ރާއްޖޭގެ ރިސޯޓުތަކުގެ މެދުގައި ކުރިއަށްގެންދާ އެންމެ ބޮޑު ފުޓްސަލް މުބާރާތް ކަމަށްވާ ރިސޯޓް ލީގު 2023 ގެ އަރި ޒޯނުގެ ފައިނަލަށް ކޮންރެޑް މޯލްޑިވްސް ދަތުރުކުރިއިރު، ޑަބްލިއު މޯލްޑިވްސް އާއި ވިލަމެންދޫ އައިލެންޑް ރިސޯޓް ބައްދަލުކުރި މެޗު އެއްވަރުވެއްޖެއެވެ.
ކޮންރެޑުގައި ކުރިއަށްދާ މި މުބާރާތުގައި މިއަދު ހަވީރު ކުޅުނު ދެވަނަ މެޗުން އެ ޓީމު މޮޅުވީ ރެޑިސަން ބްލޫ އަތުން 8-1 ގެ ތަފާތު ބޮޑު ނަތީޖާއަކުންނެވެ.
މި މެޗު ފަށައިގެން ފުރަތަމަ މިނެޓުގައި ކޮންރެޑުން ވަނީ ލަނޑު ޖަހައި ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އާދަމް އާޒިމެވެ. އަދި އޭގެ ފަހުން ގާތްގާތުގައި ތިން ލަނޑު ޖަހައި ކޮންރެޑުން ވަނީ ލީޑު ފުޅާކޮށްފައެވެ. މި ތިން ލަނޑުވެސް އެ ޓީމަށް ކާމިޔާބުކޮށްދިނީ މި މެޗުގައި މޮޅު ކުޅުމެއް ދެއްކި ހުސެއިން ޝައްފާހެވެ.
އެކަމަކު ދެވަނަ ހާފު ފަށައިގެން ރެޑިސަންއިން އެ ޓީމުގެ ކުޅުން ރަނގަޅުކުރިއިރު، މެޗުގެ 30 ވަނަ މިނެޓުގައި އަބްދުﷲ ޒިޔަޒަން ވަނީ އެ ޓީމަށް ލަނޑެއް ޖަހައިދީފައެވެ. ނަމަވެސް އޭގެ ދެ މިނެޓު ފަހުން ޝައްފާހު ވަނީ ކޮންރެޑުގެ ލީޑު އަލުން ފުޅާކޮށްފައެވެ. އަދި ގާތްގާތުގައި ކޮންރެޑުގެ ކެޕްޓަން މުޙައްމަދު ފުރުގާން ދެ ލަނޑު ޖެހިއިރު، މި މެޗުގައި ކޮންރެޑުން ޖެހި ފަހު ލަނޑު އެ ޓީމަށް ކާމިޔާބުކޮށްދިނީ އަލީ އުމެއިރެވެ.
މި މޮޅާއެކު ކޮންރެޑުން ފައިނަލުގެ ސީދާ ޖާގައެއް ކަށަވަރުކުރީ ކުޅުނު ހަތަރު މެޗުން 10 ޕޮއިންޓް ހޯދައިގެންނެވެ.
މި މުބާރާތުގައި މިއަދު ހަވީރު ކުޅުނު ފުރަތަމަ މެޗުގައި ވިލަމަންދޫ އާއި ޑަބްލިއު އެއްވަރުވީ 1-1 ގެ ނަތީޖާއަކުންނެވެ.
ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ދެ ޓީމަށްވެސް ގޯލަށް މާ ނުރައްކާތެރި ހަމަލާއެއް ފޮނުވާލެވިފައެއް ނުވެއެވެ.
އެކަމަކު ދެވަނަ ހާފު ފަށައިގެން އަށްވަނަ މިނެޓުގައި ޑަބްލިއުއިން ވަނީ ލަނޑު ޖަހައި ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އިބްރާހީމް ސާއިދެވެ. އެކަމަކު އޭގެ 10 މިނެޓް ފަހުން ވިލަމެންދޫގެ ވިލްދާން މަންސޫރު ވަނީ ލަނޑެއް ޖަހައި ނަތީޖާ އެއްވަރުކޮށްފައެވެ. މިއީ ޑަބްލިއުގެ ފަސް ފައުލް ހަމަވެ، ލިބުނު ދުރު ޕެނަލްޓީއަކުން އޭނާ ކާމިޔާބުކުރި ލަނޑެކެވެ.
މި މުބާރާތުގެ ލީގު ބުރުގެ ފަހު ދެ މެޗު މާދަމާ ކުޅޭއިރު، އެ މެޗުތަކާއެކު ސެމީ ފައިނަލަށް ދަތުރުކުރާ ޓީމުތައް ކަށަވަރުވާނެއެވެ. މާދަމާގެ ފުރަތަމަ މެޗުގައި ބައްދަލުކުރާނީ ވިލަމަންދޫ އާއި ރެޑިސަން ބްލޫއެވެ. އަދި ދެވަނަ މެޗުގައި ލިލީ ބީޗް ނުކުންނާނީ ޑަބްލިއު މޯލްޑިވްސްއާ ދެކޮޅަށެވެ.