ދެކުނު އެމެރިކާގެ ތިން ޤައުމަކަށް ކުރައްވާ ދަތުރުފުޅެއްގައި އީރާނުގެ ރައީސް އިބްރާހީމް ރައީސީ ފުރާވަޑައިގަންނަވައިފިއެވެ. މި ދަތުރުފުޅުގައި އޭނާ ވެނެޒުއެލާއާއި ކިޔުބާގެ އިތުރުން ނިކަރާގުއާއަށް ވެސް ވަޑައިގަންނަވާނެއެވެ. މި ދަތުރުފުޅުގެ ބޭނުމަކީ ސިޔާސީ ގޮތުންނާއި އިޤުތިޞާދީ ދާއިރާއިން އެ ތިން ޤައުމާ އެކު ގުޅުން ބަދަހިކުރުމެވެ.
އޭނާ ދަތުރުފުޅު ކުރައްވާ ތިން ޤައުމަކީ ވެސް އެމެރިކާގެ ދަތިކުރުމުގެ ފިޔަވަޅުތަކުގެ ޝިކާރައަކަށްވެފައިވާ ތިން ޤައުމު ކަން ފާހަގަކުރެވެއެވެ. އަދި، އެ ތިން ޤައުމަކީ ވެސް އެމެރިކާގެ ހަތްފެތުރުމާ ދެކޮޅު ތިން ޤައުމެވެ. ރައީސީގެ ދަތުރުފުޅުގައި އެންމެ ފުރަތަމަ ވަޑައިގަންނަވާނީ ވެނެޒުއެލާއަށެވެ.
އީރާނުގެ ދަޢުލަތުގެ މީޑިޔާއިން ބުނީ ރައީސީގެ ދަތުރުފުޅުގައި ވެނެޒުއެލާގައި ފަސް ދުވަސް ހޭދަކުރައްވާނެ ކަމުގައެވެ. އަދި، އޭނާގެ އަރިހުގައި އެ ޤައުމުގެ ކެބިނެޓުގެ މުހިންމު ވަޒީރުންތަކެއް ދަތުރުކުރައްވާ ކަމުގައި ވެސް މީޑިޔާއިން ރިޕޯޓު ކުރެއެވެ. އޭގެ ތެރޭގައި ޚާރިޖީ ވަޒީރާއި، ތެލާ ބެހޭ ވަޒީރާއި، ދިފާޢީ ވަޒީރުގެ އިތުރުން ޞިއްޙަތާ ބެހޭ ވަޒީރު ހިމެނިވަޑައިގަންނަވައެވެ.
"ލެޓިން އެމެރިކާގެ ޤައުމުތަކާ ގުޅުން ބަދަހިކުރުމަކީ ވަރަށް މުހިންމު ކަމެއްގެ ގޮތުގައި އީރާނުން ދެކޭ. ހުޅަނގުގެ ހަންފެތުރުމާއި އިމްޕީރިއަލިޒަމާ ދެކޮޅަށް އަޅުގަނޑުމެން ހަތަރު ޤައުމުން ގުޅިގެން މަސައްކަތް ކުރަން ޖެހޭ ކަމަށް އަޅުގަނޑު ގަބޫލުކުރަން،" ފުރާވަޑައިގަތުމުގެ ކުރިން މީޑިޔާއާ ވާހަކަފުޅު ދައްކަވަމުން ރައީސީ ވިދާޅުވިއެވެ. އީރާނަކީ ވެނެޒުއެލާއާ އެކު ވަރަށް ބަދަހި ގުޅުންތަކެއް ބާއްވާ ޤައުމެއް ކަން ފާހަގަ ކުރެވެއެވެ.
ހުސްވި 2022 ވަނަ އަހަރު ވެނެޒުއެލާގެ ރައީސް ނިކޮލަސް މަދޫރޯ ވަނީ އީރާނަށް ދަތުރުފުޅެއް ކުރައްވައި، އެ ޤައުމުގެ ޒައީމު އާޔަތުالله ޢާލީ ޚާމަނާއީއާ ބައްދަލުކުރައްވާފައެވެ. ކުރިއަށް އޮތް 20 އަހަރުގެ ތެރޭގައި ދެ ޤައުމުގެ ދެމެދުގައި އޮތް ގުޅުންތައް އިތުރަށް ބަދަހިކުރުމާ ގުޅޭ މުހިންމު އެއްބަސްވުމެއްގައި ވެސް އޭނާ ވަނީ ސޮއިކުރައްވާފައެވެ.
ފާއިތުވި ތިން އަހަރުގެ ތެރޭގައި އީރާނުން ވަނީ ވެނެޒުއެލާއާ އެކު ތެލާއި ހަކަތައިގެ ދާއިރާއިން ގުޅުންތައް ބަދަހިކުރަން މަސައްކަތް ކޮށްފައެވެ. މީގެ އިތުރުން، ވެނެޒުއެލާގެ ތެޔޮ ސާފުކުރާ ކާރުޚާނާތަކަށް ބޭނުންވާ އެހީތެރިކަން ވެސް އީރާނުން ދަނީ ފޯރުކޮށްދެމުންނެވެ. ވެނެޒުއެލާއިން ތެޔޮ އުފައްދާ މިންވަރު އިތުރު ކުރަން ވެސް އީރާނުގެ އެހީތެރިކަން ލިބެއެވެ.
ވެނެޒުއެލާއަށް ކުރައްވާ ދަތުރުފުޅުގައި އެ ޤައުމާ އެކު ދަނޑުވެރިކަމާއި، ސައިންސާއި ޓެކްނޮލޮޖީގެ އިތުރުން ކަނޑު ދަތުރުފަތުރާއި، އެއްގަމު އުޅަނދުފަހަރުގެ ވިޔަފާރި ފަތުރުވެރިކަމުގެ ދާއިރާއިން ގުޅުން ބަދަހިކުރަން ރައީސީ މަސައްކަތް ކުރައްވާނެއެވެ. އަދި، ދެ ޤައުމުގެ ދެމެދުގައި ވައިގެ ދަތުރުފަތުރު އިތުރު ކުރުމަށް ވެސް މަސައްކަތް ކުރައްވާނެ ކަމުގައި އީރާނުން ބުނެއެވެ.
ކޮވިޑް-19ގެ ބަލިމަޑުކަމުގެ ތެރޭގައި އީރާނުން ވަނީ ވެނެޒުއެލާގެ ވެކްސިނެއް އުފެއްދުމުގައި ވެސް އެހީތެރިކަން ފޯރުކޮށްދީފައެވެ. އަދި، ހުސްވި މަހުގެ ތެރޭގައި ވެނެޒުއެލާގެ ސަރުކާރުގެ އިސް ވަފުދެއް ވަނީ ތެހެރާނަށް ދަތުރުކޮށްފައެވެ. އެ ދަތުރުގައި ދެ ޤައުމުގެ ދެމެދުގައި ގުޅުން ބަދަހިކުރުމަށް އިތުރު 13 އެއްބަސްވުމެއްގައި ސޮއިކޮށްފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. އޭގެ ތެރޭގައި ހިމެނެނީ ބަޔޯޓެކްނޮލޮޖީއާއި، ޞިއްޙީ ދާއިރާއާއި، ވިޔަފާރީއާއި، ބޭންކިންގާއި، ދަނޑުވެރިކަމުގެ އިތުރުން ކުޅިވަރުގެ ދާއިރާއާ ގުޅޭ އެއްބަސްވުންތަކެކެވެ.