ޖަރުމަން ލީގުގެ ބޮރޫޝިއާ ޑޯޓްމުންޑަށް ކުޅެމުން އައި އިންގްލަންޑުގެ މިޑްފީލްޑަރ ޖޫޑް ބެލިންހަމް، ސްޕެއިނުގެ ރެއާލް މެޑްރިޑަށް ބަދަލުވުމަށް އެއްބަސްވުމަކަށް އަތުވެއްޖެއެވެ.
މައުލޫމާތުލިބިފައިވާގޮތުގައި އެ ދެކްލަބްގެ މެދުގައި މިހާރުވަނީ 103 މިލިއަން ޔޫރޯގެ އަގަކަށް އެއްބަސްވެފައެވެ.
އުމުރުން 19 އަހަރުގެ ބެލިންހަމް ޑޯޓްމުންޑާ ގުޅިފައިވަނީ 2020 ވަނަ އަހަރުގެ ޖުލައި މަހު ބާމިންހަމް ސިޓީން 25 މިިލިއަން ޕައުންޑްގެ އަގަކަށެވެ. އަދި އޭނާ ވަނީ ޑޯޓްމުންޑާ ގުޅުމަށްފަހު މޮޅުކުޅުމެއް ދައްކައި. ގިނަ ބައެއްގެ ސަމާލުކަން ހޯދާފައެވެ. އަދި އިންގްލަންޑް ޓީމުން ޖާގަހޯދައި، އެންމެ ފަހުން ބެއްވި ވޯލްޑް ކަޕްގައިވެސް އެޓީމަށް ވަނީ ރަނގަޅު ކުޅުމެއް ދައްކާފައެވެ.
ޔޫރަޕްގެ ބޮޑެތި ގިނަ ކްލަބްތަކުން ވަނީ ބެލިންހަމް ހޯދުމަށް މަސައްކަތް ކޮށްފައެވެ. ބެލިންހަމް ރެއާލް އާއެކު ހަ އަހަރު ދުވަހުގެ އެއްބަސްވުމެއްގައި ސޮއިކުރާނެކަމަށް ރިޕޯޓުތައް ބުނެއެވެ. އަދި 103 މިލިއަން ޔޫރޯގެ އަގަކަށް އެއްބަސްވުމުގެ އިތުރުން، އެހެން ބައެއް ކަންތައްތަކާއެކު މިއަގު އިތުރު ވެގެންދާނެކަމަށްވެސް މައުލޫމާތު ލިބެއެވެ. ޑޯޓްމުންޑުން ފާހަގަކުރާ އިތުރު ކަންތައްތަކާއެކު މިއެއްބަސްވުމުގެ ޖުމްލަ އަގު 133.9 މިލިއަން ޔޫރޯއަށް އެރުމަކީ ގާތްކަމެކެވެ.
ބެލިންހަމް ހޯދުމުގެ މަސައްކަތް އިނގިރޭސި ޕްރިމިއަރ ލީގުގެ ޗެމްޕިއަން މެންޗެސްޓަރ ސިޓީ އާއި ލިވަޕޫލުންވެސް މީގެ ކުރިން ވަނީ ކޮށްފައެވެ. ނަމަވެސް ފަހުން ލިވަޕޫލުން ވަނީ އޭނާގެ އަގު މާބޮޑުވުމުން އެކަން ހުއްޓާލާފައެވެ. ރެއާލާއެކު ހަދާ އެއްބަސަވުމާއެކު ބެލިންހަމް ވެގެންދާނީ އުމުރުން 19 އަހަރުގެ އެންމެ އަގުބޮޑު ކުޅުންތެރިޔާއަށެވެ.