ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕުގެ ފިރިހެން ބައިގައި ވާދަކޮށް ރާއްޖޭގެ ހުސައިން އަރީފް (އިބޫ) ލޯ މެޑެލް ހޯދައިފިއެވެ.
މި އަހަރުގެ މުބާރާތުން އިބޫ ލޯ މެޑެލް ހޯދިއިރު، އޭނާ ވަނީ މީގެ ކުރިން 2019 ވަނަ އަހަރު ޖަޕާނުގައި ކުރިއަށްދިޔަ އޭޝިއަން ސާފިން ޗެމްޕިއަންޝިޕުންވެސް ލޯ މެޑެލް ހޯދާފައެވެ.
މިއަދު ކުރިއަށްދިޔަ ފައިނަލް ހީޓުގައި އިބޫ ވާދަކޮށްފައިވަނީ އިންޑޮނޭޝިއާގެ ޑަނީ ވިޑިއަންޓޯ އާއި ޖަޕާނުގެ ރިކީ ސަޓޯ އަދި ޖަޕާންގެ އިކޯ ވަތަނާބޭއާއެވެ. މި ހީޓުގައި ވާދަކޮށް އިބޫ ތިންވަނަ ހޯދީ 10.87 ޕޮއިންޓް ސްކޯ ކޮށްގެންނެވެ.
ފައިނަލް ހީޓުން އެއްވަނަ ހޯދައި ރަން މެޑެލް ހާސިލުކުރި ވިޑިއަންޓޯ ވަނީ 17.83 ގެ ސްކޯއެއް ހޯދާފައެވެ. އަދި ދެވަނަ ހޯދި ސަޓޯ އަށް 13.90 ގެ ސްކޯއެއް ލިބުނުއިރު، ހަތަރުވަނަ ހޯދި އިކޯއަށް ލިބުނީ 10.73 ގެ ސްކޯއެކެވެ.
މި ބައިގެ ފައިނަލުން ރާއްޖޭގެ ތަޖުރިބާކާރު ސާފަރު އިބޫ ފުރުސަތު ހޯދާފައިވަނީ ރެޕެޗާޖު ބައިގެ ފަހު ބުރުގެ ގަދަ ދެ ބައިވެރިންގެ ތެރޭގައި ހިމެނިގެންނެވެ. އެ ހީޓުން އިބޫއަށް ދެވަނަ ލިބުނުއިރު، އެއްވަނަ ހޯދީ ޖަޕާންގެ ސަޓޯއެވެ.
މިއީ އިބޫއަށް މި އަހަރުގެ އޭޝިއަން ސާފިން ޗެމްޕިއަންޝިޕުން ލިބުނު ދެވަނަ ލޯ މެޑެެއްޔެެވެ. އެގޮތުން އޭނާ ހިމެނު ރާއްޖޭގެ ޓީމުން ވަނީ މި މުބާރާތުގެ ތެރެއިން ކުރިއަށްދިޔަ މިކްސް ޓީމު އިވެންޓް ކަމަށްވާ އަލޯހާ ކަޕުގެ ތިންވަނަ ހޯދާފައެވެ. އެ ޓީމުގައި ހިމެނުނީ އިބޫގެ އިތުރުން އަޙްމަދު އާގިލް (އައްމަޑޭ) އާއި، ހޫދު އަޙްމަދު އަދި ރާހިލް ނަސީމް (އާޔާ) އެވެ.