ރާއްޖޭގެ އާބާދީގެ 46 އިންސައްތައަކީ އެހެން ރަށްރަށަށް ހިޖުރަކޮށްގެން އުޅޭ މީހުން

ރާއްޖޭގެ އާބާދީގެ %46 އަކީ، އުފަން ރަށް ނޫން އެހެން ތަންތަނަށް ހިޖުރަކޮށް ދިރިއުޅޭ މީހުންކަމަށް "ބޯހިމެނުން 2022"ގެ ތަފާސް ހިސާބުތަކުން ދައްކައިފިއެވެ.

މިދިޔަ އަހަރު ކުރިއަށްގެންދިޔަ ބޯހިމެނުމުގެ، ތަފާސް ހިސާބުތަކުގެ ނަތީޖާ ނެރެދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމްއެވެ.

"ބޯހިމެނުން 2022"ގެ ތަފާސް ހިސާބުތަކަށް ބަލާއިރު، ރާއްޖޭގައި ދިރިއުޅޭ މީހުންގެ ޖުމްލަ އާބާދީއަކީ 515132 މީހުންނެވެ. އޭގެތެރެއިން ދިވެހިންގެ އާބާދީއަކީ 382639 މީހުންނެވެ. އެންމެ ބޮޑު އާބާދީއެއް ދިރިއުޅެމުން އަންނަނީ ވެރިރަށް މާލޭގައެވެ. އެއީ 211908 މީހުންނާއެކު، ރާއްޖޭގެ އާބާދީގެ 41 އިންސައްތައެވެ.

ތަފާސް ހިސާބުތަކުން ދައްކާގޮތުގައި ރާއްޖޭގެ އާބާދީގެ ގާތްގަނޑަކަށް ދެބައިކުޅަ އެއްބައި މީހުންނަކީ، އުފަން ރަށް ދޫކޮށް އެކި ބޭނުންތަކުގައި އެހެން ރަށްތަކަށް ހިޖުރަކޮށް ދިރިއުޅޭ މީހުންނެވެ.

Maldives Census 2022 Results Released during the function held to mark World Population Day 2023.

Read more on the Census Summary 2022 https://t.co/sEDhoLNqsj@MoNPHImv @UNFPAMaldives @presidencymv pic.twitter.com/ZYBLwTpMDj

— Statistics Maldives (@statsmaldives) July 11, 2023

ބޯހިމެނުމަށް މަޢުލޫމާތު އެއްކުރާއިރު ހިޖުރަކޮށް ދިރިއުޅޭ މީހުން ކަނޑައަޅަނީ، އެމީހަކު އާއްމުކޮށް ދިރިއުޅޭ ރަށް ނޫން އެހެން ރަށެއް ނުވަތަ ޤައުމެއްގައި އަހަރަކަށްވުރެ ގިނަ ދުވަހު ދިރިއުޅެފައިވާނަމައެވެ. އާބާދީގެ %46އަކީ ހިޖުރަކޮށް ދިރިއުޅެމުންދާ މީހުންނެވެ. މީގެތެރެއިން %40 މީހުންނަކީ 25 އާއި 39 އަހަރާއި ދެމެދުގެ މީހުންނެވެ.

އެންމެ ގިނަ ބަޔަކު ހިޖުރަކޮށްފައިވަނީ ތަޢުލީމު ހޯދުމަށެވެ. އެގޮތުން %20 މީހުން ތަޢުލީމު ހޯދުމުގެ ބޭނުމުގައި ހިޖުރަކޮށްފައިވާއިރު، ވަޒީފާ ހޯދުމަށް %19 މީހުން، އަދި އާއިލާ ހިޖުރަކުރުމުން އާއިލާއާއިއެކު ދިރިއުޅުމަށް %19 މީހުން ހިޖުރަކޮށްފައިއެވެ.

ހިޖުރަކުރާ މީހުންގެތެރެއިން މާލެއަށް ހިޖުރަކުރި މީހުންގެ %37 މީހުންނަކީ ތަޢުލީމު ހޯދުމަށް ހިޖުރަކުރި މީހުންނެވެ. އަދި އާއިލާއާއެކު ދިރިއުޅުމަށް %21 މީހުން، ވަޒީފާ ހޯދުމާއި ވަޒީފާ އަދާކުރުމަށް %14 މީހުން މާލެއަށް ބަދަލުވެފައިވެއެވެ.

މާލޭގައި ދިރިއުޅުމަށްފަހު އަތޮޅުތެރެއަށް ގިނަ ބަޔަކު ހިޖުރަކުރީ، ރަށުގައި ދިރިއުޅެން ބޭނުންވެގެންނެވެ. އެއީ %29 މީހުންނެވެ. އަދި އާއިލާ ހިޖުރަކުރުމުން އާއިލާއާއިއެކު %21 މީހުން އަދި ކައިވެންޏާ ގުޅިގެން %13 މީހުން ވަނީ ހިޖުރަކޮށްފައެވެ.

ރާއްޖެ އުފެދިފައި އޮތްގޮތުން، ޚިދުމަތްތައް ހޯދުމަށް މާލެ ސަރަޙައްދަށް އޮތީ ވަރަށް ބޮޑަށް ބަރޯސާވާންޖެހިފައެވެ. އެގޮތުން ރާއްޖޭގެ އާބާދީގެ ގާތްގަނޑަކަށް ދެބައިކުޅަ އެއްބައި މީހުން ދިރިއުޅެމުން މިދަނީ މާލޭގައެވެ.

އާބާދީގެ %41 މާލޭގައި ދިރިއުޅެމުންދާއިރު އެއީ 211908 މީހުންނެވެ. އިދާރާ ރަށްތަކުގައި ދިރިއުޅޭ މީހުންގެ އާބާދިއަކީ 236911 މީހުންނެވެ. އެއީ ރާއްޖޭގެ އާބާދީގެ %46 އެވެ.

ރާއްޖޭގެ އާބާދީގެ %10އަކީ ރިސޯޓްތަކުގައި ވަޒީފާގެ ބޭނުމުގައި ދިރިއުޅޭ މީހުންނެވެ. އެއީ 52482 މީހުންނެވެ. އިންޑަސްޓްރިއަލް މަސައްކަތްކުރާ ރަށްތަކުގައި 13831 މީހުން ދިރިއުޅެމުން އަންނައިރު، އެއީ އާބާދީގެ %3 މީހުންނެވެ.

މުޅި އާބާދީއަށް ބަލާއިރު ރާއްޖޭގައި ދިރިއުޅޭ ބިދޭސީންގެ އަދަދު 132493އަށް އަރައެވެ.

ރާއްޖޭގައި ބޯހިމެނުން ކުރިއަށް ގެންގޮސްފައި ވަނީ 8 އަހަރަށް ފަހުގައެވެ. މީގެ ބައެއް ވަގުތީ ތަފާސްހިސާބުތައް މިދިޔަ އަހަރުވެސް އާއްމުކުރިއެވެ.