ފްރެންޗް އޯޕަން ޓެނިސް މުބާރާތުގެ ފިރިހެން ސިންގަލްސް ސެމީ ފައިނަލުގައި އެއްވަނައަށް ސީޑް ކުރެވިފައިވާ ސްޕެއިންގެ ކާލޯސް އަލްކަރާޒް އާއި ތިންވަނައަށް ސީޑް ކުރެވިފައިވާ ސާބިއާގެ ނޯވަކް ޖޮކޮވިޗް ބައްދަލުކުރަން ޖެހިއްޖެއެވެ.
މިމުބާރާތުގެ ސެމީފައިނަލުން އަލްކަރާޒް ޖާގަހޯދީ ކްއާޓަރ ފައިނަލްގައި މިމުބާރާތުގައި ފަސްވަނައަށް ސީޑް ކުރެވިފައިވާ ގްރީސްގެ ސްޓެފަނޯސް ސިޓްސިޕާސްއާ ބައްދަލުކުރިމެޗް ސީދާ ތިން ސެޓުން ކާމިޔާބުކޮށްގެންނެވެ. ވަރުގަދަ ކުރިމަތިލުމަކަށް ވެގެންދާނެ ކަމަށް ކުރިން ބެލެވިގެންދިޔަ މިމެޗްގެ ފުރަތަމަ ދެ ސެޓްވެސް އަލްކަރާޒް ކާމިޔާބު ކޮށްފައިވަނީ ވަރަށް ފަސޭހަ ކަމާއެކުއެވެ. އެގޮތުން ފުރަތަމަ ސެޓް ހައެއް ދޭކުން ކާމިޔާބުކުރިއިރު، ދެވަނަ ސެޓް އޭނާ ކާމިޔާބުކުރީ ހައެއް އެކަކުންނެވެ. މިމެޗްގައި ސިޓްސިޕާސްގެ ފަރާތުން ކިރިޔާވެސް ވާންކޮށްލިތަން ފެނިގެންދިޔައީ ތިންވަނަ ސެޓްގައެވެ. އެގޮތުން މިސެޓް ޓައިބްރޭކަކަށް ދިޔަ ނަމަވެސް ޓައި ބްރޭކްގައި އަލްކަރާޒް ވަނީ ހަތެއް ފަހަކުން ކުރި ހޯދާފައެވެ.
މީގެ އިތުރުން މިމުބާރާތުގެ ސެމީފައިނަލުން ޖޮކޮވިޗް ޖާގަހޯދީ ކްއާޓަރ ފައިނަލްގައި ރަޝިއާގެ ކަރެން ހަޗަނޯވްއާ ބައްދަލުކުރިމެޗް ތިން ސެޓް އެއް ސެޓުން ކާމިޔާބުކޮށްގެންނެވެ. ނަމަވެސް މިމެޗް ވެގެންދިޔައީ ޖޮކޮވިޗަށް އެހާ ފަސޭހަ މެޗަކަށް ނޫނެވެ. މިގޮތުން ފުރަތަަމަ ސެޓް ހަތަރެއް ހަޔަކުން ކާމިޔާބުކުރީ ހަޗަނޯވްއެވެ. އަދި ދެވަނަ ސެޓް ޓައި ބްރޭކަކަށް ދިއުމުން ދެވަނަ ސެޓުވެސް ގެއްލިގެންދިއުމުގެ ބިރާ ޖޮކޮވިޗް ކުރިމަތިލިއެވެ. ނަމަވެސް ދެވަނަ ސެޓްގެ ޓައިބްރޭކް ހަތެއް ސުމަކުން ކާމިޔާބުކޮށް ޖޮކޮވިޗް މިމެޗްގައި ހަމަޖެހިލިއެވެ. އަދި ޖެހިގެން އައި ދެސެޓް އޭނާ ވަނީ ހައެއް ދޭއް އަދި ހައެއް ހަތަރަކުން ކާމިޔާބުކޮށްފައެވެ.
މިއަންނަ ހުކުރު ދުވަހު ކުޅުމަށް ހަމަޖެހިފައިވާ ސެމީފައިނަލް މެޗް ވެގެންދާނީ އަލްކަރާޒް އާއި ޖޮކޮވިޗަށްވެސް މިފަހަރުގެ މުބާރާތުގައި މިހާތަނަށް ދިމާވެގެންދާނެ އެންމެ އުދަގޫ މެޗަަށެވެ. އަދި މިމެޗަކީ މުބާރާތުގެ ގުރުލުން ބޭއްވުނީއްސުރެ އެންމެ ކަހަލަ ގޮތަކަށް އެމެޗަކަށް އިއްތިޒާރު ކުރަމުންދިޔަ މެޗެކެވެ.