ޔުއެފާ ޔޫރޮޕާ ކޮންފަރެންސް ލީގުގެ ފައިނަލުގައި ފިއޮރެންޓީނާއާ ދެކޮޅަށް ކުޅޭ މެޗަކީ ކެރިއަރުގެ އެންމެ ޚާއްސަ މެޗަށް ވެގެންދާނެ ކަމަށް ވެސްޓް ހޭމް ޔުނައިޓެޑުގެ ކޯޗު ޑޭވިޑް މޮއިސް ބުނެފިއެވެ.
މޮއިސް ހާމަކުރިގޮތުގައި ތަޖުރިބާކާރު ކޯޗެއް ކަމުގައިވިޔަސް ނުވަތަ ޒުވާން ކޯޗެއް ކަމުގައިވިޔަސް މިފަދަ މުބާރާތެއްގެ ފައިނަލްގައި ވާދަކުރަން ލިބުމަކީ ހާއްސަ ކަމެެއް ކަމަށެވެ.
މޮޔެސްގެ ކޯޗް ކަމުގެ ދަށުން ނިކުންނަ ވެސްޓް ހޭމްއިން މިރޭގެ މެޗާ ކުރިމަތިލަނީ 1980 ވަނަ އަހަރު އިނގިރޭސި އެފްއޭ ކަޕް ކާމިޔާބުކުރި ފަހުން، ފުރަތަމަ ތަށި ކާމިޔާބުކުރުމުގެ އަޒުމުގައެވެ. އަދި މިހާތަނަށް މޮއިސްއަށް ބޮޑު މުބާރާތެއްގެ ތައްޓެއް ކާމިޔާބު ކުރެވިފައެއް ނުވެއެވެ. ވެސްޓް ހޭމްއިން ވަނީ މިފަހަރުގެ ކޮންފަރެންސް ލީގުގައި ކުޅުނު 14 މެޗްގެ ތެރެއިން 13 މެޗް ކާމިޔާބުކޮށްފައެވެ. މިއީ މިފަހަރު އިނގިރޭސިވިލާތުގައި އެ ޓީމް މުޅި ސީޒަންގައި ކާމިޔާބު ކުރެވުނު އަދަދާ ހަމަ އަދަދެކެވެ. އަދި އިނގިރޭސި ޕްރިމިއަރ ލީގު ނިންމާލީ 14 ވަނައިގައި އޮވެގެންނެވެ. މިރޭގެ މެޗްގައި ފިއޮރެންޓީނާ ބަލިކުރެވިއްޖެނަމަ، ވެސްޓް ހޭމް މިއަންނަ ސީޒަންގައި ޔޫރޮޕާ ލީގަށް ކޮލިފައިވެގެންދާނެއެވެ.
މިމެޗް ކުޅުމަށް ހަމަޖެހިފައިވަނީ ސްލާވިއާ ޕްރާގްގެ އެޑެން އެރީނާ ގައެވެ. ސްލާވިއާ ޕްރާގަކީ ވެސްޓް ހޭމްގެ ދެ ކުޅުންތެރިންކަމަށްވާ ވްލަޑްމިއަރ ކޯފާލް އާއި ތޯމަސް ސޯޗެކް ކުރިން ކުޅުނު ކްލަބެކެވެ. އެހެން ކަމުން މިމެޗް މިދެކުޅުންތެރިންނަށް ނެގިފައިވަނީ އަމިއްލަ ދަނޑުގައި ކުޅޭ މެޗެއްގެގޮތުގައެވެ.
ފިއޮރެންޓީނާއަށް ބަލާލާއިރު މިސީޒަންގައި އެޓީމުން އަންނަނީ ރަނގަޅު ކުޅުމެއް ދައްކަމުންނެވެ. އަދި އެޓީމުން އިޓާލިއަން ލީގު ނިންމާލީ ތާވަލްގެ އަށްވަނައިގާ އޮވެގެންނެވެ. އަދި އިޓާލިއަން ކަޕުގެ ފައިނަލްގައިވެސް ފިއޮރެންޓީނާ ވަނީ މިފަހަރު ވާދަކޮށްފައެވެ. ނަމަވެސް ފައިނަލްގައި އެޓީމްވަނީ ޔުއޭފާ ޗެމްޕިއަންސް ލީގުގެ ފައިނަލްގައި އެއްކޮޅުން ވާދަކުރާ އިންޓަރ މިލާން އަތުން ބަލިވެފައެވެ.