ސައުދީ ލީގު ހިމެނޭނެ ކަމުގައިވެސް ރޮނާލްޑޯ ބުންޏެވެ. މީގެ އިތުރުން ޔޫރަޕް ފުޓުބޯޅައިގައި މިހާރު އެއްވެސް ކޮލިޓީއެއް ނެތް ކަމަށާއި, ރަނގަޅު ލީގަކަށް ދެން އޮތީ އިނގިރޭސި ޕްރިމިއަރ ލީގު ކަމުގައިވެސް އޭނާ ވަނީ ބުނެފައެވެ.
ދުނިޔޭގެ ރިކޯޑު އަގަކަށް ސައުދީގެ ލީގަށް ބަދަލުވެ އަލް-ނަސްރަށް ރޮނާލްޑޯ ކުޅެމުން އަންނައިރު، ފުރާންސްގެ ޕީއެސްޖީ ދޫކޮށް އިންޓަރ މައޭމީއަށް މެސީ ބަދަލުވެފައިވަނީވެސް ރިކޯޑު އަދަކަށެވެ.