ފްރެންޗް އޯޕަން ޓެނިސް މުބާރާތުގެ ފިރިހެން ސިންގަލްސް ބައިގެ ސެމީ ފައިނަލުން ހަތަރުވަނައަށް ސީޑް ކުރެވިފައިވާ ނޯވޭގެ ކެސްޕާ ރޫޑް ޖާގަ ހޯދައިފިއެވެ.
މިމުބާރާތުގެ ސެމީފައިނަލުން ރޫޑް ޖާގަހޯދީ ރޭ ކުޅުނު ކުއާޓަރ ފައިނަލް މެޗްގައި ޑެންމާކްގެ ހޮލްގަރ ރޫންއާ ބައްދަލުކުރިމެޗް ތިން ސެޓް އެއް ސެޓުން ކާމިޔާބުކޮށްގެންނެވެ.
މިދިޔަ އަހަރުގެ ފައިނަލްގައި ކުޅެ ރަފައަލް ނަޑާލް އަތުން ބަލިވި ރޫޑް މިމެޗް ކާމިޔާބުކުރީ ހައެއް އެކެއް، ހައެއް ދޭއް، ތިނެއް ހައެއް އަދި ހައެއް ތިނަކުންނެވެ. މިދިޔަ އަހަރުވެސް ސެމީފައިނަލުން ރޫޑް ޖާގަހޯދާފައިވަނީ ކްއާޓަރ ފައިނަލްގައި ރޫން ބަލިކޮށްގެންނެވެ. ނަމަވެސް މިދިޔަ އަހަރާއި ހިލާފަށް މިފަހަރުގެ މެޗްގައި މާބޮޑު ވާދަވެރިކަމެއް ސެޓްތަކުގެ ތެރޭގައި ފެނިގެން ގޮސްފައެއް ނުވެއެވެ.
މިފަހަރުގެ ސެމީފައިނަލްގައި ރޫޑް ބައްދަލުކުރުމަށް ހަމަޖެހިފައިވަނީ ޖަރުމަނުގެ އެލެގްޒެންޑަރ ޒުވަރޭވް އާއެވެ. ޒުވަރޭވް ސެމީފައިނަލުން ޖާގަހޯދީ ކްއާޓަރ ފައިނަލްގައި އާޖެންޓީނާގެ ތޯމަސް މާޓިންއާ ބައްދަލުކުރިމެޗް ތިން ސެޓް އެެއް ސެޓުން ކާމިޔާބުކޮށްގެންނެވެ. މިމެޗްގެ ސެޓްތައް ޒްވަރޭވް ކާމިޔާބުކުރީ ހައެއް ހަތަރެއް، ތިނެއް ހައެއް، ހައެއް ތިނެއް އަދި ހައެއް ހަތަރަކުންނެވެ. މިމުބާރާތުގެ ސެމީފައިނަލުން ޒްވަރޭވް ޖާގަހޯދާފައިވާއިރު މިދިޔަ އަހަރުގެ މުބާރާތުގެ ސެމީފައިނަލްގެ ދިމާވި ގޮތުގެ ހިތި ހަނދާންތައް އަދިވެސް ޒްވަރޭވް ހަނދާން ހުންނާނެއެވެ. މިދިޔަ އަހަރުގެ ސެމީފައިނަލްގައި ނަޑާލް ބައްދަލުކުރިމެޗްގައި ފަޔަށް ލިބުނު އަނިޔާއަކާ ގުޅިގެން އޭނާއަށް ޖެހުނީ މެޗް ދޫކޮށްލާށެވެ.
މިމުބާރާތުގެ އަންހެނުންގެ ސިންގަލްސް ބަޔަށް ބަލާލާއިރު މިމުބާރާތުގައި އެއްވަނައަށް ސީޑް ކުރެވިފައިވާ ޕޯލަންޑްގެ އީގާ ޝްވާންޓެންވެސް ވަނީ ސެމީފައިނަލްގެ ޖާގައެއް ކަށަވަރުކޮށްފައެވެ. ޝްވާންޓެކް ސެމީފައިނަލުން ޖާގަހޯދީ ކްއާޓަރ ފައިނަލްގައި އެމެރިކާގެ ކޯކޯ ގައުފް އާއި ބައްދަލުކުރިމެޗް ސީދާ ދެސެޓުން ކާމިޔާބުކޮށްގެންނެވެ. މިމެޗް ޝްވާންޓެކް ކާމިޔާބުކުރީ ހައެއް ހަތަރެއް އަދި ހައެއް ދޭކުންނެވެ.