އދ. މަހިބަދޫ ޓާފް ދަނޑުގެ ނަން "ޕެލޭ ސްޓޭޑިއަމް"ގެ ނަމަށް ބަދަލުކުރުމާއި ގުޅިގެން ދުނިޔޭގެ ފުޓުބޯޅައިގެ މައި އިދާރާ ފީފާގެ ރައީސް ޖިއާނީ އިންފަންޓީނޯ މަހިބަދޫގެ ރައްޔިތުންނާއި އެފްއޭއެމްގެ ރައީސް ބައްސާމް އަދީލް ޖަލީލަށް ޝުކުރުއަދާކުރައްވައިފިއެވެ.
ބްރެޒިލުގެ ފުޓްބޯޅަ ލެޖެންޑް ޕެލޭ މަރުވުމާއި ގުޅިގެން، ފީފާއިން ކޮންމެ މެންބަރު ގައުމެއްގެ އެއް ދަނޑަށް ޕެލޭގެ ނަމުން ނަން ދިނުމަށް ވަނީ އެދިފައެވެ. އެކަމަށް އިޖާބަދިނުމުގެ ގޮތުން މަހިބަދޫގައި ބޭއްވި ރަސްމިއްޔާތެއްގައި ޕެލޭ ދަނޑު ހުޅުއްވައިދެއްވީ ފުޓްބޯލް އެސޯސިއޭޝަން އޮފް މޯލްޑިވްސްގެ ރައީސް ބައްސާމް އަދީލް ޖަލީލާއި، މަހިބަދޫ ކައުންސިލުގެ ރައީސް ރަޝާދު އަލީގެ އިތުރުން މަހިބަދޫ ދާއިރާގެ މަޖިލިސް މެންބަރު އަދި ކުރީގެ ތަޖުރިބާކާރު ފޯވާޑް އަޙްމަދު ތޯރިގް (ޓޮމް) އެވެ.
ފީފާގެ އެ އެދުމާއި އެއްގޮތަށް، މަހިބަދޫ ފުޓްބޯލް ސްޓޭޑިއަމްގެ ނަން، ޕެލޭ ސްޓޭޑިއަމްއަށް އިއްޔެ ވަނީ ބަދަލުކޮށް ހުޅުވާފައެވެ. މަހިބަދޫގެ އެ ފުޓްބޯޅަ ސްޓޭޑިއަމްއަކީ ފީފާގެ ސްޓޭންޑަޑްތަކަށް ފެތޭ، ފީފާއިން ގަބޫލުކުރާ ދަނޑެކެވެ،
ޕެލޭ ސްޓޭޑިއަމް ހުޅުވުމާއި ގުޅިގެން އެކަމަށް ތައުރީފުކުރައްވާ އިންފަންޓީނޯ ވިދާޅުވީ ޕެލޭގެ ހަނދާނުގައި ސްޓޭޑިއަމަށް ނަން ދިނުމަކީ ފާހަގަކުރާ ބޮޑު ކަމެއް ކަމަށާއި އެކަމަށްޓަކާ މަހިބަދޫގެ ރައްޔިތުންނަށް ޝުކުރުއަދާކުރައްވާ ކަމަށެވެ.
މަހިބަދޫ ޕެލޭ ސްޓޭޑިއަމް ހުޅުވުމުގެ ގޮތުން ވަނީ އެކުވެރިކަމުގެ މެޗެއް ކުޅެފައެވެ. މަހިބަދޫ އިން ހޮވާލެވުނު ކުޅުންތެރިން ހިމެނޭ ޓީމަކާ ދެކޮޅަށް ޤައުމީ ޓީމު ކުޅުނު މެޗު 5-0 އިން ކާމިޔާބުކޮށްފައިވަނީ ޤައުމީ ޓީމެވެ.