ލިނިން މޯލްޑިވްސް ބެޑްމިންޓަން ޗެލެންޖް: ފުރަތަމަ ބުރުން ނަބީހާއަށް މުހިންމު މޮޅެއް

ރާއްޖޭގައި ފެށި ލިނިން މޯލްޑިވްސް އިންޓަރނޭޝަނަލް ބެޑްމިންޓަން ޗެލެންޖް 2023 ގެ ފުރަތަމަ ބުރުގެ މެޗުން ޤައުމީ ޓީމުގެ އައިމިނަތު ނަބީހާ މޮޅެއް ހޯދައިފިއެވެ.

ކުޅިވަރު އެކުވެނި އިންޑޯ ކޯޓުގައި އިއްޔެ ފެށި މި މުބާރާތުގައި ކުޅުނު މެޗުތަކުން އަންހެން ސިންގަލްސްގެ ގަދަ 64 ކުޅުންތެރިންގެ ބުރުގައި ނަބީހާ މޮޅުވީ އިންޑިއާގެ އަކްޝަޔާ އަރުމުގަމް އަތުން 21-13 އަދި 21-14 އިންނެވެ. ދެވަނަ ބުރުގައި ނަބީހާ ނުކުންނާނީ މިޔަންމާގެ ތޭ ހޫތާ ހިޒާރްއާ ދެކޮޅަށެވެ.

ޤައުމީ ޓީމުގައި ނުހިމެނޭ ކުޅުންތެރިންގެ ތެރެއިން ރިޝްވާން ޝިޔާމް ވަނީ އިއްޔެ ކުޅުނު ފުރަތަމަ މެޗުން ސްރީ ލަންކާގެ ޗަމަތު ޑިއާޒް އަތުން 21-19 އަދި 21-11 އިން މޮޅުވެފައެވެ. އެކަމަކު ދެވަނަ މެޗުގައި ރިޝްވާން ވަނީ ކޮލިފިކޭޝަން ދެވަަނަ ބުރުގައި އިޒްރޭލުގެ ޑަނީލް ޑުބުވެންކޯ އަތުން 21-05 އަދި 21-05 އިން ބަލިވެފައެވެ.

އަންހެން ސިންގަލްސްގެ ގަދަ 64 ބުރުގެ އެހެން ކުޅުންތެރިންގެ ނަތީޖާއަށް ބަލާއިރު، ވޯކްއޯވާ ވެގެން ރާއްޖޭގެ ޝުބާ މުޙައްމަދު ޝަރީފް އަނެއް ބުރަށް ދިޔައީ އިންޑިއާގެ ވިޖޭތާ ހާރިޝް މެޗު ދޫކޮށްލުމުންނެއެވެ. ރާއްޖޭގެ އައިމިނަތު ޝަހުރުނާޒް މޫސާ ކުޅުނު މެޗުން ތުރުކީގެ ނެސްލީހަން އަތުން ބަލިވީ 21-04 އަދި 21-05 އިންނެވެ.

ރާއްޖޭގެ ނީލާ ނަޖީބު ވަނީ ދެ ސެޓުން އިންޑިއާގެ ރިޝާ ދުބޭ އަތުން 18-21، 21-09 އަދި 21-10 އިން ބަލިވެފައެވެ. އަދި ނަބާހާ ވަނީ އިންޑިއާގެ ސަކްޝީ ގަހުލާވަތު އަތުން 21-16 އަދި 21-15 އިން ބަލިވެފައެވެ. ފިރިހެން ސިންގަލްސްގެ ކޮލިފައިން ދެ ވަނަ ބުރުގައި ރާއްޖޭގެ އަޖުފާން ރަޝީދު ވަނީ އިންޑިއާގެ ޗަރަން ނައިކޫ އަތުން 21-11 އަދި 21-14 އިން ބަލިވެފައެވެ. އަދި ރާއްޖޭގެ އަޙްމަދު ތޯއިފް މުޙައްމަދު އަތުން ފިލިޕީންސްގެ ވެލާސްކޯ މާކް އެންތަނީ މޮޅުވީ 19-21 އަދި، 17-21 އިންނެވެ.

ފިރިހެން ޑަބަލްސް ކޮލިފައިން ބުރުގައި އަޖުފާން އާއި ނިބާލް އަހުމަދުގެ ޕެއާ ވަނީ އިންޑިއާގެ އަބިނަވް ޓާކުރް އާއި ޗަޔާނިޓް ޖޯޝީގެ ޕެއާ އަތުން 21-10 އަދި 21-13 އިން ބަލިވެފައެވެ. މީގެ އިތުރުން ރާއްޖޭގެ މުޙައްމަދު ސާލިމް އަބްދުލް ސަމަދު ކޮލިފައިން ބުރުގައި ވަނީ ޔަޝް ޔޯގީ އަތުން 21-12 އަދި 21-06 އިން ބަލިވެފައެވެ. މީގެ އިތުރުން ހަސަން ޒަޔާން އަތުން ޔޫއޭއީގެ މުޙައްމަދު މުނައްވަރު ވަނީ 21-11 އަދި 21-07 އިން މޮޅުވެފައެވެ.

މި އަހަރުގެ މުބާރާތުގައި ރާއްޖެއިން 30 ވުރެ ގިނަކުޅުންތެރިން ވާދަކުރާއިރު ދުނިޔޭގެ 33 ގައުމަކުން 303 ކުޅުންތެރިން ވާދަކުރާނެއެވެ. މުބާރާތް ކުރިޔަށްދާނީ އަންނަ ހޮނިހިރު ދުވަހުގެ ނިޔަލަށެވެ.