އިނގިރޭސި ޕްރިމިއަރ ލީގުގެ މެނޭޖަރސް އެސޯސިއޭޝަނުން އަހަރުގެ އެންމެ މޮޅު ކޯޗަކަށް ޗެމްޕިއަން މެންޗެސްޓާ ސިޓީގެ ކޯޗު ޕެޕް ގާޑިއޯލާ ހޮވައިފިއެވެ.
މިއީ ސަރ އެލެކްސް ފަރގަސަންގެ ނަން ދީފައިވާ ޓްރޮފީ ޕެޕް ހޯދި ތިންވަނަ ފަހަރެވެ.
ލީގް މެނޭޖަރސް އެސޯސިއޭޝަންއިން ހޮވާ މިމަގާމް ހޮވަނީ އިނގިރޭސި ހުރިހާ ޑިވިޝަން ތަކެއްގެ ހުރިހާ ކޯޗުންގެ މެދުގައި ނެގޭ ވޯޓަކުންނެވެ. ޕެޕްވަނީ މިސީޒަންގެ ޕްރިމިއަރ ލީގުގެ އެންމެ މޮޅު ކޯޗުގެ މަގާމުވެސް ހާސިލްކޮށްފައެވެ.
އުމުރުން 52 އަހަރުގެ ޕެޕް މިވަނީ މިސީޒަންގައި ލީގު ކާމިޔާބުކޮށްދިނުމާއެކު ވޭތުވެދިޔަ ހަ އަހަރުގެ ތެރޭގައި ފަސްވަނަ ފަހަރަށް ލީގު ތަށި ސިޓީއަށް ހޯދާދީފައެވެ. މިފަހަރުގެ މިއިނާމާއެކު ޕެޕް ވެފައިވަނީ އެލްއެމްއޭއިން ހޮވާ އަހަރުގެ މޮޅު ކޯޗްގެ މަގާމް ތިން ފަހަރަށް ނުވަތަ އެއަށް ވުރެ ގިނައިން ހޯދި ތިންވަނަ ކޯޗަށް ވެގެން ގޮސްފައެވެ. މިއިނާމްވަނީ ވެސްޓް ހޭމްގެ ކޯޗް ޑޭވިޑް މޮޔެސްވެސް ތިން ފަހަރު ހޯދާފައެވެ. އަދި މިޓްރޮފީގެ ނަން އެކޯޗެއްގެ ނަމުން ނަން ދެވިފައިވާ ސަރ އެލެކްސް ފަރގަސަންވަނީ މިއިނާމް ފަސް ފަހަރު ހޯދާފައެވެ.
މިމަގާމް ލިބުމާއެކު ވާހަކަ ދައްކަމުން ޕެޕް ހާމަކުރިގޮތުގައި ދުނިޔޭގެ އެންމެ އުނދަގޫ ލީގުގައި ކުޅެމުން މިމަގާމް ހާސިލް ކުރެވުން މިއީ އޭނާއަށް ލިބިގެންދާ ވަރަށް ބޮޑު ޝަރަފެއް ކަމަށެވެ. އަދި މިއަންނަ ސީޒަންގައިވެސް ސިޓީ ތައްޓަށް ވާދަ ކުރާ ޓީމެއްގެގޮތުގައި ބޭއްވެތޯ މަސައްކަތް ކުރާނެކަމަށްވެސް އޭނާ ހާމަކުރިއެވެ. ސިޓީއަށް މިސީޒަންގައި އަދިވެސް އިތުރު ދެތަށި ކާމިޔާބު ކުރުމުގެ ފުރުސަތު އެބައޮތެވެ. އެއީ އެފް އޭ ކަޕްގެ ތައްޓާއި ޔުއޭފާ ޗެމްޕިއަންސް ލިގުގެ ތައްޓެވެ. މިދެ މުބާރާތުގެ ފައިނަލުންވެސް ސިޓީ ވަނީ ޖާގަހޯދާފައެވެ.