ރާއްޖޭގެ މަސްވެރިކަން ތަރައްޤީކޮށް ކުރިއެރުވުމުގެ ގޮތުން ދޫކޮށްފައިވާ 75 މަސްދޯނީގެ ތެރެއިން 49 މަސްދޯނީގެ ފައިސާ އަދިވެސް ލިބިފައިނުވާކަމަށް ފިޝަރީޒް މިނިސްޓްރީން ހާމަކޮށްފިއެވެ.
ރާއްޖޭގެ މަސްވެރިކަން ތަރައްޤީކޮށް ކުރިއެރުވުމުގެ ގޮތުން 1997 ވަނަ އަހަރުން ފެށިގެން 2001 ވަނަ އަހަރުގެ ނިޔަލަށް ދިގު މުއްދަތުގައި އަގު ދައްކައި ނިންމާގޮތަށް އެ މިނިސްޓްރީގެ ފަރާތުން ދޫކުރި މަސްދޯނިފަހަރު ދޫކޮށްފައިވާ ފަރާތްތަކަށް، ދޯނީގެ އަގަށް ދައްކަވަންޖެހޭ ފައިސާ ދެއްކުމުގައި ލުއިގޮތްތަކެއް ވަނީ ވޭތުވެދިޔަ ތާގައި ހަމަޖައްސައި ދެއްވާފައި ކަމަށް ޑެޕިއުޓީ މިނިސްޓަރ އޮފް ފިޝަރީޒް އެންޑް އެގްރިކަލްޗަރ އަހުމަދު ހާފިޒު ވިދާޅުވިއެވެެ. އަދި އެގޮތުގެ މަތިން ދެވުނު ފުރުޞަތުތަކަށްފަހުވެސް ގަވާއިދުން ފައިސާ ނުދައްކަވާ ފަރާތްތަކަށް ދޫކޮށްފައިވާ ދޯނިފަހަރުގެ އެގްރީމަންޓް ބާޠިލުކޮށް، ދޯނިފަހަރު އަނބުރާ ސަރުކާރަށް ނެގުމުގެ މަސައްކަތް އެ މިނިސްޓްރީއިން ފަށާފައިވާ ކަމަށް ހާފިޒް ވިދާޅުވިއެވެ.
އެގޮތުން މިހާތަނަށް ފައިސާ ދައްކާފައި ނުވާ 49 ފަރާތަކުގެ ތެރެއިން 17 ފަރާތަކަށް ދޯނި އަބުރާ މިނިސްޓްރީއާއި ހަވާލުކުރުމަށް މިހާރު އަންގާފައިވާ ކަމަށް ހާފިޒް ވިދާޅުވިއެވެ.