އިނގިރޭސި ޕްރިމިއަރ ލީގުގެ ބްރައިޓަންއަށް ކުޅެމުން އަންނަ އާޖެންޓިނާގެ މިޑްފީލްޑަރ އެލެކްސިސް މެކް އެލިސްޓާ ލިވަޕޫލަށް ބަދަލުވުމާ ގާތަށް ޖެހިލައިފިއެވެ.
މަޢުލޫމާތު ލިބިފައިވާގޮތުގައި ބްރައިޓަންއިން ވަނީ ލިވަޕޫލްގެ މެޑިކަލް ހެދުމުގެ ހުއްދަ މެކް އެލިސްޓަރއަށް ދީފައެވެ. ނިމިދިޔަ ސީޒަންގައި ބްރައިޓަންގެ މެދުތެރެއިން މުހިންމު ދައުރެއް އަދާކުރި މެކް އެލިސްޓަރ ލިވަޕޫލަށް ބަދަލުވުމަށް ހަމަޖެހިފައިވަނީ 55 މިލިއަން ޕައުންޑްގެ އަގަކަށް ރިޕޯޓުތައް ބުނެއެވެ.
މެކް އެލިސްޓަރ ވަނީ ބްރައިޓަންގެ 122 އަހަރުވީ ތާރިހްގައި ފުރަތަމަ ފަހަރަށް އެ ކްލަބް ޔޫރަޕްގެ މުބާރާތަކަށް ކޮލިފައިކޮށްދިނުމުގައި މުހިންމު ދައުރެއް އަދާކޮށްފައެވެ. އަދި މިދިޔަ އަހަރުގެ ފަހުކޮޅު ބޭއްވި ފީފާ ވޯލްޑް ކަޕްގައި އާޖެންޓީނާއަށް ތަށި ކާމިޔާބުކޮށް ދިނުމުގައިވެސް އޭނާގެ ހިއްސާ ބޮޑެވެ.
އަންނަ ސީޒަނާއި ކުރިމަތިލާއިރު ލިވަޕޫލަށް ވަނީ މެދުތެރެއިން ކުޅޭ ކުޅުންތެރިން ހީނަރުކަން އިހުސާސްކުރަން ޖެހިފައެވެ. މިގޮތުން މި ސީޒަނަށްފަހު ޖޭމްސް މިލްނަރ އާއި ނެބީ ކެއިޓާ އަދި އެލެކްސް އޮކްސްލޭޑް ޗެމްބަލެއިން ވަނީ ލިވަޕޫލް ދޫކޮށްލާކަން ހާމަކޮށްފައެވެ. އެހެންކަމުން މެކް އެލިސްޓަރއަކީ އާ ސީޒަނަށް ލިވަޕޫލް ތައްޔާރުވާއިރު، އެޓީމަށް ވަރަށް މުހިންމު ކުޅުންތެރިއަކަށް ވެގެންދާނެއެވެ. މެކް އެލިސްޓަރ ވަނީ ބްރައިޓަންއަށް 40 މެޗް ކުޅެދީ 12 ލަނޑު ޖަހާދީފައެވެ.
ބްރައިޓަންގެ ކޯޗް ރޮބާޓޯ ޑި ޒަބީ މިދިޔަ މަހު ހާމަކުރިގޮތުގައި މެކް އެލިސްޓަރއަކީ މޮޅު ކުޅުންތެރިއެއް ކަމަށާއި އޭނާއަށް މިއަށްވުރެ މަތީ ފެންވަރުގައި ކުޅުމުގެ ފުރުސަތު ލިބުން ހައްގު ކަމަށެވެ.
މެކް އެލިސްޓަރ ބްރައިޓަންއާ ގުޅިފައިވަނީ 2019 ވަނަ އަހަރުގެ ޖެނުއަރީ މަހުގެ ތެރޭގައި އާޖެންޓީނާގެ ކްލަބެއް ކަމަށްވާ އާޖެންޓީނޯސް ޖޫނިއާސްއިންނެވެ. ނަމަވެސް އޭނާ ވަނީ އެސީޒަން ނިމެންދެން ލޯން އެއްބަސްވުމެއްގެ ދަށުން އެ ކުރީގެ ކުލަބާ އަލުން ގުޅިފައެވެ. މެކް އެލިސްޓަރ ބްރައިޓަންއަށް ކުޅުނު ފުރަތަމަ މެޗަކަށް ވެގެންދިޔައީ 2020 ވަނަ އަހަރުގެ މާރޗް މަހު ވުލްވްސްއާ ބައްދަލުކޮށް އެއްވަރުވި މެޗެވެ.