މި ސީޒަނުގެ ޖަރުމަން ލީގުގެ އެންމެ މޮޅު ކުޅުންތެރިޔާގެ މަޤާމު ބޮރޫޝިއާ ޑޯޓްމުންޑުގެ ޒުވާން ކުޅުންތެރިޔާ ޖޫޑް ބެލިންހަމަށް ލިބިއްޖެއެވެ.
އުމުރުން 19 އަހަރުގެ ބެލިންހަމް ވަނީ މިސީޒަންގައި ޑޯޓްމުންޑް ލީގަށް ވާދަކުރާ ޓީމަކަށް ހަދައިދިނުމުގައި މުހިންމު ދައުރެއް އަދާކުރި ކުޅުންތެރިޔަކަށެވެ.
ނިމިދިޔަ ސީޒަންގައި ބެލިންހަމް ވަނީ އަށް ލަނޑު ޖަހާދީ ފަސް އެސިސްޓް ކޮށްފައެވެ. އެކަމަކު އެންމެ ފަހު މެޗްގައި ބެލިންގހަމްއަށް އަނިޔާ ވުމުގެ ސަބަބުން ކުޅެވޭ ގޮތެއް ނުވިއެވެ. ބެލިންގހަމް ބުނީ ޑޯޓްމުންޑްގައި އަހަރަކަށް ފަހު އަހަރެއްގައި އޭނާގެ ޒިންމާ ދިޔައީ ބޮޑުވަމުން ކަމަށާއި، މިހާހިސާބަށް އައުމުގައި އޭނާ އާއެކު އެކުގައި ކުޅޭ ކުޅުންތެރިންނާއި ކޯޗުން މުހިންމު ދައުރެއް އަދާކޮށްފައިވާ ކަމަށެވެ.
ޔޫރަޕްގެ ގިނަ މީޑިއާތަކުން ހާމަކުރަމުންދާ ގޮތުގައި ބެލިންހަމް މިއަންނަ ސީޒަނުގައި ފެނުން ގާތީ ސްޕެނިޝް ލީގުގެ ރެއާލް މެޑްރިޑުންނެވެ. އަދި 100 މިލިޔަން ޔޫރޯގެ އަގަކަށް މިއެއްބަސްވުން މިހާރު ގާތްގަޑަކަށް ނިމިފައިވާކަމަށްވެސް ބައެއް ނޫސްތަކުން ހާމަކުރަމުންދެއެވެ. ރެއާލްގެ އިތުރުން ބެލިންހަމް ހޯދުމުގެ މަސައްކަތް އިނގިރޭސި ޕްރިމިއަރ ލީގުގެ ލިވަޕޫލުންވެސް މީގެ ކުރިން ވަނީ ކޮށްފައެވެ. އަދި ޗެމްޕިއަން މެންޗެސްޓަރ ސިޓީން އަދިވެސް ބެލިންހަމް ހޯދުމުގެ މަސައްކަތް ކުރަމުންދާ ކަމަށް މައުލުމާތުލިބެއެވެ.
ބެލިންހަމް ޑޯޓްމުންޑާއި ގުޅިފައިވަނީ 2020 ވަނަ އަހަރު 25 މިލިއަން ޕައުންޑްގެ އަގަކަށް ބާމިންހަމް ސިޓީންނެވެ. އަދި މިހާތަނަށް ވަނީ ޑޯޓްމުންޑަށް 130 މެޗް ކުޅެދީފައެވެ.