ކުލަބު ވެލެންސިއާއަށް ކުޅުނު ސްޕެއިންގެ ދެ ކުޅުންތެރިން ކަމަށްވާ ބޯހަސް މާޓިން އާއި ހޯޒޭ އެންޓޯނިއޯ ޑޮމިންގޭޒްއަށް ދޭން ޖެހޭ މުސާރަ ދައްކައި، ފީފާއިން ކުރިމަތި ކޮށްފައިވާ ޓްރާންސްފާގެ އަދަބުން އެ ކުލަބު ސަލާމަތްކޮށްފިއެވެ.
އެ ދެ ކުޅުންތެރިންނަށް ވެލެންސިއާއިން ވަނީ މުސާރައިގެ ގޮތުގައި ޖުމްލަ ސާޅީސް އަށްހާސް ޑޮލަރު (ހަތްލައްކަ ސާޅީސް ހާސް އެއްސަތޭކަ ފަސްދޮޅަސް ރުފިޔާ) ދައްކާފައެވެ. ޓްރާންސްފާގެ އަދަބުން ސަލާމަތް ވުމުން މި މަހު ފަހުކޮޅު އަންނަ ޓްރާންސްފާ ޕީރިއަޑްގައި ކުޅުންތެރިން ރަޖިސްޓރީ ކުރުމުގެ ފުރުސަތު ވެލެންސިޔާއަށް ލިބިގެންދާނެއެވެ.
މީޑީޔާތަކުން ރިޕޯޓްކޮށްފައިވާ ގޮތުން ބޯހަސް ދޭން ޖެހޭ ފައިސާގެ ތެރެއިން އަދި ބާކީ ދެ މަސް އެބައިން ކަމަށެވެ. ނަމަވެސް އޭނާ އަށް ހަ މަހުގެ މުސާރަ ދީ، ފީފާއިން މައްސަލަ ނެގުމަށް އޭނާ އާއެކު ވެލެންސިޔާއިން އެއްބަސްވެފައިވާ ކަމަށްވެސް ވަނީ ރިޕޯޓުކޮށްފައެވެ. ހަ މަހުގެ މުސާރައިގެ ގޮތުގައި އޭނާއަށް ތިރީސް ހާސް ޑޮލަރު (ހަތަރު ލައްކަ ނުވަދިހަ ދެ ހާސް ހަސަތޭކަ ރުފިޔާ) ދައްކާފައިވާ ކަމަށް މައުލޫމާތު ވަނީ ލިބިފައެވެ.
މިދިޔަ އަހަރު ވެލެންސިއާއަށް ކުޅުނު ޑިފެންޑަރު ހޯޒޭއަށް ދޭން ޖެހޭ ހުރިހާ ފައިސާއެއް ދައްކާފައިވާ ކަމަށް ވެސް މައުލޫމާތު ވަނީ ލިބިފައެވެ. މުސާރަ ނުދޭތީ ވަކި ހިސާބަކުން ޓީމަށް ނާންގައި ރާއްޖެއިން ފުރައިގެން ދިޔަ ހޯޒޭ އަށް އަށާރަ ހާސް ޑޮލަރު (ދެ ލައްކަ ހަތްދިހަ ހަތްހާސް ފައްސަތޭކަ ފަސްދޮޅަސް ރުފިޔާ) ދައްކާފައެވެ.
މިދިޔަ ސީޒަންގައި އެ ޓީމަށް ކުޅުނު މިސްރުގެ ހަލީލް ޖަމާލް އަށް ވެސް ވެލެންސިއާއިން ދޭން ޖެހޭ ފައިސާ އަދި ނުދައްކައެވެ. ހަލީލް އާއި ދިވެހި ކުޅުންތެރިންނަށް ދޭން ޖެހޭ ފައިސާ ހަމަޖެއްސުމަށް ކްލަބްގެ މެނޭޖުމެންޓުން މަސައްކަތް ކުރަމުން އަންނަކަމަށް މައުލޫމާތަ ލިބިފައެވެ.