ތިން އަހަރު ދުވަހުގެ އެއްބަސްވުމެއްގެ ދަށުން ފްރާންސްގެ ތަޖުރިބާކާރު ފޯވާޑް ކަރީމް ބެންޒެމާ ސައުދީ އަރަބިއްޔާގެ ޗެމްޕިއަން އަލް-އިއްތިހާދަށް ސޮއިކޮށްފިއެވެ.
ބެންޒެމާ ވަނީ މިފަހަރުގެ ސީޒަން ނިމުމާއެކު ރެއާލް މެޑްރިޑާއެކު ހަދާފައިވާ އެއްބަސްވުން ނިމުމަކަށް ގެނެސްފައެވެ. އޭނާވަނީ ރެއާލްގައި ހޭދަކުރި 14 އަހަރުގައި 25 ތަށި ކާމިޔާބުކޮށްފައެވެ. މީގެތެރޭގައި ޔުއެފާ ޗެމްޕިއަންސް ލީގުގެ ފަސް ތައްޓާއި، ސްޕނިޝް ލީގުގެ ހަތަރު ތަށި ހިމެނެއެވެ. އަދި އޭނާ ރެއާލްގެ އެއްބަސްވުން ނިމުމަކަށް ގެނެސްފައިމިވަނީ ބާކީ އެއް އަހަރު އޮއްވައެވެ. ބެންޒެމާ ވަނީ ރެއާލަށް ޖުމްލަ 354 ލަނޑު ޖަހާދީފައެވެ.
ބެންޒެމާ ހާމަކުރިގޮތުގައި ސައުދީގެ ލީގަކީ ވަރުގަދަަ ލީގެއް ކަމަށާއި އެ ލީގުގައި މޮޅު ކުޅުންތެރިންތަކެއް ކުޅެމުންދާ ކަމަށެވެ. އެގޮތުން ކްރިސްޓިއާނޯ ރޮނާލްޑޯ އަކީ މިގޮތުން ފާހަގަކޮށްލެވޭ ކުޅުންތެރިއެއް ކަމަށްވެސް ވަނީ ބުނެފައެވެ.
ބެންޒެމާ ބުނީ އޭނާ އަލް އިއްތިހާދާ ގުޅުނީ ޔޫރަޕްގައި ކަންކުރިގޮތަށް ކާމިޔާބީ ހޯދަން ކަމަށެވެ. އަދި ޔޫރަޕްގައި އޭނާއަށް ހޯދޭނެ ހުރިހާ ކާމިޔާބީއެއް ހޯދިއްޖެ ކަމަށާއި އެހެންކަމުން މިއީ އާ ޗެލެންޖަކާއި ކުރިމަތިލާން އެންމެ ރަނގަޅު ވަގުތު ކަމަށްވެސް ބުންޏެވެ. އަލް އިއްތިހާދުގެ މިހާރުގެ ކޯޗަކީ ކުރިން ވުލްވްސް އާއި ޓޮޓްނަމް ހޮޓްސްޕަރއަށް ކޯޗް ކޮށްދިން ޕޯޗުގަލްގެ ނޫނޯ އެސްޕިރިޓޯ ސަންޓޯއެވެ.
ސައުދީގެ ލީގަށް އާޖެންޓީނާގެ ލިއޮނެލް މެސީ ގެންދިއުމަށްވެސް އެލީގުގެ ދެ ކްލަބަކުން ގެންދަނީ މަސައްކަތް ކުރަމުންނެވެ. އޭގެ ތެރޭގައި ރޮނާލްޑޯ ކުޅެމުންދާ އަލް ނަސްރު އާއި އަލް ހިލާލް ހިމެނެއެވެ.