ރަޝިޔާގެ ސަރުކާރާ ދެކޮޅަށް ދާދިފަހުން އަސްކަރީ ބަޣާވާތެއް ކުރި އެ ޤައުމުގެ ކުލީ ސިފައިންގެ ކުންފުނި ވާގްނަރ ގުރޫޕުގެ އިސްވެރިޔާ ޔެވްގެނީ ޕްރިގޮޜިންއާ އެ ޤައުމުގެ ރައީސް ވްލަޑިމިޔަރ ޕުޓިން ބައްދަލުކުރައްވާފައިވާ ކަމަށް ރިޔާސީ ގަނޑުވަރު ކްރެމްލިނުން ހާމަކޮށްފިއެވެ. ޕުޓިންގެ ތަރުޖަމާނު ދްމީތްރީ ޕިސްކޯފް ވިދާޅުވީ ޕުޓިން ޕްރިގޮޜިންއާ ބައްދަލުކުރައްވާފައި ވަނީ ރިޔާސީ ގަނޑުވަރުގައި ކަމުގައެވެ.
ޕްރިގޮޜިންގެ އަމުރަށް އޭނާގެ ކުލީ ސިފައިން ރަޝިޔާގެ ސަރުކާރާ ދެކޮޅަށް ބަޣާވާތްކުރަން ފަށާފައި ވަނީ ޖޫން 24 ވަނަ ދުވަހުއެވެ. ޔޫކްރެއިންގައި ތިބި ޕްރިގޮޜިންގެ ފައުޖުތަކުން ރަޝިޔާއަށް އަރާފައި ވަނީ އެ ޤައުމުގެ ދެކުނު ފަރާތުންނެވެ. އަދި، ދެކުނުގައިވާ ރަސްތޮފާއި ވަރޯނިޝްގައިވާ އަސްކަރީ މަރުކަޒުތައް އެ މީހުންގެ ބާރުގެ ދަށަށް ގެންގޮސް، އެ ދެ ރަށް ހިފިއެވެ.
ބަޣާވާތައް ހުއްޓުވަން ޕުޓިންގެ އަމުރަށް އޭނާގެ އަސްކަރިއްޔާއިން ޕްރިގޮޜިންގެ ފައުޖުތަކާ ދެކޮޅަށް ހަރަކާތްތެރިވާން ފެށިއެވެ. އަދި، ދެ ފަރާތުގެ ދެމެދުގައި ހިނގި ކުރިމަތިލުންތަކުގައި ވާގްނަރގެ ފައުޖުތަކުން ވަނީ ރަޝިޔާގެ އަސްކަރީ ބައެއް މަތިންދާބޯޓުތަކާއި ހެލިކޮޕްޓަރުތަކެއް ވައްޓައިލާފައެވެ. ބަޣާވާތާ ގުޅިގެން ޕުޓިން ވަނީ ޕްރިގޮޜިން ހައްޔަރު ކުރުމަށް ވެސް އަމުރު ކުރައްވާފައެވެ.
ޕްރިގޮޜިންގެ ފައުޖުތަކުން ރަސްތޮފާއި ވަރޯނިޝުން ފައިބާފައި ވަނީ ބެލަރޫސްގެ ރައީސް އަލެކްސާންދްރަ ލުކަޝެންކޯ މެދުވެރިއެއްގެ ދައުރު އަދާކުރައްވައިގެން ބޭއްވި މަޝްވަރާތަކަށް ފަހުއެވެ. ރަޝިޔާއިން ފޭބުމަށް ފަހު ވާގްނަރގެ ފައުޖުތަކުން ވަނީ ބެލަރޫސަށް ދަތުރުކޮށްފައެވެ. އަދި، އެ ޤައުމުން ވަނީ ވާގްނަރގެ ފައުޖުތައް ބޭތިއްބުމަށް އަސްކަރީ މަރުކަޒެއް ދީފައެވެ. ޕްރިގޮޜިން ވެސް ބެލަރޫސަށް ދަތުރުކޮށްފައިވާ ކަމުގެ އަޑުތައް ފެތުރުނު ނަމަވެސް، އޭނާ ބެލަރޫސަށް ގޮސްފައިވާ ކަން ކަށަވަރުވެފައެއް ނުވެއެވެ.
ޕްރިގޮޜިންގެ ބަޣާވާތަކީ 1999 ވަނަ އަހަރު ރަޝިޔާގެ ވެރިކަމާ ހަވާލުވެ ވަޑައިގެންނެވި ޕުޓިންއަށް މިހާތަނަށް ކުރިމަތިވެ ވަޑައިގެންނެވި އެންމެ ބޮޑު ގޮންޖެހުމެވެ. ބަޣާވާތް ހުއްޓުވާފައި ވަނީ ކިހިނެއް ކަން އަދި ބަޣާވާތަށް ފަހު ޕުޓިން އަޅުއްވާފައިވާ ފިޔަވަޅުތައް ސާފު ނޫން ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ނަމަވެސް، ޕްރިގޮޜިންއާ އެކު ރަޝިޔާގެ ސަރުކާރުން ކޮންމެ ވެސް ފާޑެއްގެ އެއްބަސްވުމެއް ހަދާފައިވާ ކަމަށް ގަބޫލުކުރެވެއެވެ.
ޕުޓިންއާއި ޕްރިގޮޜިންނާ ދެމެދު ބޭއްވި ބައްދަލުވުން ތިން ގަޑިއިރަށް ދެމިގެންދިޔަ އިރު، ވާގްނަރގެ އެންމެ އިސްވެރިންގެ ތެރެއިން 35 މީހަކަށް ބައްދަލުވުމުގައި ބައިވެރިވުމުގެ ދަޢުވަތު ޕުޓިން އެރުވި ކަމުގައި ޕިސްކޯފް ވިދާޅުވިއެވެ. ބައްދަލުވުމުގެ މަޝްވަރާތަކާ ގުޅޭ ގޮތުން ޕިސްކޯފް ވިދާޅުވީ، ބަޣާވާތާއި ވާގްނަގެ އަމަލުތަކާ ގުޅޭ ގޮތުން ޕުޓިން ދެކެވަޑައިގަންނަވާ ގޮތް ޕްރިގޮޜިންނާއި ވާގްނަރގެ އިސްވެރިންނާ ޕުޓިން ހިއްސާ ކުރެއްވި ކަމުގައެވެ.
މީގެ އިތުރުން ޔޫކްރެއިންގައި ވާގްނަރއިން އަދާކޮށްފައިވާ ދައުރާ ގުޅޭ ގޮތުން ޕުޓިން ވާހަކަފުޅު ދެއްކެވި ކަމުގައި ވެސް ޕިސްކޯފް ވިދާޅުވިއެވެ. އަދި، ވާގްނަރގެ އިސްވެރިންގެ ވާހަކަފުޅު އަޑުއައްސަވައި، އެ ގުރޫޕުގެ ކުލީ ސިފައިންނަށް ވަޒީފާގެ ފުރުޞަތުތައް ފަހިކޮށްދިނުމާ ގުޅޭ ގޮތުން ޕުޓިން ވާހަކަފުޅު ދެއްކެވި ކަމުގައި ވެސް ޕިސްކޯފް ވިދާޅުވިއެވެ. ރަޝިޔާގެ ސަރުކާރާ ދެކޮޅަށް ބަޣާވާތްކުރި ބަޔަކާ ދެކޮޅަށް އެއްވެސް ފިޔަވަޅެއް އަޅުއްވަން ޕުޓިން ޖެހިލުންވެ ވަޑައިގަންނަވާ ކަމަށް ބުނެ ގިނަ ބަޔަކު ދަނީ އެ ކަމާ މެދު ސުވާލު އުފައްދަމުންނެވެ.