ސަރަޙައްދީ ޤައުމުތައް ބައިވެރިވާ ބާސްކެޓްބޯޅަ މުބާރާތެއް މި މަހު ރާއްޖޭގައި ބާއްވަން ތާވަލުކޮށްފިއެވެ.
މި މަހުގެ 14 އިން ފެށިގެން 22 ވަނަ ދުވަހުގެ ނިޔަލަށް މާލޭގައި އޮންނަ "ފައިވް ނޭޝަންސް ކަޕް" ގައި ރާއްޖޭގެ އިތުރުން ސަރަޙައްދީ ހަތަރު ގައުމަކުން ވާދަކުރާނެއެވެ. އެއީ ބަންގްލަދޭޝް، ބޫޓާން, ޕާކިސްތާން އަދި ނޭޕާލެވެ.
މި މުބާރާތުގައި ބައިވެރިވާ ރާއްޖޭގެ ފިރިހެނުންގެ ބާސްކެޓްބޯޅަ ޓީމު މިވަގުތު ތިބީ އިތުރު ތަމްރީނުތައް ހޯދުމަށް އިންޑިއާގެ ބެންގަލޫރުގައި ކޭމްޕްކޮށްގެންނެވެ. އިންޑިއާއަށް ފުރި ޤައުމީ ޓީމްގައި ހިމެނެނީ 18 ކުޅުންތެރިންނެވެ. އެގޮތުން 14 ދުވަހުގެ ތަމްރީނު ކޭމްޕަށްފަހު ޓީމުން ހަ ކުޅުންތެރިން ބާކީކޮށް، 12 ކުޅުންތެރިން ފައިނަލް ކުރާނެއެވެ.
ޤައުމީ ފިރިހެން ބާސްކެޓްބޯޅަ ޓީމުގެ ތަމްރީންތައް އިންޑިއާގައި ކުރިއަށްދާނީ ބެންގަލޫރުގައި ހުންނަ ޕަޑުކޯން ޑްރާވިޑް ސެންޓާ ފޯ ސްޕޯޓްސް އެކްސަލަންސް ހައި ޕާފޯމަންސް ސެންޓަރުގައެވެ. މި ތަމްރީންތަކުގައި ޕްރެކްޓިސް ފަސް މެޗެއް ކުޅުމަށް ވަނީ ހަމަޖެހިފައެވެ. ޤައުމީ ޓީމުގެ ފައިނަލް ސްކޮޑު ނެގުމުގައި މި ފަސް މެޗުގައި ކުޅުންތެރިން ދައްކާ ޕާފޯމަންސަށް ބަލާނެއެވެ.
ޤައުމީ ޓީމުގައި މިފަހަރު ހިމެނޭ ކުޅުންތެރިންނަށް ބަލާއިރު ފުރަތަމަ ޑިވިޝަންގައި ހިމެނޭ ގަދަ ހަތަރު ކުލަބުގެ ކުޅުންތެރިންވެސް ހިމެނެއެވެ. ޤައުމީ ބާސްކެޓްބޯޅަ ޓީމަށް އިރުޝާދުދޭނީ ގައުމީ ޓީމުގެ ކުރީގެ ކެޕްޓަން އަދި ކިންގްސް ބާސްކެޓްބޯލް ކުލަބުގެ މިހާރުގެ ކޯޗު މުޙައްމަދު ޒިލާލެވެ. އޭނާގެ އެހީތެރިއެއްގެ ގޮތުގައި މަސައްކަތްކުރާނީ ޓީރެކްސްގެ ކޯޗު އަލީ ފަޒްލީއެވެ.
ޤައުމީ ޓީމް ތަމްރީން ކޭމްޕަށް އިންޑިއާއަށް ފުރުމުގެ ކުރިން ކުޅިވަރާ ބެހޭ ވަޒީރު އަޙްމަދު މަޚްލޫފް ވަނީ ޤައުމީ ޓީމާއި ބައްދަލުކުރައްވާައި، އެ ޓީމަށް ހިތްވަރު ދެއްވާފައެވެ.