ކުރިއަށް އޮތް ސާފް ޗެމްޕިއަންޝިޕް ފުޓްބޯޅަ މުބާރާތަށް ތައްޔާރުވުމަށް ޤައުމީ ފުޓްބޯޅަ ޓީމު ޖަޕާނުގައި ފަރިތަކުރުންތައް ފަށައިފިއެވެ.
މި ފަހަރުގެ މުބާރާތް ކުރިއަށްދާނީ އިންޑިއާގެ ބެންގަލޫރުގައި މި މަހުގެ 21 އިން ޖުލައި މަހުގެ ހަތަރުވަނަ ދުވަހުގެ ނިޔަލަށެވެ. މި ފަހަރުގެ މުބާރާތުގެ ސާފް ސަރަހައްދުގެ ހަ ޤައުމެއްގެ އިތުރުން، ސަރަހައްދުން ބޭރުން ދެ ގައުމަކަށް ދައުވަތު ދީގެން، އަށް ޓީމުގެ މެދުގައި މުބާރާތް ބާއްވަން ވަނީ ނިންމާފައެވެ. ސަރަހައްދުން ބޭރުން ވާދަކުރާ ދެ ޤައުމަކީ ލުބުނާނާއި ކުވެއިތެވެ.
މި މުބާރާތަށް ތައްޔާތުރުމުގެ ގޮތުން މިދިޔަ ހޯމަ ދުވަހު ޤައުމީ ޓީމު ވަނީ ޖަޕާނަށް ގޮސްފައެވެ. އިޓަލީގެ ފްރެންޗެސްކޯ މޮރިއޭރޯގެ ކޯޗުކަމުގެ ދަށުން 30 ކުޅުންތެރިންގެ ސްކޮޑަކާއެކު ޤައުމީ ޓީމުން މީގެ ކުރިން ފަރިތަކުރުންތައް ކުރިއަށް ގެންދަމުން އައިރު، ޖަޕާނަށް ދިޔައީ 23 ކުޅުންތެރިންގެ ފައިނަލް ސްކޮޑެވެ.
ޖަޕާން ފުޓްބޯޅަ އެސޯސިއޭޝަން (ޖޭއެފްއޭ) ގެ އެހީތެރިިކަމާއެކު އެ ޤައުމަށް ގޮސް 10 ދުވަހުގެ ކޭމްޕެއް ފުރިހަމަކުރުމަށް ނިންމާފައިވާއިރު، ޓީމު ބެންގަލޫރަށް ދާނީ ޖަޕާނު މަގުންނެވެ. ޖަޕާނުގެ ޤައުމީ ޓީމުވެސް ތަމްރީނުތައް ކުރުމަށް ބޭނުންކުރާ ޚާއްސަ ވިލެޖެއްގައި ޤައުމީ ޓީމު ތިބޭއިރު، ޓީމުން ފަރިތަކުރުންތައް ފަށާފައިވަނީ އިއްޔެގެ ވަގުތެއްގައެވެ.
ރާއްޖޭން މި ކޭމްޕްގައި މައިގަނޑު ގޮތެއްގައި ޓްރެއިނިންގެ ކަންތައްތަކަށް އިސްކަންދިނުމަށްފަހު، ޕްރެކްޓިސް އެއް މެޗު ކުޅޭ ގޮތަށް ވަނީ ހަމަޖެހިފައެވެ. ޖަޕާނަށް ފުރުމުގެ ކުރިން މީޑިއާތަކަށް ދިން އިންޓަވިއުއެއްގައި ޤައުމީ ޓީމުގެ މެނޭޖަރު އަބްދުﷲ ޝިބާއު (ޝިބާ) ވިދާޅުވީ މި ޓްރެއިނިން ކޭމްޕުގެ ކަންކަން ޖޭއެފްއޭގެ ފުޓްބޯޅަ ޓްރެއިނިން ސެންޓަރުގައި ކުރިއަށްދާއިރު، ކޯޗުގެ ފޯކަސް ހުރީ މި ކޭމްޕުގައި މާ ގިނަ މެޗުތަކެއް ނުކުޅެ ޓްރެއިނިންގެ ކަންތައްތަކަށް އިސްކަންދިނުމަށް ކަމަށެވެ.
ޖަޕާނުގައި ފަރިތަކުރަމުން އަންނަ ޤައުމީ ޓީމުން އަލަށް ޖާގަ ހޯދި ކުޅުންތެރިންގެ ތެރޭގައި ސުޕަ ޔުނައިޓެޑް ސްޕޯޓްސް (ސަސް) ގެ އަޙްމަދު އައިހަމާއި، އެ ޓީމުގެ މުޙައްމަދު ނިޒާމުގެ އިތުރުން ބުރު ސްޕޯޓްސް ކުލަބުގެ އިބްރާހީމް އުސާމާ ހިމެނެއެވެ. މީގެ އިތުރުން އިތުރުން ކުލަބު އީގަލްސްގެ ހުމައިދު ހުސައިންވެސް ވަނީ ސްކޮޑުގައި ހިމަނާފައެވެ.
މި ފަހަރުގެ ސާފް ޗެމްޕިއަންޝިޕުގެ ފޯމެޓް ރޭވިފައިވާ ގޮތުން މުބާރާތް ކުރިއަށްދާނީ ދެ ގްރޫޕަކަށް ބަހާލައިގެންނެވެ. ކޮންމެ ގްރޫޕެއްގައި ހަތަރު ޓީމު ހިމެނޭއިރު، ގްރޫޕް އޭގައި ހިމެނެނީ އެންމެ ފަހުގެ ޗެމްޕިއަން އިންޑިއާ އާއި، ޕާކިސްތާނާއި، ކުވެއިތުގެ އިތުރުން ނޭޕާލެވެ. އަދި ރާއްޖެ އާއެކު ގްރޫޕް ބީގައި ހިމެނެނީ ލުބުނާނާއި، ބޫޓާން އަދި ބަންގްލަދޭޝްއެވެ.