އިޓާލިއަން ލީގުގެ އޭސީ މިލާނުގެ ޓެކްނިކަލް ޑިރެކްޓަރުގެ ގޮތުގައި ހަރަކާތްތެރިވަމުން އައި އެ ޓީމުގެ ކުރީގެ ތަޖުރިބާކާރު ޑިފެންޑަރ ޕައުލޯ މަލްޑީނީ މަޤާމުން ވަކިކޮށްފިއެވެ.
މަލްޑީނީ ވަނީ މިލާންގެ ޓެކްނިކަލްގެ ޑިރެކްޓަރުގެ މަގާމްގައި ފަސް އަހަރު ހޭދަކޮށްފައެވެ.
ގިނަ ބަޔަކު ގަބޫލުކުރާ ގޮތުގައި 11 އަހަރުގެ މެދުކެނޑުމަކަށްފަހު މިދިޔަ އަހަރު މިލާނުން ލީގު ތަށި އަލުން އުފުލާލުމުގެ ފަހަތުގައިވާ އެންމެ ބޮޑު މޭސްތިރިއަކީ މަލްޑީނީއެވެ. މިސީޒަން މިލާން ނިންމާލީ ތާވަލްގެ ހަތަރުވަނައިގާ އޮވެގެންނެވެ. މިލާނުން އާންމު ކުރި ބަޔާނެއްގައި އެ ކްލަބުން ވަނީ މަލްޑީނީ ކޮށްދިން ހިދުމަތަށް ޝުކުރު އަދާކޮށްފައެވެ.
މަލްޑީނީ ވަނީ މިލާންގެ ޓެކްނިކަލް ޑިރެކްޓަރގެ މަގާމްގައި ހުރެގެން މުހިންމު ގިނަ ކުޅުންތެރިންތަކެއް އެޓީމަށް ގެނައުމުގައި ބޮޑު ދައުރެއް އަދާކޮށްފައެވެ. މިގޮތުން ޕޯޗުގަލްގެ އަރަމުން އަންނަ ތަރި ރަފައެލް ލިއާއޯ އާއި ފްރާންސްގެ ތިއޯ ހެނާންޑޭޒް އާއި، ފިކާޔޯ ޓޮމޯރީ އަދި އޮލިވަރ ޖީރޫ ހިމެނެއެވެ. މިލާނުން ހާމަކުރިގޮތުގައި މަލްޑީނީ ކުރަމުންދިޔަ މަސައްކަތް ދެން ކުރާނީ އެ ޓީމްގެ ކޯޗާއި ގާތުން މަސައްކަތް ކުރާ, އެ ކަމަށް ޚާއްސަ ޓީމަކުންނެވެ.
އުމުރުން 54 އަހަރުގެ މަލްޑީނީ ވަނީ އޭނާގެ ފުޓްބޯޅަ ކެރިއަރ އެއްކޮށް މިލާންގައި ހޭދަކޮށްފައެވެ. މިގޮތުން އޭނާ ވަނީ 901 މެޗް މިލާނަށް ކުޅެދީފައެވެ. އަދި 26 ތަށިވެސް މިލާނާއެކު އޭނާ ކާމިޔާބުކުރިއެވެ. މަލްޑީނީގެ އާއިލާއަކީވެސް މިލާނާއި ގުޅުން އޮންނަ އާއިލާއެކެވެ. މިގޮތުން މަލްޑީނީގެ ބައްޕަ ސެޒާރޭ މަލްޑީނީވެސް ވަނީ އެކްލަބަށް 467 މެޗް ކުޅެދީ އަދި ދެ އަހަރަކު އެކްލަބްގެ ކޯޗްކަންވެސް ކޮށްފައެވެ. އަދި މަލްޑީނީގެ ދަރިފުޅު ޑެނިއެލް އަންނަނީ މިވަގުތު މިލާނަށް ކުޅެމުންނެވެ.
އެހެންކަމުން ބައެއް ފަރާތްތަކުން އަންނަނީ މިލާންގެ މި ނިންމުމަށް ސުވާލު އުފައްދަމުންނެވެ. އަދި މިލާން ޓީމްގައި ހިމެނޭ ބައެއް ކުޅުންތެރިން މިކަމާ ހިތްހަމަނުޖެހޭކަމަށްވެސް ރިޕޯޓުތައް ބުނެއެވެ.