2022 ވަނަ އަހަރުގެ ތެރޭގައި ދުނިޔޭގެ ބާރުތަކުން ނިއުކްލިޔަރ ހަތިޔާރު އުފައްދާ މިންވަރު އިތުރުކޮށްފައިވާ ކަމަށާއި، އެ ފަދަ ހަތިޔާރު ބައްކުރުން އިތުރު ކޮށްފައިވާ ކަން ރިޕޯޓަކުން ހާމަވެއްޖެއެވެ. ސްޓޮކްހޯމް އިންޓަރނޭޝަނަލް ޕީސް ރީސަރޗް އިންސްޓިޓިއުޓް (އެސް.އައި.ޕީ.އާރް.އައި)އިން ނެރުނު ރިޕޯޓެއްގައި ބުނެފައި ވަނީ ހުސްވި އަހަރު އެންމެ ގިނަ ޢަދަދަކަށް ނިއުކްލިޔަރ ހަތިޔާރު އުފައްދާފައި ވަނީ ޗައިނާއިން ކަމުގައެވެ. އެ އަހަރު އެ ޤައުމުން ބައްކޮށްފައިވާ ނިއުކްލިޔަރ ހަތިޔާރުގެ ޢަދަދު 17 އިންސައްތަ އިތުރުވެފައިވާ ކަމުގައި ރިޕޯޓުގައި ފާހަގަކޮށްފައިވެއެވެ.
2022 ވަނަ އަހަރުގެ ޖަނަވަރީ މަހު ޗައިނާގައި ހުރި ނިއުކްލިޔަރ ހަތިޔާރު ޢަދަދަކީ 350 ވޯހެޑް ނުވަތަ ބޮމެވެ. ނަމަވެސް، މި އަހަރުގެ ޖަނަވަރީ މަހު އެ ޢަދަދު ވަނީ 410 އަށް އިތުރުކޮށްފައެވެ. ޗައިނާގެ ސްޓޮކްގައި ބައްކޮށްފައި ހުރި ނިއުކްލިޔަރ ހަތިޔާރުގެ ޢަދަދު މި އަހަރުގެ ތެރޭގައި އިތުރުކުރާނެ ކަމަށް ބެލެވޭއިރު، އެހެން ޤައުމުތަކުން ވެސް އެ ޤައުމުތަކުގެ ނިއުކްލިޔަރ ހަތިޔާރު އިތުރަށް ތަރައްޤީކޮށް ފައްކާކުރަމުންދާ ކަމުގައި އެސް.އައި.ޕީ.އާރް.އައިގެ ރިޕޯޓުގައި ފާހަގަކޮށްފައިވެއެވެ.
ދުނިޔޭގައިވާ ނިއުކްލިޔަރ ބާރުގެ ގޮތުގައި ބެލެވޭ ޤައުމުތަކުގެ ރަސްމީ ޢަދަދަކީ ނުވައެކެވެ. އެ ޤައުމުތަކުގެ ތެރެއިން އެހެން ބައްރެއްގައި އޮންނަ ޤައުމަކަށް ޙަމަލާދިނުމަށް ބޭނުން ކުރެވޭނެ އިންޓަރކޮންޓިނެންޓަލް ބެލިސްޓިކް މިސައިލް (އައި.ސީ.ބީ.އެމް)ގެ ޢަދަދު އެންމެ ގިނައީ އެމެރިކާއާއި ރަޝިޔާގައެވެ. ނަމަވެސް، އެންމެ ހަލުވި ދުވެއްޔެއްގައި އެ ފަދަ ހަތިޔާރުގެ ޢަދަދު އިތުރު ކުރަމުން ދަނީ ޗައިނާއިން ކަމަށާއި، 2030ގެ ކުރިން ޗައިނާގެ އައި.ސީ.ބީ.އެމް ސްޓޮކްގެ ޢަދަދު ރަޝިޔާއާއި އެމެރިކާގެ ސްޓޮކަށްވުރެ އިތުރުކުރާނެ ކަމަށް ބެލެވޭ ކަމުގައި ވެސް ރިޕޯޓުގައި ފާހަގަކޮށްފައިވެއެވެ.
"ޗައިނާއިން އަބަދުވެސް ބުނަމުން ގޮސްފައި ވަނީ، އެ ޤައުމުގެ ސަލާމަތަށް ބޭނުންވާ މިންވަރަށް ވުރެ އިތުރަށް ނިއުކްލިޔަރ ހަތިޔާރު ނުއުފައްދާނަމޭ. ނަމަވެސް، ފެންނަމުން ދަނީ އެހެން މަންޒަރެއް. ޗައިނާއިން މިހާރު ދަނީ ނިއުކްލިޔަރ ހަތިޔާރު އުފައްދާ މިންވަރު އިތުރުކޮށް، ހަތިޔާރުގެ ޢަދަދު އިތުރު ކުރަމުން،" އެސް.އައި.ޕީ.އާރް.އައިގެ އިސް އޮފިޝަލެއް ކަމުގައިވާ ހާންސް އެމް. ކްރިސްޓެންސަން ވިދާޅުވިއެވެ.
ޗައިނާގެ ޕީޕަލްސް ލިބެރޭޝަން އާމީ (ޕީ.އެލް.އޭ) ނުވަތަ އަސްކަރިއްޔާއަކީ ދުނިޔޭގައިވާ ސިފައިންގެ ޢަދަދު އެންމެ ގިނަ އަސްކަރިއްޔާއެވެ. ޗައިނާއިން އެ ޤައުމުގެ އަސްކަރީ ސާމާނާއި ހަތިޔާރު ޒަމާނީކޮށް، އިތުރަށް ފައްކާކުރަން މަސައްކަތް ކުރަމުންދާ ކަން ފާހަގަކުރެވެއެވެ.
2023 ވަނަ އަހަރުގެ ޖަނަވަރީ މަހާ ހަމައަށް ދުނިޔޭގެ ނިއުކްލިޔަރ ބާރުތަކުން ބައްކޮށްފައިވާ ނިއުކްލިޔަރ ހަތިޔާރުގެ ޢަދަދު 12,512 އަށް އަރާ ކަމަށް އެސް.އައި.ޕީ.އާރް.އައިގެ ތަފާސްހިސާބުތަކުން ދައްކައެވެ. އަދި، އަސްކަރިއްޔާތަކުގައި ތައްޔާރީ ހާލަތުގައި ހުރި ނިއުކްލިޔަރ ހަތިޔާރު 9,576 އަރާ ކަމުގައި ވެސް އެ ޖަމުޢިއްޔާގެ ރިޕޯޓުގައި ފާހަގަކޮށްފައިވެއެވެ. އެއީ، 2022 ވަނަ އަހަރުގެ ޖަނަވަރީ މަހާ އަޅައިބަލާއިރު 86 ބޮން އިތުރު ޢަދަދެކެވެ.
ޤައުމުތަކުގެ އަސްކަރިއްޔާތަކުގައި ތައްޔާރީ ހާލަތުގައި ހުރި ނިއުކްލިޔަރ ހަތިޔާރުގެ ތެރެއިން 3,844 ހަތިޔާރު ބަހައްޓާފައި ހުރީ ބޭނުންކުރަން ތައްޔާރުކޮށް މިސައިލްތަކުގައި ނުވަތަ އަސްކަރީ މަތިންދާބޯޓުތަކުގައެވެ. އޭގެ ތެރެއިން 2,000 ނިއުކްލިޔަރ ހަތިޔާރަކީ އެމެރިކާއާއި ރަޝިޔާގެ ސްޓޮކްގައި ހިމެނޭ ހަތިޔާރު ކަމަށާއި، އެއީ ވަގުތުން ބޭނުންކުރެވޭ ގޮތަށް ހުރި ހަތިޔާރުތަކެއް ކަމުގައި އެސް.އައި.ޕީ.އާރް.އައިގެ ރިޕޯޓުގައި ހާމަކޮށްފައިވެއެވެ. ޗައިނާގެ ނިއުކްލިޔަރ ބާރުވެރިކަން އިތުރުކުރަން އެ ޤައުމުން މަސައްކަތް ކުރަމުންދިޔަ ނަމަވެސް، ޤައުމުތަކުގައި ހުރި ނިއުކްލިޔަރ ހަތިޔާރުގެ 90 އިންސައްތައަކީ އެމެރިކާއާއި ރަޝިޔާގެ ތަކެއްޗެވެ.